DEUTERONOMIO 9
9
Dios mi caj i chilbeñob i tejclum tac cananeojob
1Ubinla israelob: Muq'uix cajel la' c'axel ti junwejl Jordán cha'an mi la' chilbeñob i tejclum tac winicob ñumen año' bʌ yic'ot ñumen p'ʌtʌlo' bʌ bajche' jatetla. Joyolob jini tejclum tac ti chan bʌ ts'ajc. 2Colem winicob, wen chañob ja'el. I yalobilobʌch anaceojob, cʌmbilix bʌ la' cha'an. Ubibilix la' cha'an ili t'an: “¿Majqui mi mejlel i coltan i bʌ ti' tojlel jini anaceojob?” che'ob. 3Jini cha'an yomix mi la' ña'tan, jiñʌch lac Yum Dios mu' bʌ caj i coltañetla. Lajal lac Yum bajche' c'ajc yujil bʌ jisaya. Mi caj i jisañob ti la' tojlel. Mi caj i ju'sʌbeñob i pusic'al. Mi cajel la' chocob loq'uel ti lum. Mi caj la' tsʌnsañob che' bajche' tsi' subeyetla lac Yum Dios. 4Che' bʌ tsa'ix i jisa jini winicob ti la' tojlel lac Yum, mach mi la' lon al ti la' pusic'al: “Cha'an weñonla jini cha'an tsi' pʌyʌyonla tilel lac Yum ilayi ti lum”. Mach che'ic yom mi la' lon al, come lac Yum Dios woli' choc loq'uel jini tejclumob cha'an wen jontolob. 5Mach cha'anic tojetla mi cha'anic wen la' pusic'al mi caj la' wochel ti chumtʌl ti lum, pero cha'an jontolob. Jini cha'an lac Yum mi caj i chocob loq'uel ti la' tojlel cha'an mi' ts'ʌctiyel i t'an tsa' bʌ i wʌn subeyob la' ñojte'elob, Abraham yic'ot Isaac yic'ot Jacob.
Xñusa t'añob israelob ya' ti Horeb
(Éx. 31.18—32.35)
6Pero mach cha'anic ti wen bʌ la' melbal mi' yʌq'ueñetla ili lum lac Yum Dios, come wen tsʌtsatax la' pusic'al. 7Yom mi la' chʌn ña'tan. Mach ñajʌyic ti la' pusic'al. Tsa' caji ti mich' lac Yum Dios ya' ti colem bʌ i tiquiñal pañimil ti' caj la' mul. C'ʌlʌl ti' tejchibal xʌmbal che' bʌ tsa' loq'uiyetla ti' lumal Egipto, c'ʌlʌl wʌle che' c'otemetix la ti' ti' la' lumal, tsa'ix la' ñusʌbe i t'an lac Yum. 8Ya' ti Horeb tsa' la' mich'esa lac Yum. Colel i jisañetla. 9Che' bʌ tsa' letsiyon ti wits cha'an mic ch'ʌm wechel bʌ xajlel ba' ts'ijbubil i trato lac Yum tsa' bʌ i mele ti lac tojlel, tsa' jal'ayon ti wits cha'c'al q'uin yic'ot cha'c'al ac'ʌlel. Ma'anic chuqui tsac wis c'uxu, ma'anic chuqui tsac japʌ. 10Lac Yum tsi' yʌq'ueyon jini cha'q'uejl xajlel tsa' bʌ i ts'ijba ti' c'ʌb. Ts'ijbubil tac jini t'an tsa' bʌ i yʌlʌ lac Yum ya' ti' yojlil c'ajc ti pam wits che' bʌ tsa' la' tempa la' bʌ ti' yebal wits. 11Ñumenix cha'c'al q'uin yic'ot cha'c'al ac'ʌlel lac Yum tsi' yʌq'ueyon ili cha'q'uejl xajlel ba' ts'ijbubil jini xuc'ul bʌ t'an. 12Lac Yum tsi' subeyon: Cucuñun ti ora, cucux ti jubel, come tsa'ix sojquiyob jini winicob tsa' bʌ a loc'sa ti' lumal Egipto. Tsi' bʌc' cʌyʌyob jini bij tsa' bʌ c subeyob. Tsi' meleyob i dios, che'en.
