DEUTERONOMIO 4
4
I xic'bentelob cha'an mi' jac'ob mandar
1Jini cha'an, israelob, wen ñich'tanla jini mandar yic'ot la' tic'ol. Jac'ʌla ti uts'at jini woli bʌ c subeñetla cha'an chʌn cuxul mi la' wajñel, cha'an mi la' wochel ti chumtʌl ti jini lum mu' bʌ caj i yʌq'ueñetla lac Yum. 2Tsa'ix cʌq'ueyetla mandar. Mach yomic mi la' wotsan yambʌ. Mach yomic mi la' t'ox jisan. Ch'oyol ti lac Yum Dios jini mu' bʌ c subeñetla. Wersa yom mi la' jac' ti ts'ʌcʌl. 3Tsa'ix la' wen q'uele bajche' tsi' cha'le lac Yum ya' ti jini Baalpeor. Lac Yum Dios tsi' laj ac'ʌyob ti jilel ti la' tojlel pejtel winicob tsa' bʌ i tsajcayob jini Baalpeor, 4pero cuxulob to jini xuc'ulo' bʌ tsa' bʌ i chʌn tsajcayob lac Yum. 5Tsa'ix j cʌntesayetla i mandar lac Yum che' bajche' tsi' subeyon, cha'an ts'ʌcʌl mi la' jac' che' ya'ix añetla ti jini lum baqui mi la' majlel la' ch'ʌm. 6Jini cha'an yom mi la' wen lot ti la' pusic'al. Yom ts'ʌcʌl mi la' jac'. Come jiñʌch la' ña'tʌbal yic'ot la' ch'ejlel ti' wutob jini año' bʌ ti pañimil. Che' mi yubiñob pejtelel jini t'an, mi caj i yʌlob: “Isujm cabʌl i pusic'al ili winicob, cabʌl i ña'tʌbal. Ñucob ili winicob”. Che'ʌch mi caj i yʌlob. 7¿Am ba yambʌ dios yujil bʌ coltaya che' bajche' lac Yum Dios mu' bʌ i yubiñonla che' an chuqui mi laj c'ajtiben? 8¿Am ba yambʌ winicob tijicñayo' bʌ che' bajche' jatetla? ¿Tsa' ba aq'uentiyob jini mandar mu' bʌ c subeñetla?
Jini israelob ya' ti Horeb
9Chʌcʌ q'uele la' bʌ. Tsajin la' bʌ cha'an ma'anic mi' ñajʌyel la' cha'an chuqui tac tsa' la' q'uele. Mach yomic mi' yʌjñel la' pusic'al che' cuxulet tola. Yom mi la' cʌntesan la' walobilob yic'ot i yalobilob la' walobilob. 10Mach yomic mi' ñajʌyel la' cha'an jini q'uin che' wa'aletla ti' tojlel la' Yum Dios ya' ti Horeb. Lac Yum tsi' subeyon: Tempʌbeñon jini winicob cha'an mi yubiñob c t'an. Wersa mi caj i ñopob i bʌc'ñañon ti pejtelel ora che' wʌ'to añob ti pañimil. Che'ʌch yom mi' cʌntesañob i yalobilob ja'el, che'en lac Yum. 11Che' jini tsa' c'otiyetla ti wa'tʌl ti yebal jini wits. Awilan tsa' la' q'uele woli ti lejmel jini wits, woli' letsel c'ajc ti panchan. An tocal yic'ot ic'ch'ipan bʌ pañimil ti' joytʌlel. 12Lac Yum tsi' cha'le t'an ya' ti' yojlil c'ajc. Tsa' la' wubibe i t'an, pero ma'anic tsa' la' q'uele ti' wa'tʌlel. 13Lac Yum tsi' tsictesʌbeyetla i t'an cha'an mi la' jac'. An lujump'ejl jini mandar. Lac Yum tsi' ts'ijbu ti cha'q'uejl xajlel. 14Ti jim bʌ ora lac Yum tsi' subeyon cha'an mij cʌntesañetla pejtelel i mandar yic'ot i t'an, cha'an mi la' jac' ti jini lum tsa' bʌ i subeyetla ya' baqui mi caj la' c'axel ti chumtʌl.
