GENESIS 49
49
Jacob tsi' subu chuqui mi' caj ti ujtel ti' tojlel i yalobilob
1Jacob tsi' pʌyʌ tilel i yalobilob. Tsi' subeyob: Tempan la' bʌ cha'an mic subeñetla chuqui mi' caj ti ujtel ti la' tojlel ti jini tal to bʌ ora. 2Tempan la' bʌ. Ñich'tañon, calobilob. Joñon Jacob la' taton. Ñich'tañon, joñon Israel la' taton.
3Rubén, ascuñʌl bʌ calobil, tsa' bʌ c teche che' wen ch'ejlon to, wen ñuquet, cabʌl a p'ʌtʌlel. 4Wʌlwʌlñayet che' bajche' ja' woli bʌ ti lojc, come an i ts'i'lel a wut. Mach chʌn ñuquix mi caj a q'uejlel, come tsa' pi'le quijñam. Tsa' wʌc'ʌyon ti quisin cha'an tsa' taja a mul tic wʌyib.
5Simeón yic'ot Leví i pi'ʌlob i bʌ, jump'ejlob i pusic'al. Tsi' c'ʌñʌyob i yespada ti' melol jontolil. 6Mach yomic mic laj c t'an yic'otob, mach comic c pi'leñob majlel cha'an mic mel bajche' mi' melob, come cʌlʌx jax tsi' tsʌnsayob winicob. Cha'an ti' tsʌytsʌñiyel i pusic'alob tsi' tsepbeyob i chijil i ya' wacax tac. 7La' i tojob i mul Simeón yic'ot Leví cha'an tsʌtsatax i mich'ajel. La' i tajob i ts'a'lentel cha'an ti' caj i mich'ajel, come wen jontol jax. Mi caj c t'oxob ti' lumal Jacob. Mi caj c pucob majlel ti' lumal Israel.
8Judá, mi caj a q'uejlel ti ñuc ti' tojlel a pi'ʌlob. Mi caj a t'uchtan a contrajob. A pi'ʌlob mi caj i c'uchchocoñob i bʌ ba' añet. 9Judá, wola' p'ʌtan che' bajche' i yal bajlum. Calobil, tsa' ch'ojyiyet majlel che' bʌ tsa' ujti a jisan a chucbal. Tsa' lutsle a chijtan a we'el che' bajche' bajlum, che' bajche' i ña'al bajlum. ¿Majqui yom i lon ñijcan ch'ojyel? 10Judá, ma'anic mi caj a chilbentel jini bastón, i yejtal bʌ a yumʌntel. Ti pejtelel ora mi caj i cha'len yumʌl a p'olbal jinto mi' tilel Siloh jini mero yumʌl bʌ. Mi caj i yumañetob pejtel winicob x'ixicob. 11Mi' tsʌy cʌch i yal burro ti wen bʌ ac', ya' ti ts'usubil, mi' wuts' i pislel ti vino yilal, mi' wuts' i bujc ti' ya'lel ts'usub yilal. 12An cabʌl vino yic'ot leche cha'an mi' japob pejtel winicob x'ixicob.
13Zabulón mi caj i chumtʌl ti' ti' colem ñajb, ba' mi' tilel barco tac. Ya' jaxʌl i cayajon Zabulón lʌc'ʌl ti Sidón.
14Lajalʌch Isacar bajche' p'ʌtʌl bʌ burro mu' bʌ i yajñel yic'ot tiñʌme'. 15Mi caj i taj uts'at bʌ lum cha'an mi' c'aj i yo. I t'ojol jax mi caj i q'uel jini lum. Mi' caj ti wutstʌl cha'an mi' tejchel yic'ot i cuch. Mi caj i yʌc' i bʌ ti wersa e'tel.
16Dan mi caj i mel chuqui toj ti' tojlel i pi'ʌlob. Junmojt i pi'ʌl bʌ junlujunmojt israelob. 17La' i tic'lan winicob che' bajche' lucum ti' t'ejl bij, che' bajche' jontol bʌ lucum ti alʌbij, mu' bʌ i c'uxben i tun'oc caballo, cha'an mi' yajlel jini c'ʌchʌl bʌ. 18C Yum, wolic pijtañet jinto ma' coltañon.
