EXODO 8
8
I tic'lʌntelob ti xpequejc
1Lac Yum tsi' sube Moisés: Cucu ba'an Faraón. Suben: “Lac Yum woli' yʌl: La' majlicob winicob x'ixicob c cha'año' bʌ cha'an mi' ch'ujutesañoñob. 2Mi ma'anic ma' wʌq'ueñob permiso cha'an mi' majlelob, mi caj c tic'lan pejtel a lumal ti xpequejc. 3Wen p'ulucña mi caj i yajñel xpequejc ti Nilo. Mi caj i yochel ti a wotot yic'ot ba' ma' wʌyel, yic'ot ti' yotot tac a mozojob, yic'ot ti' yotot pejtel año' bʌ ti Egipto. Mi caj i yochelob ti horno yic'ot ya' ba' ma' mel a waj. 4Jini xpequejc mi caj i letsel tac ti a cuctal yic'ot ti' cuctal a pi'ʌlob”. Che' yom ma' suben Faraón, che'en lac Yum.
5Lac Yum tsi' sube Moisés: Suben Aarón: “Sʌts'ʌ a te' ti' pam jini ja' yic'ot i xʌc' tac ja' yic'ot ti' pam lʌmʌl tac bʌ ja'. Pʌyʌ tilel xpequejc ti pejtelel i lumal Egipto”, che'en. 6Che' jini Aarón tsi' sʌts'ʌ i c'ʌb ti' pam ja' am bʌ ti Egipto. Tsa' pam p'ojli xpequejc ti' lumal Egipto. 7Pero lajal tsi' meleyob xwujtob yic'ot mucul bʌ i ña'tʌbal. Tsi' pʌyʌyob tilel xpequejc ti' lumal Egipto.
8Faraón tsi' pʌyʌ tilel Moisés yic'ot Aarón. Tsi' subeyob: C'ajtiben la' Yum cha'an mi' cha' loc'san jini xpequejc tic tojlel lojon. Mux caj c choc loq'uel a pi'ʌlob cha'an mi' majlelob i yʌq'uen tsʌnsʌbil bʌ i majtan la' Yum, che'en. 9Moisés tsi' sube Faraón: Yom ma' sub baqui ora a wom mi' tijq'uel ili wocol. Mux caj j c'ajtiben Dios cha'an mi' jisan jini xpequejc ti la' tojlel yic'ot ti la' wotot. Ya'ix mi caj i yajñel ti Nilo, che'en Moisés. 10Faraón tsi' yʌlʌ: Ijc'ʌl to yom, che'en.
Moisés tsi' yʌlʌ: La' ujtic che' bajche' ma' wʌl cha'an ma' ña'tan ma'anic majqui lajal bajche' lac Yum Dios. 11Jini xpequejc mi caj i cʌyet, mi caj i loq'uel ti a wotot tac yic'ot ti' tojlelob a winicob yic'ot a pi'ʌlob ti Egipto. Ya'ix mi caj i yajñel ti Nilo, che'en. 12Moisés yic'ot Aarón tsa' loq'uiyob ti' tojlel Faraón. Moisés tsi' pejca lac Yum ti wocol t'an cha'an mi' lajmel jini wocol cha'an xpequejc che' bajche' tsi' sube Faraón. 13Lac Yum tsi' mele che' bajche' tsi' yʌlʌ Moisés. Tsa' chʌmi tac jini xpequejc ya' ti' yotot tac yic'ot ti cholel tac. 14Tsi' much'quiyob. Tsa' wen tuw'a pañimil. 15Che' bʌ tsi' q'uele Faraón lajmenix wocol, tsa' cha' tsʌts'a i pusic'al. Ma'anic tsi' jac'beyob. Tsa' ujti che' bajche' tsi' yʌlʌ lac Yum.
I tic'lʌntelob ti uch'
16Lac Yum tsi' sube Moisés: Suben Aarón: “Sʌts'ʌ a te'. Jats'ʌ i ts'ubeñal lum cha'an mi' pʌntiyel ti uch' ti pejtelel i lumal Egipto”. Che' yom ma' suben Aarón, che'en lac Yum. 17Che'ʌch tsi' meleyob. Aarón tsi' sʌts'ʌ jini te'. Tsi' jats'ʌ i ts'ubeñal lum cha'an mi' pʌntiyel ti uch'. Tsa' caji' tic'lan winicob yic'ot alʌc'ʌl jini uch'. I ts'ubeñal lum ya' ti Egipto tsa' pʌntiyi ti uch'. 18Jini xwujtob tsa' caji' ñopob i mel ti mucul tac bʌ i ña'tibal, pero ma'anic tsa' mejliyob. Tsa' ajni uch' ti' tojlel winicob yic'ot alʌc'ʌl. 19Jini xwujtob tsi' subeyob Faraón: Jiñʌch i c'ʌb Dios, che'ob. Pero tsa' tsʌts'a i pusic'al Faraón. Ma'anic tsi' jac'beyob. Tsa' ujti che' bajche' tsi' yʌlʌ lac Yum.