I tic'ol cha'an ma'anic mi' ch'ujutesañob diosob
15Ti jim bʌ ora che' bʌ lac Yum tsi' cha'le t'an ya' ti' yojlil c'ajc, tsa' la' q'uele ma'anic i cuctal. Jini cha'an wen cʌntanla la' pusic'al 16ame sojquiquetla, ame cajic la' lon mel la' dios lajal bajche' i yejtal winic mi x'ixic. 17Mach yomic mi la' mel i yejtal tac bʌte'el, mi i yejtalic mate'el mut am bʌ ti pañimil, 18mi i yejtalic lucum mu' bʌ i jexban i ñʌc' ti lum, mi i yejtalic chʌy am bʌ ti' yebal lum. 19Che' ja'el mach yomic mi la' letsan la' wut ti panchan cha'an mi la' ch'ujutesan jini q'uin yic'ot uw yic'ot ec' tac. Mach yomic mi la' ñocchocon la' bʌ ti' tojlel. Lac Yum Dios tsi' yʌc'ʌ jini q'uin yic'ot uw yic'ot ec' cha'an mi' pʌs i c'ʌc'al tac ti' tojlel winicob ti pañimil. 20Pero lac Yum tsi' loc'sayetla ya' baqui tsa' la' cha'le wocol e'tel ti Egipto. Tsi' yajcayetla cha'an mi la' wajñel ti' tejclum lac Yum che' bajche' wʌle. 21Lac Yum tsi' mich'leyon cha'an ti la' mul. Tsi' yʌlʌ ma'anic mi caj i yʌc'on ti c'axel ti Jordán cha'an mi cochel ti tsiji' bʌ lum mu' bʌ caj i yʌq'ueñetla. 22Jini cha'an wʌ'ix mij cajel ti chʌmel joñon. Ma'anix mij caj ti c'axel ti junwejl Jordán, pero jatetla muq'uix la' c'axel cha'an mi la' cha'len chumtʌl ya' ba' mi' wen' ac' i wut jini lum. 23Jini cha'an yom wen tsajiletla cha'an ma'anic mi' ñajʌyel la' cha'an i t'an lac Yum Dios tsa' bʌ i yʌq'ueyetla. Mach mi la' mel i yejtal tac, come lac Yum Dios tsa'ix i tiq'uiyetla. 24Lajalʌch la' Yum Dios bajche' c'ajc yujil bʌ jisaya. Tsʌytsʌyña i pusic'al che' mi la' cʌy.
25Che' anix cabʌl la' walobilob yic'ot la' buts, che' wen ñoxetixla ila ti pañimil, mi tsa' caji la' mel tac la' dios yic'ot i yejtal tac chuqui an ti pañimil, leco mi caj i q'uel lac Yum Dios. Mi' cajel ti mich' ti' caj la' mul. 26Awilan mij c'ajtin jini año' bʌ ti panchan yic'ot ti pañimil cha'an mi' yochelob ti testigo. Ti caj la' mul mi la' cajel ti jilel ti jini lum baqui mi la' majlel ti junwejl Jordán ja'. Che' jini mach cabʌlic ora mi caj la' jal'an. Mi caj la' chojquel loq'uel. 27Lac Yum mi caj i pam puquetla ti yan tac bʌ lum. Ts'ita jach mi caj la' cʌytʌl ya' ba' mi caj i pʌyetla majlel lac Yum. 28Mi caj la' lon ch'ujutesan tac dios melbil bʌ ti c'ʌbʌl, melbil bʌ ti te' yic'ot ti xajlel. Mach c'otic i wut jini dios tac, mach muq'uic i yubin lac t'an. Ma'anic chuqui mi' c'ux, ma'anic chuqui mi' sic'. 29Pero ya' ba' pujquemetla ti yan tac bʌ lum mi tsa' caji la' sajcan lac Yum Dios, muq'uix cajel la' taj Dios mi tsa' la' sajca ti pejtelel la' pusic'al yic'ot ti pejtelel la' ña'tʌbal. 30Che' ch'ijiyem la' pusic'al cha'an pejtelel jini wocol, mi caj la' cha' ña'tan lac Yum Dios. Mi caj la' ñich'tʌben i t'an. 31Come wen uts i pusic'al lac Yum Dios. Ma'anic mi' caj i cʌyetla ti pejtelel ora. Ma'anic mi caj i jisañetla. Mach ñajʌyic i cha'an ti pejtelel ora jini t'an tsa' bʌ i subeyob la' ñojte'elob.