19Jixcu Gad, cabʌl winicob mi caj i contrajiñob. Pero Gad mi caj i t'uchtañob. 20Jixcu Aser, wen uts'at i bʌl i ñʌc'. Mi caj i yʌq'ueñob reyob sumuc bʌ i bʌl ñʌc'ʌl. 21Neftalí lajalʌch bajche' me' tsa' bʌ coli che' chucbilix. Yujil uts bʌ t'an.
22José lajalʌch bajche' te' mu' bʌ i yʌc' cabʌl i wut, che' bajche' colem ac' am bʌ ti' t'ejl cuxul bʌ ja'. Tsa'ix pam coli i ña'al ac' ya' ti ts'ajc. 23Jini yujilo' bʌ julbʌl ti jalʌjb wen p'umpun jax mi caj i tic'lañob José yic'ot i p'olbal. Mi caj i ñopob i jul, mi caj i contrajiñob. 24Ma'anic mi caj i jilel i p'ʌtʌlel i jalʌjb José. Mi caj i p'ʌtesʌntel i tojel i c'ʌb, cha'an ti' c'ʌb Dios, jini P'ʌtʌl Bʌ i Dios Jacob. Ch'oyol i p'ʌtʌlel José ti jini Xcʌnta Tiñʌme', jini Xajlel ac'bil bʌ ti' tojlel Israel. 25Jiñʌch i Dios a tat mu' bʌ caj i coltañet. Jiñʌch Mach bʌ Anic i P'isol i P'ʌtʌlel, mu' bʌ caj i yʌq'ueñet a wenlel. La' i yʌq'ueñet a wenlel tilem bʌ ti panchan yic'ot a wenlel tilem bʌ ti ja' loq'uem bʌ ti mal lum, yic'ot i wenlel a wijñam cha'an mi' tilel a p'olbal, yic'ot i ya'lel i chu' cha'an mi' tsu'san a walobilob. 26Ñumen cabʌl a wenlel mu' bʌ i yʌq'ueñet Dios bajche' i wenlel c ñojte'el. Jiñʌch a wenlel tac mu' bʌ caj i c'ʌlʌl c'otel ti bujtʌl tac xuc'ul bʌ ti pejtelel ora. Jiñʌch i wenlel mu' bʌ caj i yʌq'uentel José jini ñuc bʌ yumʌl ti' tojlel i yʌscuñob.
27P'ʌtʌl Benjamín ti guerra che' bajche' mate'el ts'i' mu' bʌ i chuc i bʌl i ñʌc'. Che' ti sʌc'ajel mux i c'ux chucbil bʌ we'elʌl. Che' ti ic'ajel mux i t'ox chuqui tsi' taja, che'en Jacob.
Tsa' chʌmi Jacob, tsa' mujqui
28Jiñobʌch lajchʌnmojt i p'olbal Israel. Jiñʌch i t'an i tat che' bʌ tsi' yʌq'ueyob i yutslel i t'an. Ti jujuntiquil tsi' yʌq'ueyob i t'an che' bajche' yom. 29Jacob tsi' yʌq'ueyob mandar. Tsi' yʌlʌ: Mi caj c pʌjyel majlel ba'an c pi'ʌlob tsa' bʌ chʌmiyob. Yom mi la' mucon ba'an c ñojte'el ya' ti ch'en am bʌ ti jamil tsa' bʌ i choño Efrón jini heteo. 30Jiñʌch ch'en am bʌ ti jamil i c'aba' Macpela ya' ti' tojel Mamre ti' lumal Canaán. Abraham tsi' mʌñʌ jini jamil cha'an mucoñibʌl. Tsi' yʌq'ue i tojol Efrón jini heteo. 31Ya' tsi' mucuyob Abraham yic'ot Sara i yijñam. Ya' tsi' mucuyob Isaac yic'ot Rebeca i yijñam. Ya'i tsac mucu Lea ja'el. 32Jiñʌch jini jamil yic'ot ch'en tsa' bʌ i mʌñʌ c tatuch ti' tojlel i yalobilob Het, che'en. 33Jacob tsa' ujti i yʌq'ueñob mandar i yalobilob. Tsi' c'ʌcchoco i yoc ti' wʌyib. Tsa' chʌmi. Tsa' pʌjyi majlel ba'an i ñojte'elob.
Currently Selected:
GENESIS 49: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.