DEUTERONOMIO 5
5
Jini lujump'ejl mandar
(Éx. 20.1-17)
1Moisés tsi' pʌyʌ tilel pejtel jini israelob. Tsi' subeyob: Ñich'tanla pejtel ili mandar yic'ot la' tic'ol woli bʌ c subeñetla cha'an mi la' wubin. Yom mi la' ñop, yom mi la' jac'. 2-3Come lac Yum Dios tsi' pejcayonla ti Horeb. Tsi' subeyonla chuqui mi caj i cha'len ti lac tojlel. Mach ti' tojlelobic lac ñojte'elob tsi' subu jini t'an, pero ti lac tojlel. Tsa' la cubibe i t'an joñonla cuxulonto bʌ la. 4Ya' ba wa'al lac Yum ti' yojlil c'ajc tsi' pejcayetla. 5Xinlʌpʌlon ti la' tojlel yic'ot ti' tojlel lac Yum, come jatetla tsa' la' bʌc'ña jini c'ajc. C bajñel tsa' letsiyon ti wits, ma'anic tsa' letsiyetla. Lac Yum tsi' pejcayon. Joñon tsac cha' subeyetla i t'an. Jiñʌch tsa' bʌ i yʌlʌ: 6“Joñon a Yumon a Dioson. Tsac pʌyʌyet loq'uel ti' lumal Egipto ya' ba' chucbilet ti to'ol e'tel. 7Mach a ñop yambʌ dios cha'an ma' xʌb otsan yambʌ tic tojlel. 8Mach a mel a dios. Mach a melben i yejtal chuqui tac an ti panchan, mi i yejtal jini am bʌ ti pañimil ti yebal panchan, mi i yejtal chuqui tac an ti ja' ti' yebal lum. 9Mach a cotchocon a bʌ ti' tojel i wut. Mach a diosiñob, come a Yumon a Dioson. Cujil mich'ajel che' ma'anic mij c'uxbintel. Mi cʌq'ueñob wocol winicob ti caj i mul i tat c'ʌlʌl mi' yubiñob i butsob, yic'ot i yalobilob i butsob jini winic mu' bʌ i ts'a'leñon. 10Mi cutsi p'ojlesʌbeñob i yutslel c pusic'al mu' bʌ i c'uxbiñoñob, mu' bʌ i jac'ob c mandar c'ʌlʌl ti jump'ejl mil i lajm la' p'olbal. 11Mach a lon tajben i c'aba' a Yum Dios cha'an chuqui mi caj a mel, come a Yum ma'anic mi caj i ñusʌben i mul jini mu' bʌ i lon tajben i c'aba'. 12Mach ñajʌyic ti a pusic'al i yorajlel c'aj o. Yom ma' ch'ujutesan Dios ti jini q'uin che' bajche' tsi' yʌq'ueyetla mandar lac Yum Dios. 13An la' cha'an wʌcp'ejl q'uin cha'an ma' cha'len a we'tel yic'ot pejtelel chuqui a wom a mel. 14Pero i wucp'ejlel q'uin jiñʌch i yorajlel c'aj o. I cha'añʌch a Yum Dios. Ti ili q'uin mach a wis cha'len e'tel, mi jatetic, mi jinic ch'iton bʌ a walobil, mi xch'oc bʌ a walobilic, mi a winiquic, mi a criadajic, mi a wacaxic, mi a burrojic, mi a wʌlaq'uic, mi jinic am bʌ ti a tojlel mach bʌ cʌmbilic. Che' jini mi mejlel i c'ajob i yo ja'el a winic yic'ot a criada año' bʌ ti a wenta. 15Yom ma' ña'tan mozojet ti yambʌ ora ti' lumal Egipto, pero lac Yum Dios tsi' loc'sayet yic'ot pejtelel i p'ʌtʌlel. Jini cha'an lac Yum Dios mi' wersa subeñet cha'an ma' c'aj a wo. 16Q'uele ti ñuc a tat a ña' che' bajche' tsi' subeyet lac Yum Dios, cha'an uts'at pejtelel chuqui mi' yujtel ti a tojlel, cha'an ja'el ma' taj cabʌl a jabilel ti ili lum mu' bʌ i yʌq'ueñet lac Yum Dios. 17Mach a cha'len tsʌnsa. 18Mach a cha'len ts'i'lel. 19Mach a cha'len xujch'. 20Mach a cha'len jop't'an ti' contra a pi'ʌlob. 21Mach a mulʌben i yijñam a pi'ʌl, mi i yototic, mi i lumic, mi i winiquic, mi i criadajic, mi i wacaxic, mi i burrojic. Pejtelel chuqui an i cha'an, mach yomic ma' mulʌben”.
