GENESIS 20
20
Abraham yic'ot Abimelec
1Tsa' loq'ui Abraham ya'i. Tsa' majli c'ʌlʌ ti lum am bʌ ti sur. Tsa' poj chumle ti Gerar xinlʌpʌl ti ojlil Cades yic'ot Shur. 2Abraham tsi' yʌlʌ: Jiñʌch quijti'an jini Sara, che'en, anquese i yijñamʌch. Abimelec jini rey ti Gerar tsi' choco majlel i winic. Tsi' pʌyʌ Sara. 3Pero Dios tsi' sube Abimelec ti ñajal che' ti ac'ʌlel: Awilan, mi caj a chʌmel cha'an jini x'ixic tsa' bʌ a pʌyʌ, come i yijñamʌch winic. 4Abimelec ma'anic tsi' ñochta jini x'ixic. Tsi' yʌlʌ: C Yum, ¿mu' ba a tsʌnsan winicob x'ixicob mach bʌ anic i mul? 5¿Mach ba anic tsi' yʌlʌ jiñʌch i yijti'an? Jini x'ixic ja'el tsabi yʌlʌ cʌscuñʌch ili winic. Ti' yutslel c pusic'al tsac pʌyʌ. Ma'anic c mul yubil, che'en Abimelec. 6Dios tsi' sube Abimelec ti ñajal: Isujm, cujil uts'at a pusic'al che' bʌ tsa' pʌyʌ. Joñon ja'el tsac mʌctayet ame ma' cha'len mulil tij contra. Jini cha'an tsac tiq'uiyet ame a ñochtan jini x'ixic. 7Wʌle yomix ma' cha' aq'uen i yijñam jini winic, come x'alt'añʌch. Mi caj i mel oración cha'an ma'anic ma' chʌmel. Mi ma'anic ma' cha' aq'uen i yijñam, mux caj a wersa chʌmel yic'ot pejtel a cha'año' bʌ, che'en Dios.
8Jini cha'an Abimelec seb to tsa' ch'ojyi ti sʌc'ajel. Tsi' pʌyʌ tilel pejtel i winicob. Tsi' subeyob pejtel iliyi. Tsa' wen cajiyob ti bʌq'uen jini winicob. 9-10Abimelec tsi' pʌyʌ tilel Abraham. Tsi' sube: ¿Chucoch tsa' lotiyon? Ma'anic chuqui tsac tumbeyet. ¿Chucoch ma' lon aq'ueñon lojon c taj ñuc bʌ c mul joñon quic'ot jini año' bʌ tic lumal? Mach wenic bajche' tsa' melbeyon. ¿Mach ba anic a pusic'al? ¿Chucoch che'ʌch tsa' mele bajche' iliyi? che'en Abimelec. 11Abraham tsi' yʌlʌ: Tsac cha'le iliyi come tsac ña'ta ma'anic i bʌc'ñʌntel Dios ilayi. Tsa cʌlʌ mux caj i tsʌnsañoñob a winicob cha'an quijñam. Che'ʌch tsac lon ña'ta. 12Jiñʌch mero quijti'an, come i yalobil c tat pero mach i yalobilic c ña'. Tsac pʌyʌ cha'an quijñam. 13Che' bʌ Dios tsi' subeyon loq'uel ti' yotot c tat cha'an mic majlel ti xʌmbal, tsac sube quijñam: “Yom ma' pʌsbeñon i yutslel a pusic'al. Ti jujump'ejl tejclum ba' mi caj laj c'otel yom ma' sub: Cʌscuñʌch ili winic, che' yom ma' wʌl”, cho'on tsac sube. Che' tsi' yʌlʌ Abraham. 14Abimelec tsi' pʌyʌ tilel tiñʌme' yic'ot wacax yic'ot i mozojob yic'ot criadajob. Tsi' yʌq'ueyob Abraham. Tsa' cha' aq'uenti Abraham Sara i yijñam. 15Abimelec tsi' yʌlʌ: Awilan, wʌ'ʌch an c lumal ti a tojel. Yom ma' chumtʌl baqui jach a wom, che'en. 16Tsi' sube Sara: Awilan, tsa cʌq'ue a wʌscun jump'ejl mil taq'uin melbil bʌ ti plata. Jiñʌch i tojol mi an c mul ti' tojlel pejtel año' bʌ a wic'ot. Toj'esʌbiletix ti' wut pejtelelob, che'en Abimelec. Che'ʌch tsa' ujti. 17Abraham tsi' pejca Dios ti oración. Dios tsi' lajmesa Abimelec. Tsi' lajmesa ja'el i yijñam Abimelec yic'ot criadajob. Che' jini tsa' mejli i cha' cʌntañob i yalobil. 18Come lac Yum ma'anic tsi' yʌq'ueyob i cʌntan i yalobilob jini x'ixicob año bʌ ti' yotot Abimelec che' bʌ ya'to an Sara i yijñam Abraham.
Currently Selected:
GENESIS 20: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.