EZEQUIEL 12
12
Ezequiel tsi' tsictesa bajche' mi caj i cʌjchelob majlel
1Tsa' tili i t'an lac Yum ba' añon: 2I yalobil winic, wʌ' chumulet ti' tojlel xñusa t'añob. Añob i wut, pero ma'anic mi' c'otel. Añob i chiquin, pero ma'anic mi' yubiñob 3come laj xñusa t'añob. Jini cha'an i yalobil winic, yom ma' chajpan a chubʌ'an cha'an ma' ch'ʌm majlel a wic'ot che' cʌchʌl ma' majlel ti yambʌ lum. La' i q'ueletob a pi'ʌlob che' ma' majlel. Yom ma' pam ñumel ti jujump'ejl lum che' bajche' jini cʌchʌlo' bʌ. Tic'ʌl mi che' mi' q'ueletob, mi caj i ch'ʌmbeñob isujm anquese xñusa t'añob. 4Ti q'uiñil che' cañal i wut che' woli' q'ueletob, yom ma' ch'ʌm majlel a chubʌ'an che' bajche' xcʌjchelob. Ti ic'ajel la' i q'ueletob pejtelel winicob che' lujbeñet cha'an al bʌ a cuch yic'ot wocol. 5La' i q'ueletob che' ma' toc jini ts'ajc cha'an ma' loq'uel ba' tocol. 6La' i q'ueletob che' ma' cuch majlel a chubʌ'an ti ac'ʌlel. Yom ma' lich mos a wut cha'an ma'anic ma' q'uel ba' ma' majlel, come jiñʌch i yejtal bajche' mi caj i majlelob jini israelob. Che' tsi' subeyon lac Yum.
7Jini cha'an che'ʌch tsac lu' mele che' bajche' tsi' subeyon lac Yum. Tsac loc'sa c chubʌ'an ti q'uiñil cha'an mic wersa pʌjyel majlel. Che' ti ac'ʌlel tsa' c'unte' caji c toc jini ts'ajc. Che' ac'ʌlelix tsa' loq'uiyon majlel. Tsaj q'ueche loq'uel c chubʌ'an ti' wut pejtelel winicob. 8Ti yijc'ʌlal tsa' tili i t'an lac Yum ba' añon: 9I yalobil winic, jini xñusa t'añob ti Israel woli' c'ajtiñob isujmlel pejtelel woli bʌ a mel. 10Subeñob ili t'an: “Lac Yum Dios woli' yʌl: Jini woli bʌ la' q'uel i yejtalʌch bajche' mi caj i pʌjyel majlel ti wocol jini rey Sedequías yic'ot pejtelel jini ya' bʌ chumulob ti Jerusalén. 11Che' bajche' wolic mel, che'ʌch mi caj la' wujtel. Cʌchʌl mi caj la' pʌjyel majlel ti ñajt bʌ pañimil.
12Sedequías, jini ñuc bʌ yumʌl i cha'añob, mi caj i q'uech loq'uel i chubʌ'an che' ti ac'ʌlel. Wocol mi caj i loq'uel majlel ba' tocol jini ts'ajc. Muq'uix i mos i wut che' mi' loq'uel, come ma'anix mi caj i chʌn q'uel pañimil. 13Mi caj c chuc che' bajche' ti yac. Cʌchʌl mi caj c pʌy majlel ti Babilonia ti' lumal jini caldeojob, pero ma'anic mi caj i q'uel jini lum. Ya'i mi caj i chʌmel. 14Pejtelel i winicob, i yaj cʌntayajob yic'ot soldadojob, mi caj c pam pucob ti pejtelel pañimil. Mi caj cajñesañob ti guerra. 15Ti jim bʌ ora mi caj i ña'tañob i Yumon che' pam pujquemobix ti yan tac bʌ lum. 16Pero mi caj j coltan lamital ame laj jisʌnticob yic'ot espada, yic'ot wi'ñal, yic'ot jontol bʌ c'amʌjel. Jini mu' to bʌ i cʌytʌlob mi caj i cha' ña'tañob pejtelel i jontolil come i Yumoñʌch”. Che' yom ma' subeñob. Che' tsi' yʌlʌ lac Yum.
17Tsa' cha' tili i t'an lac Yum ba' añon: 18I yalobil winic, c'uxu a waj yic'ot bʌq'uen. Tsiltsilña mi caj a jap ja'. 19Subeñob jini wʌ' bʌ chumulob: “Woli' yʌl lac Yum i Dios jini año' bʌ ti Jerusalén yic'ot ti Israel: Mi caj i c'uxob i waj yic'ot bʌq'uen. Tsiltsilñayob mi caj i japob ja', come mi caj i jilel pejtel i wenlel i lumal cha'an i jontolil jini wʌ' bʌ chumulob. 20Jochocña mi caj i cʌytʌl pejtelel la' tejclum tac, yic'ot pejtelel la' lumal. Mi caj la' ña'tan la' Yumon”. Che' tsi' yʌlʌ lac Yum.
21Tsa' cha' tili i t'an lac Yum ba' añon. 22I yalobil winic, ¿chuqui isujmlel jini t'an mu' bʌ i yʌlob: “Woli' ñumel q'uin tac, pero ¿bacan tsiquil chuqui woli' lon alob x'alt'añob?” che'ob. 23Jini cha'an subeñob: “Lac Yum Dios woli' yʌl: Mi caj cʌc' ti ñajʌyel ili t'an. Ma'anix ba' ora mi' cajel ti chʌn ajlel, come tsa' c'oti i yorajlel che' mi caj i lu' ts'ʌctiyel che' bajche' tsa cʌlʌ. 24Jini xlot bʌ x'alt'añob ma'anix mi caj i chʌn tijicñesʌbeñob i pusic'al israelob yic'ot i lot. Ma'anic mi caj i to'ol jilel i t'an c winicob ja'el. 25Come Yumʌlon. Pejtelel chuqui mic sub mi' caj ti ts'ʌctiyel. Mach jalix mi caj i yujtel, come wersa mi' yujtel che' cuxulet to la. Ti' caj la' jontolil mi caj i tilel jini wocol ti la' tojlel”, che'en lac Yum Dios.
26Tsa' tili i t'an lac Yum ba' añon: 27I yalobil winic, woli to i yʌlob jini israelob: “Jal to mi' caj ti ujtel jini woli bʌ i tsictesan. Woli jax to i wʌn tsictesan chuqui mi caj i yujtel ti' jilibal pañimil”, lon che'ob. 28Jini cha'an subeñob ili t'an: “Lac Yum Dios woli' yʌl: Mach jalix mi' caj ti ujtel pejtelel chuqui tsac subeyetla. Wersa mi' caj ti ts'ʌctiyel”, che'en. Jiñʌch i t'an lac Yum Dios.
Currently Selected:
EZEQUIEL 12: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.