Tsa' toj sajti i pusic'al winicob
(Éx. 20.18-21)
22Jiñʌch tsa' bʌ i yʌlʌ lac Yum che' wa'al ti c'ajc che' joyol ti tocal yic'ot ic'ch'ipan bʌ pañimil, ya' ti wits i c'aba' Sinaí. Ma'anic tsi' yʌc'ʌ yambʌ mandar. Tsi' ts'ijba ti cha'q'uejl xajlel. Che' jini tsi' yʌq'ueyon. 23Tsa' la' wubi jini c'am bʌ t'an ya' baqui ic'ch'ipan. Tsa' la' q'uele woli ti lejmel jini c'ajc ya ti pam wits. Jini cha'an tsa' laj tiliyob ba' añon jini ñuctaco' bʌ i ye'tel. 24Tsa' la' wʌlʌ: Quelelix lac cha'an i ñuclel Dios yic'ot i p'ʌtʌlel. Lac Yum Dios tsa'ix i pʌsbeyonla. Tsa'ix la cubibe i t'an ya' ti' yojlil c'ajc. La cujilix melel mi mejlel i pejcan Dios winic come chʌn cuxulet. 25Pero bʌbʌq'uen mi lac chʌmel che' mi' cha' pejcañonla. ¿Yom ba mi lac chʌmel? Come ili c'ajc mi caj i jisañonla. 26-27¿Baqui an winic mu' bʌ mejlel i yubiben i t'an Dios ti' yojlil jini c'ajc? ¿Mach ba muq'uic i chʌmel? Jini cha'an yom ma' bajñel majlel a ñich'tʌben i t'an lac Yum cha'an ma' cha' subeñon lojon. Che' jini mi caj c jac' lojon, che'etla. 28Lac Yum tsi' yubibeyetla la' t'an. Tsi' subeyon: Tsa'ix cubibeyob i t'an ili winicob. Uts'at bajche' tsi' ña'tayob. 29Uts'atax muq'uic i bʌc'ñañoñob ti pejtelel ora cha'an mi' jac'beñonob c t'an yic'ot c mandar. Che'ic jini, muq'uix i ñusañob q'uin ti uts'at yic'ot i yalobilob ti pejtelel ora. 30Yom ma' subeñob cha'an mi' cha' sujtelob ti' yototob. 31Pero jatet wʌ'to ma' cʌytʌl quic'ot cha'an mic subeñet pejtelel c t'an yic'ot c mandar, cha'an ma' cʌntesan jini winicob. Subeñob cha'an mi' jac'ob ti jini lum woli bʌ cʌq'ueñob, che'en lac Yum. 32Jini cha'an yom wen tsajaletla cha'an mi la' mel che' bajche' tsi' subeyetla lac Yum Dios. Mach yomic mi la' wis xoy la' bijlel, mi ti la' ñojic, mi ti la' ts'ejic. 33Chʌn cha'lenla xʌmbal ti' bijlel lac Yum che' bajche' tsi' subeyetla, cha'an cuxul mi la' wajñel ti pejtelel ora, cha'an mi' jastiyel la' chubʌ'an, cha'an mi' tam'esʌntel la' jabilel ya' ti lum baqui mi la' majlel ti chumtʌl.
Currently Selected:
DEUTERONOMIO 5: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.