13Lac Yum tsi' subeyon ja'el: Tsa'ix c wen q'uele ili winicob. Wen tsʌtsob i pusic'al. La' c melob che' bajche' an i mul. 14Tʌts'ʌ a bʌ cha'an mic jisañob. La' jilicob i c'aba' ila ti pañimil. Joñon mi caj c p'olet. Mi caj c tech ti a tojlel yaño' bʌ winicob x'ixicob, ñumen oñob, ñumen p'ʌtʌlob ja'el, che'en lac Yum. 15Jini cha'an tsa' bʌc' jubiyon ti wits. Awilan wolix ti lejmel jini wits che' bajche' c'ajc. Chucul c cha'an jini cha'q'uejl xajlel ba' ts'ijbubil i t'an lac Yum. 16Che' bʌ tsaj q'uele la' mul ti' tojlel lac Yum Dios, melbilix la' dios wacax cha'an mi la' diosin. Cʌybilix la' cha'an i bijlel lac Yum che' bajche' tsi' wʌn alʌ. 17Che' jini tsac ch'ʌmʌ jini cha'q'uejl xajlel ti cha'ts'ijt j c'ʌb. Tsac choco jubel. Tsa' laj tojp'i ti biq'uit. 18Che' jini tsac pʌcchoco c bʌ ti' tojlel lac Yum che' bajche' ti ñaxan. Tsac cha' cʌyʌ waj cha'c'al q'uin yic'ot cha'c'al ac'ʌlel cha'an ti' caj la' mul. Tsa' la' mele chuqui leco ti' wut lac Yum. Tsa' la' techbe i mich'ajel. 19Joñon tsac bʌc'ña jini tsʌts bʌ i mich'ajel lac Yum. Cujil yomix i jisañetla, pero junyajl to tsi' cha' ubibeyon c t'an ti jini q'uin. 20Lac Yum tsi' mich'le Aarón ja'el. Tsi' ña'ta i tsʌnsan. Jini cha'an tsa'ix c taja ti oración ja'el. 21Che' jini tsac ch'ʌmʌ jini wacax i yejtal bʌ la' mul, jini wacax tsa' bʌ la' mele. Tsac pulu ti c'ajc. Tsac bic'ti top'o. Much'ul tsa' cʌle che' bajche' ts'ubejn. Tsac choco i ts'ubeñal ti ja' ya' ba' woli' jubel ti wits.
22Tsa' la' cha' techbe i mich'ajel lac Yum ya' ti Tabera, yic'ot ti Masah, yic'ot ti Kibrot Hataava. 23Ya' ti Cades Barnea ja'el che' bʌ tsi' chocoyetla lac Yum, tsi' subeyetla: “Cucula ti chumtʌl ya' ti la' lum tsa' bʌ cʌq'ueyetla”, che'en. Pero ma'anic tsa' la' jac'ʌ. Tsa'ix la' ñusʌbe i t'an lac Yum Dios. Ma'anic tsa' la' ñopbe i t'an. 24Xñusa t'añetla ti' tojlel lac Yum c'ʌlʌl ti jini q'uin che' bʌ tsa' caji j cʌñetla c'ʌlʌ wʌle.
25Jini cha'an tsac cha' pʌcchoco c bʌ ti' tojlel lac Yum cha'c'al q'uin yic'ot cha'c'al ac'ʌlel, come lac Yum tsi' yʌlʌ mi caj i lu' jisañetla. 26Jini cha'an tsac pejca lac Yum ti oración: C Yum Dios, mach a jisan a cha'año' bʌ tsa' bʌ a mʌñʌ ti a ñuclel. Tsa' pʌyʌyob loq'uel ti Egipto cha'an cabʌl a p'ʌtʌlel. 27C Yum, ña'tan a winicob Abraham yic'ot Isaac yic'ot Jacob. Mach a q'uelbeñob i tsʌtslel i pusic'al ili winicob mach bʌ anic mi' ñopetob. Yom ma' ñusʌbeñob jini ñuc bʌ i mul tsa' bʌ i meleyob, 28ame cajic i yʌlob jini winicob ba' tsa' loc'sayon lojon tilel: “Mach p'ʌtʌlic i Yum. Ma'anic tsa' mejli i yʌq'ueñob i lum tsa' bʌ i lon subeyob. Tsi' ts'a'leyob cha'an yom mi' tsʌnsañob ya' ti colem bʌ i tiquiñal pañimil. Jini cha'an tsi' loc'sayob ti Egipto”, lon che'ob. 29Pero a cha'añobʌch jini israelob, yajcʌbilo' bʌ a cha'an. Tsa' loc'sayob ti Egipto cha'an cʌbʌl a p'ʌtʌlel. Tsa' pʌsbeyob i yejtal tac a p'ʌtʌlel, cho'on tsac pejca Dios.
Currently Selected:
DEUTERONOMIO 9: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.