ISAIAS 11
11
I yumʌntel Mesías
1Mi caj i chilbentel i ye'tel i p'olbal David che' bajche' mi' sejq'uel colem te'. Pero mi' cajel ti pasel junts'ijt i Buts te'. Mi caj i yʌc' juntejc i C'ʌb. 2Mi caj i yajñel Ch'ujul bʌ i Ch'ujlel Dios ti' tojlel jini Winic. Mi caj i yʌq'uentel wen bʌ i ña'tʌbal yic'ot cabʌl i pusic'al, yic'ot i ye'tel ti cʌntesa yic'ot i p'ʌtʌlel, yic'ot wen bʌ i c'ʌjñibal, yic'ot i bʌc'ñʌntel lac Yum. 3Mi caj i mulan i jac'bentel lac Yum. Mach jelchojquic mi caj i mel winicob. Ma'anic mi caj i ñop u'yaj t'an yic'ot lot. 4Mi caj i coltan jini p'ump'uño' bʌ yic'ot jini utso' bʌ mu' bʌ i tic'lʌntelob. Ti' t'an jach mi caj i jisan jini tsʌtso' bʌ i pusic'al yic'ot xjontolilob. 5Mi caj i cha'len yumʌl ti toj yic'ot ti' xuc'tilel i pusic'al. 6Ti jim bʌ ora jini bʌte'el ts'i' mi caj i yajñel yic'ot tiñʌme'. Jini bajlum mi caj i tem pʌctʌl yic'ot chivo. Temel mi' yajñel alʌ wacax yic'ot jujp'em bʌ wacax yic'ot jini bajlum. Mi caj i laj jac' i pʌyol ti alʌl ch'iton. 7Jini wacax yic'ot jini jontol bʌ bʌte'el temel mi' cajel ti buc'bal. Temel mi caj i yajñel i yal. Jini bajlum mi caj i c'ux jam che' bajche' wacax. 8Jini alʌl woli to bʌ ti chu' mi' cajel ti alʌs ya' ba'an jini lucum. Jini alob yujil bʌ xʌmbal mi caj i yotsan i c'ʌb ti' c'u' lucum. Mach i tajayic wocol. 9Ya' ti ch'ujul bʌ wits c cha'an ma'anix chuqui mi' lojwel, ma'anix chuqui mi' yʌc' ti asiyel. Che' bajche' mi' bujt'el i ch'eñal lum ti ja' lajal mi caj i bujt'el pañimil ti winicob x'ixicob mu' bʌ i cʌñob lac Yum.
10Ti jim bʌ q'uin mi caj i wa'tʌl i p'olbal David mu' bʌ caj i cha'len coltaya ti pejtelel pañimil. Cabʌl winicob x'ixicob mi caj i jac'ob. Wen uts'atax mi caj i q'uelob i lumal jini Ñuc Bʌ. 11Ti jim bʌ ora lac Yum mi caj i cha' sʌts' i c'ʌb cha'an mi' pʌy tilel i cha'año' bʌ tsa' bʌ cʌleyob ti Asiria, yic'ot ti Egipto, yic'ot ti Patros, yic'ot ti Etiopía, yic'ot ti Elam, yic'ot ti Sinar, yic'ot ti Hamat, yic'ot ti lum tac joyol bʌ ti colem ja' ti' ñajtilel pañimil.
12Jini winicob x'ixicob mach bʌ anic tsi' cʌñʌyob Dios mi caj i c'otelob ba'an Mesías. Mi caj i cha' tempañob tilel jini israelob yic'ot i pi'ʌlob ti Judá pujquemo' bʌ ti pejtelel pañimil. 13Israel yic'ot Judá mi caj i cʌyob leto. Muc'ʌch i lajmel tsʌytsʌyña bʌ i pusic'alob. Ma'anix mi caj i contrajiñob i bʌ. Efraín ma'anix mi caj i mulʌben i ñuclel Judá. Judá ma'anix mi caj i tic'lan Efraín. 14Temel mi caj i majlel i jisañob jini filisteojob ya' ti' lumal ba' mi' bʌjlel q'uin. Temel mi caj i jisañob jini año' bʌ ti lum tac ba' mi' pasel q'uin. Mi caj i cha' ch'ʌmob i lum tsa' bʌ i chilbeyob Edom yic'ot Moab yic'ot Amón. Mi caj i yumʌntelob i cha'añob. 15Lac Yum mi caj i tiquesan jini Chʌchʌc bʌ Ñajb am bʌ ti Egipto. Mi caj i sʌts' i c'ʌb ya' ti colem ja' i c'aba' Eufrates cha'an mi' t'oxtʌl ti wucts'ijt i xʌc' jini ja', cha'an mi' c'axelob winicob. 16Lac Yum mi caj i yʌc' colem bij cha'an mi' cha' tilelob jini israelob tsa' bʌ cʌleyob ti Asiria che' bajche' tsi' jambeyob i bijlel i ñojte'elob che' bʌ tsa' loq'uiyob israelob ti Egipto.
Currently Selected:
ISAIAS 11: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.