GENESIS 47
47
1José tsa' majli ba'an Faraón. Tsi' sube: Julemobix c tat yic'ot cʌscuñob yic'ot tiñʌme' tac yic'ot alʌc'ʌl tac yic'ot pejtelel i chubʌ'an loq'uemo' bʌ ti' lumal Canaán. Añobix ti' lumal Gosén. 2José tsi' yajca jo'tiquil i yʌscuñob. Tsi' pʌsbeyob Faraón. 3Faraón tsi' subeyob: ¿Chuqui la' we'tel? che'en. Tsi' subeyob Faraón: A winicon lojon. Xcʌntayajon lojon cha'an alʌc'ʌl, joñon lojon quic'ot c tat lojon, che'ob. 4Tsi' subeyob ja'el: Talon lojon ti poj chumtʌl lojon ti a lumal, come ma'anic lojon c jamil cha'an c tiñʌme' tac, come tsʌts jini wi'ñal ti' lumal Canaán. A winicon lojon. A wocolic la' chumlecon lojon ti' lumal Gosén, che'ob.
5-6Faraón tsi' sube José: Wʌ'an i lumal Egipto ti' tojel a wut. La' majlicob ti chumtʌl a tat yic'ot a wʌscuñob ba' mero wen jini lum. La' chumlecob ti' lumal Gosén. Mi cʌñʌl a cha'an p'ip' bʌ i pusic'al winicob ti' tojlelob, aq'ueñob i ch'ʌmob jini cʌlac' ti' wenta, che'en.
7José tsi' pʌyʌ ochel Jacob i tat. Tsi' yʌc'ʌ ti cʌjñel ti' tojlel Faraón. Jacob tsi' yʌc'ʌ Faraón ti' wenta Dios cha'an mi' cʌntʌntel. 8Faraón tsi' c'ajtibe Jacob: ¿Jayp'ejlix a jabilel ti pañimil? che'en. 9Jacob tsi' sube: Anix lujump'ejl i wucc'al (130) c jabilel. Xñumelon ti pañimil. Mach cabʌlic c jabilel. Cabʌl c wocol. Ma'anic tsac tajbe i jabilel c ñojte'el jal bʌ tsa' ñumiyob ti pañimil, che'en. 10Jacob tsi' yʌc'ʌ Faraón ti' wenta Dios cha'an mi' cʌntʌntel. Tsa' loq'ui ti' tojlel Faraón.
11José tsi' yotsa ti chumtʌl ya' ti Egipto i tat yic'ot i yʌscuñob. Tsi' yʌq'ueyob lum ya' ti mero wen bʌ lum, ti' lumal Ramesés che' bajche' tsi' yʌlʌ Faraón. 12Tsi' yʌq'ueyob i bʌl i ñʌc i tat yic'ot i yʌscuñob yic'ot jini año' bʌ ti' wenta i tat ti pejtelelob che' bajche' jaytiquil añob. Tsi' yʌq'ueyob waj.
13Ma'anic waj ti pejtelel jini lum, come wen woliyob ti wi'ñal jini egiptojob yic'ot cananeojob. Tsa' c'uñ'ayob cha'an wi'ñal. 14José tsi' ch'ʌmʌ pejtelel jini taq'uin am bʌ ti' lumal Egipto yic'ot ti' lumal Canaán i tojol jini trigo tsa' bʌ i mʌñʌyob. Tsi' ch'ʌmʌ ochel ti' yotot Faraón. 15Che' bʌ tsa' laj jili i taq'uin egiptojob yic'ot cananeojob tsa' tiliyob ba'an José pejtel egiptojob. Tsi' yʌlʌyob: Aq'ueñon i bʌl lojon c ñʌc'. Mach yomic mic chʌmel lojon ti wi'ñal ti a tojlel anquese laj jilemix jini taq'uin, che'ob.
16José tsi' yʌlʌ: Aq'ueñon la' wʌlac'. Mij q'uex ti waj, che' laj jilemix la' taq'uin, che'en. 17Jini cha'an tsi' pʌyʌyob tilel i yʌlac' ba'an José. José tsi' yʌq'ueyob i bʌl i ñʌc'. Tsi' tojoyob ti caballo, ti tiñʌme', ti burro, yic'ot ti yambʌ alʌc'ʌl tac. Tsi' yʌq'ueyob i bʌl i ñʌc' ti' q'uexol i yʌlac' jump'ejl jab.