I tic'lʌntelob ti jaj
20Lac Yum tsi' sube Moisés: Ch'ojyen ti sʌc'ajel. Cucu pejcan Faraón che' mi' majlel ti ja'. Suben: “Lac Yum woli yʌl: La' majlicob jini winicob x'ixicob c cha'año' bʌ cha'an mi' ch'ujutesañoñob. 21Awilan, mi ma'anic ma' chocob majlel mi caj c choc tilel jaj ti a tojlel yic'ot ti' tojlel pejtel egiptojob. Jomjomña mi caj i yochel ti la' wotot. Mi caj i pam pujquel ti lum. Mi caj i tic'lan pejtel cuxul tac bʌ. 22Ti jim bʌ ora ma'anic mi caj i tic'lʌntelob c cha'año' bʌ chumulo' bʌ ti' lumal Gosén. Ma'anic mi caj i yajñel jaj ya'i. Che' jini mi caj a ña'tan joñon Yumʌlon ti pañimil. 23Mach lajalic mi caj j q'ueletla che' bajche' c cha'año' bʌ. Ijc'ʌl mi caj a q'uel”. Che' yom ma' suben Faraón, che'en lac Yum.
24Che'ʌch tsi' cha'le lac Yum. Jomjomña tsa' c'oti jaj ti' yotot Faraón yic'ot ti' yotot tac i winicob. Tsa' asiyi i lumal egiptojob cha'an jini jaj. 25Faraón tsi' pʌyʌ tilel Moisés yic'ot Aarón. Tsi' subeyob: Cucula, aq'uenla Dios tsʌnsʌbil bʌ i majtan pero wʌ' jach yom ti ili lum, che'en. 26Pero tsi' yʌlʌ Moisés: Mach che'ic yom mic mel lojon, come che' jini mi caj i ts'a'leñon lojon egiptojob che' mi cʌq'uen lojon c Yum Dios tsʌnsʌbil bʌ i majtan. Che' mi cʌq'uen lojon Dios tsʌnsʌbil bʌ i majtan mu' bʌ i ts'a'leñob egiptojob, ¿mach ba muq'uic i julon lojon ti xajlel che' mi' q'uelon lojon? 27Wersa mic majlel lojon uxp'ejl q'uin xʌmbal ti colem bʌ i tiquiñal lum cha'an mi cʌq'uen lojon tsʌnsʌbil bʌ i majtan c Yum lojon Dios che' bajche' mi caj i subeñon lojon, che'en.
28Faraón tsi' yʌlʌ: Mi caj c choquetla majlel cha'an mi la' wʌq'uen tsʌnsʌbil bʌ i majtan la' Yum Dios ya' ti tiquin bʌ lum. Pero mach ñajtic yom. C'ajtibenla Dios cha'an mi' lajmel jini wocol tic tojlel, che'en. 29Moisés tsi' yʌlʌ: Che' mic loq'uel ti a tojlel, mi caj j c'ajtiben lac Yum cha'an ijc'ʌl mi' cʌyet jini jaj, cha'an mi' cʌy i tic'lan a pi'ʌlob ja'el. Mach yomic ma' cha'len lot. Yom ma' choc loq'uel c pi'ʌlob cha'an mi' yʌq'ueñob tsʌnsʌbil bʌ i majtan c Yum lojon, che'en. 30Moisés tsa' loq'ui ti' tojlel Faraón. Tsi' pejca lac Yum ti oración. 31Lac Yum tsi' mele che' bajche' tsi' c'ajtibe Moisés. Tsi' loc'sa jaj ti' tojlel Faraón yic'ot ti' tojlel pejtel egiptojob. Ma'anic tsa' cʌle mi juncojtic. 32Pero ti ili ora Faraón tsi' cha' tsʌts'esa i pusic'al. Ma'anic tsi' choco majlel jini winicob x'ixicob.
Currently Selected:
EXODO 8: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.