GENESIS 16
16
Agar yic'ot Ismael
1Ma'anic i yalobil Sarai, i yijñam Abram. An i criada i c'aba' Agar, ch'oyol bʌ ti Egipto. 2Sarai tsi' sube Abram: Awilan, lac Yum tsi' yotsayon ti to'ol wa'al jach bʌ x'ixic. Yom ma' pi'len jini criada c cha'an. Tic'ʌl mi mejlel c taj calobil ti Agar. Che' tsi' yʌlʌ Sarai. Abram tsi' jac'be i t'an Sarai. 3Lujump'ejlix jab ya' chumul Abram ti' lumal Canaán. Sarai, i yijñam Abram, tsi' pʌyʌ Agar jini i criada ch'oyol bʌ ti Egipto. Sarai tsi' yʌq'ue Abram cha'an i pi'ʌl. 4Abram tsi' pi'le Agar. Tsa' caji i cʌntan i yalobil. Che' bʌ tsi' ña'ta woli' cʌntan i yalobil, tsa' caji' ts'a'len jini Sarai i co'. 5Sarai tsi' sube Abram: La' ochic ti a wenta ili wocol woli bʌ cubin. Tsa cʌq'ueyet Agar jini criada cha'an ma' pi'len. Che' bʌ tsi' q'uele cʌntʌbilix i yalobil, tsa' caji' ts'a'leñon. La' i melonla lac Yum, che'en Sarai. 6Abram tsi' sube Sarai: Awilan, a criadajʌch. Añʌch ti a wenta. Melben chuqui a wom, che'en Abram. Tsʌts tsi' pejca Sarai. Tsi' yʌc'ʌ ti wocol. Agar tsa' puts'i loq'uel ti' tojlel Sarai.
7I yángel lac Yum tsi' taja Agar ba'an cuxul bʌ ja' ti jochol bʌ lum, jini cuxul bʌ ja' am bʌ ti' bijlel Shur. 8Tsi' yʌlʌ: Agar, i criada Sarai, ¿baqui tsa' tiliyet? ¿Baqui ma' majlel? che'en. Agar tsi' yʌlʌ: Wolic puts'tan j co' Sarai, che'en. 9-10I yángel lac Yum tsi' sube: Cha' cucu ba'an a co'. Ac'ʌ a bʌ ti' wenta. Mi caj c wen p'ojlesan a walobil c'ʌlʌl mach tsicbilic cha'an cabʌlob, che'en. 11I yángel lac Yum tsi' sube ja'el: Awilan, cʌntʌbil a walobil. Mi caj a wʌc' ti pañimil ch'iton. Mi caj a wotsʌben i c'aba' Ismael, come lac Yum tsi' q'uele a wocol. 12Ch'ejl che' bajche' ch'ejl bʌ burro mi caj i pʌs i bʌ ili winic. Mi caj i contrajin pejtel winicob. Pejtel winicob mi caj i contrajiñob ja'el. Tʌts'ʌl ba'an i pi'ʌlob mi' caj ti chumtʌl. Che' tsi' yʌlʌ i yángel lac Yum. 13Agar tsi' yotsʌbe i c'aba' lac Yum tsa' bʌ i pejca: Dios Yujil bʌ Q'uelojel, che'en, come tsi' yʌlʌ: Joñon ja'el tsaj q'uele Dios, che'en. 14Jini cha'an tsi' yotsʌbe i c'aba' jini pozo Jini Cuxul Bʌ Mu' bʌ i Q'uelon. Xinlʌpʌl an ti ojlil Cades yic'ot Bered.
15Agar tsi' yʌq'ue Abram ch'iton bʌ i yalobil. Abram tsi' yotsʌbe i c'aba' Ismael. 16Wʌcp'ejlix i jo'c'al (86) i jabil Abram che' bʌ tsi' yila pañimil Ismael i yalobil Abram yic'ot Agar.
Currently Selected:
GENESIS 16: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.