18Ti' tejchibal yambʌ jab, tsa' cha' tiliyob ba'an José. Tsi' subeyob: Yom ma' ña'tan c yum, laj jilemix c taq'uin lojon. A cha'añʌch pejtel cʌlac' lojon. Ma'anix lojon c chubʌ'an, jini jach c bʌc'tal lojon yic'ot c lum lojon. 19¿Yom ba mic chʌmel lojon ti wi'ñal che' cuxulet? ¿Yom ba jochol mi' cʌytʌl c lum lojon? Mach yomic. Mʌñʌyon lojon yic'ot c lum cha'an i tojol lojon c waj. Che' jini i cha'añon lojon Faraón yic'ot c lum. Aq'ueñon lojon c pac' cha'an mic pʌc' che' cuxulon to lojon ame chʌmicon lojon, ame jilic i c'ʌjñibal jini lum, che'ob.
20Jini cha'an José tsi' mʌmbe Faraón pejtelel i lumal Egipto. Jini egiptojob tsi' chombeyob i lum ti jujuntiquil, come wen tsʌts jini wi'ñal woli bʌ ti ñumel ti' tojlelob. Jini cha'an jini lum tsa' ochi ti' wenta Faraón. 21José tsi' pʌyʌ loq'uel pejtel winicob x'ixicob ti xchumtʌl tac ti pejtelel Egipto. Tsi' chocoyob majlel ti chumtʌl ti tejclum tac. 22Cojach i lum motomajob ma'anic tsi' mʌñʌ, come Faraón tsi' yʌq'ueyob waj. Tsi' c'uxuyob i bʌl i ñʌc' ti chejachi. Jini cha'an ma'anic tsi' choñoyob i lum.
23José tsi' subeyob winicob x'ixicob: La' wilan, mʌmbiletixla c cha'an, jatetla, yic'ot la' lum. I cha'añetla Faraón. Umba'an la' pac'. Mux caj la' cha'len pac' ti lum. 24Che' ti yorajlel c'ajbal mi caj la' wʌq'uen Faraón junlujch trigo loq'uem bʌ ti jo'lujch. Chʌnlujch la' cha'añʌch cha'an la' pac' yic'ot cha'an i bʌl la' ñʌc'. La' cha'añʌch cha'an mi la' c'ux yic'ot la' pi'ʌlob yic'ot la' walobilob, che'en José. 25Tsi' yʌlʌyob: Tsa' coltayon lojon. La' c taj lojon i yutslel a pusic'al, c yum. I winicon lojon Faraón. 26José tsi' mele ley. C'ʌlʌl ti ili ora leyʌch ti' lumal Egipto. I cha'añʌch Faraón i wut pʌc'ʌbʌl. Mi' yʌq'uentel Faraón jump'is ti jo'p'is. Cojach i lum motomajob mach i cha'anic Faraón.
27Tsa' chumle Israel ti' lumal Egipto ya' ti lum i c'aba' Gosén. Tsi' tajayob i chubʌ'an ya'i. Tsa' p'ojliyob i yalobilob. Tsa' wen p'ojliyob. 28Wuclujump'ejl (17) jab tsa' chumle Jacob ti' lumal Egipto. Añob wucp'ejl i waxʌcc'al (147) i jabilel Jacob ti pejtelel.
29Tsa' tili i yorajlel che' mach jalix mi' chʌmel Israel. Tsi' pʌyʌ tilel José i yalobil. Israel tsi' sube: Mi c'ux ma' wubiñon mele che' bajche' mic subeñet cha'an ma' pʌsbeñon i yutslel yic'ot i xuc'tilel a pusic'al. A wocolic mach a mucon ti Egipto. 30Com c mujquel ya' ba' tsa' mujqui c ñojte'elob. Yom ma' q'uechon loq'uel ti Egipto. Yom ma' mucon ti mucoñibʌl ba'an c tatob, che'en Israel. José tsi' jac'ʌ: Mi caj c mel che' bajche' tsa' wʌlʌ, che'en. 31Israel tsi' yʌlʌ: Yom ma' wersa aq'ueñon a t'an, che'en. José tsi' wersa aq'ue i t'an. Che' jini Israel tsi' c'uchchoco i bʌ ya' ti' jol i wʌyib cha'an mi' ch'ujutesan Dios.
Currently Selected:
GENESIS 47: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.