EZEQUIEL 10
10
Tsa' loq'ui i ñuclel lac Yum ya' ti Templo
1Ti wi'il tsaj q'uele ya' ti panchan ti' chañelal i jol jini querubiñob tsa' bʌc' tsictiyi che' bajche' jump'ejl zafiro bʌ xajlel, lajal bʌ bajche' i buchlib rey. 2Lac Yum tsi' sube jini lʌpbil bʌ i cha'an lino bʌ i pislel: Ochen ti' tojlel jini xotol tac bʌ woli bʌ ti wijlel ya' ti' yebal jini querubiñob. Yom ma' much'ye' i nich c'ajc am bʌ ti yojlilob cha'an ma' pam puc ya' ti tejclum, che'en. Tsaj q'uele che' bʌ tsa' majli.
3Che' bʌ tsa' ochi jini winic, ya' añob jini querubiñob ti' tojel Templo ti sur. Jini patio am bʌ ti mal tsa' bujt'i ti' ñuclel lac Yum. 4I ñuclel lac Yum tsa' letsi ya' ti' pam jini querubiñob. Tsa' majli ti' ti' Templo. Tsa' bujt'i jini Templo yic'ot i patiojlel ti' ñuclel lac Yum. Sʌcjaman tsa' majli cha'an ti' ñuclel lac Yum. 5Ñajtʌ tsiquil ya' ti patio ti jumpat, leslesña i wich' jini querubiñob. Lajalʌch yubil i t'an che' bajche' i t'an jini Ñuc bʌ Dios che' mi' cha'len t'an.
6Che' bʌ tsa' subenti jini lʌpbil bʌ i cha'an lino bʌ i pislel: Ch'ʌmʌ tilel i nich c'ajc am bʌ ti' tojlel jini selel tac bʌ woli bʌ ti wijlel ya' ti' yojlil jini querubiñob, che'en, tsa' ochi majlel. Tsa' wa'le ya' ba'an junsejl. 7Juntiquil querubín tsi' sʌts'choco i c'ʌb ba'an jini c'ajc am bʌ ti ojlil. Tsi' yʌc'ʌ ti' c'ʌb jini lʌpbil bʌ i cha'an lino bʌ i pislel. Che' bʌ tsi' ch'ʌmʌ, tsa' loq'ui majlel. 8Lajal yilal i c'ʌb jini querubiñob ti' yebal i wich' che' bajche' i c'ʌb winic.
9Che' jini tsaj q'uele ya'an chʌnsejl jini tsucu taq'uin ti' t'ejl jini querubiñob, junsejl ti jujunwejlob. Yʌxxowan jini selel bʌ tsucu taq'uin. 10Junlajal jach ti q'uelol jini selel bʌ tsucu taq'uin, xinlʌpʌl yic'ot jini yambʌ. 11Che' bʌ tsi' cha'leyob xʌmbal, junlajal tsoltsolñayob tsa' majliyob. Ma'anic tsi' sutq'uiyob i bʌ che' bʌ tsi' cha'leyob xʌmbal. Ya' ba' tsa' majli jini ñaxan bʌ, ya' tsa' laj majliyob ti' tojel i wut. Ma'anic tsi' ts'ejeyob i bʌ che' bʌ tsa' majliyob yic'ot che' bʌ tsa' sujtiyob. 12Ti pejtelel i cuctal, jini i pat, i c'ʌb, i wich', yic'ot jini selel tac bʌ tsa' bʌ i pi'leyob majlel, laj an i wut. 13Che' bʌ ya' añon tsa cubi tsa' pejcʌnti jini selel tac bʌ ti P'ʌtʌl bʌ Ic'. 14Ti jujuntiquil jelchojc tacob i wut jini querubiñob. Jini ñaxan bʌ lajal che' bajche' i wut querubín, i cha'p'ejlel bʌ lajalʌch bajche' i wut winic, i yuxp'ejlel bʌ lajalʌch bajche' i wut bajlum, i chʌmp'ejlel bʌ lajalʌch bajche' i wut xiye'.
15Tsaj q'uele jini querubiñob. Jiñobʌch tsa' bʌ j q'uele ya' ti' ti' jini ñoja' i c'aba' Quebar. 16Che' bʌ tsi' cha'leyob xʌmbal tsi' cha'leyob xʌmbal ja'el jini selel tac bʌ tsucu taq'uin. Che' bʌ tsi' letsayob i wich' jini querubiñob cha'an mi' wejlelob letsel, ya' ts'uyucña tsa' majliyob jini selel tac bʌ tsucu taq'uin. 17Che' bʌ tsa' wa'leyob jini querubiñob, jini selel bʌ tsucu taq'uin tsa' wa'le ja'el. Che' bʌ tsi' ch'uyuyob i bʌ jini querubiñob, tsi' ch'uyuyob i bʌ ja'el jini selel tac bʌ tsucu taq'uin, come ya'an i ch'ujlel jini querubiñob ti jini selel tac bʌ.
18I ñuclel lac Yum tsi' cʌyʌ i ti' Templo. Tsa' c'oti ti' pam jini querubiñob. 19Che' bʌ tsaj q'ueleyob, tsi' tich'iyob i wich'. Tsa' wejliyob letsel yic'ot jini selel bʌ tsucu taq'uin ya' ti' t'ejl. Tsa' c'otiyob ti wa'tʌl ya' ti' ti' Templo ti' tojel i pasibal q'uin. Ya'an i ñuclel lac Yum i Dios Israel ti' pam jini querubiñob.
20Jiñʌch tsa' bʌ j q'uele ti' yebal i Dios Israel, ya' ti' ti' ñoja' i c'aba' Quebar. Tsac ña'ta jiñob jach bʌ. 21Ti jujuntiquil an chʌnchʌmp'ejl i wut yic'ot chʌnchʌnq'uejl i wich'. Ya' ti' yebal i wich' an che' bajche' i c'ʌb winicob. 22Lajalob i wut bajche' jini tsa' bʌ j q'uele ya' ti' ti' ñoja' i c'aba' Quebar. Toj jach ja'el tsi' cha'leyob xʌmbal ti' tojel i wut.
Currently Selected:
EZEQUIEL 10: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.