32-33Na'tanla chuqui tsa' ujti ti oñiyi c'ʌlʌl wʌle. C'ajtinla mi an majch tsi' q'uele o mi an majch tsi' yubi yambʌ ñuc tac bʌ bajche' iliyi che' bʌ Dios tsi' cha'le t'an ti' yojlil jini c'ajc. Ma'anic lajal bajche' jini che' bʌ Dios tsi' mele winic ti pañimil c'ʌlʌl wʌle. Sajcanla ti pejtelel pañimil. Ma'anic yambʌ winicob tsa' bʌ i yubibeyob i t'an Dios che' bajche' jatetla che' cuxulob to ti pañimil. 34¿Tsa' ba tili yambʌ dios i coltan winicob che' bajche' tsi' coltayonla lac Yum Dios? Tsi' pʌsʌ i p'ʌtʌlel ti lac tojlel che' bʌ tsi' pʌyʌyonla loq'uel ti' p'ʌtʌlel laj contrajob. Tsi' yotsayonla ti' cha'an bʌ. Tsi' pʌsʌ i yejtal tac i p'ʌtʌlel yic'ot bʌbʌq'uen tac bʌ yic'ot tsʌts tac bʌ ti la' tojlel che' bʌ tsi' loc'sayetla ti Egipto. 35Tsa'ix pʌsbentiyetla pejtelel iliyi cha'an mi la' ña'tan ma'anic yambʌ dios, jini jach lac Yum, jini cojach bʌ Dios. 36Ya' ti panchan tsi' pejcayetla. Tsa' c'ʌlʌ c'oti i t'an ba'añetla cha'an mi la' cʌntesʌntel. Tsi' pʌsbeyetla i yejtal i c'ʌc'al ila ti pañimil. Tsa' wubibe i t'an ti' yojlil jini c'ajc. 37Lac Yum tsi' wen c'uxbi la' ñojte'el. Yajcʌbiletla come i p'olbaletla. Tsa'ix i loc'sayetla ti Egipto yic'ot pejtelel i p'ʌtʌlel. 38Tsi' yʌq'ueyetla la' p'ʌtʌlel ti guerra cha'an mi la' choc loq'uel ñumen ñuco' bʌ bajche' jatetla. Tsi' toj'esayetla tilel cha'an mi' yʌq'ueñetla la' lum che' bajche' an la' cha'an wʌle. 39Jini cha'an yom mi la' wen ña'tan ti jump'ejl la' pusic'al. Lac Yum jiñʌch Dios ya' ti panchan yic'ot ila ti pañimil. Ma'anic yambʌ. 40Yom mi' la' jac'ben pejtelel i t'an yic'ot i mandar woli bʌ c subeñetla cha'an mi' tam'esʌntel la' jabilel yic'ot i jabilel la' walobilob. Che' jini mi caj la' wajñel ti ili lum mu' bʌ caj i yʌq'ueñetla. Che' jini la' cha'añʌch ti pejtelel ora.
Tejclum tac ba' mi' mejlelob ti puts'el
41Moisés tsi' wa'choco uxp'ejl tejclum am bʌ ti' tojel Jordán ja' ba' mi' pasel q'uin. 42Ya' yom mi' majlel ti puts'el stsʌnsa mi tsi' tsʌnsa yambʌ che' mach yomic i tsʌnsan, mi mach ts'a'lebilic i cha'an. 43Jini tejclum tac jiñʌch Beser am bʌ ti colem bʌ i tiquiñal pañimil ba'an jini rubeñob, yic'ot Ramot am bʌ ti Galaad ba'an jini gadob, yic'ot Golán am bʌ ti Basán, ba'an manasesob.
Moisés tsi' cha' tsictesa mandar
44-46Jiñʌch mandar tsa' bʌ i sube jini israelob Moisés. Jiñʌch ili t'an tac, yic'ot jini mandar, yic'ot jini tic'ojel tac, tsa' bʌ i subeyob Moisés che' bʌ tsa'ix loq'uiyob ti Egipto, che' ya'to añob ti' tojel Jordán ja' ba' mi' pasel q'uin lʌc'ʌl ti Betpeor. Jiñʌch i lum jini rey Sehón yic'ot jini amorreojob tsa' bʌ chumleyob ti Hesbón ti ñaxan. Tsi' jisayob Moisés yic'ot jini israelob. 47Israel tsi' ch'ʌmbeyob i lum yic'ot i lum jini Og rey bʌ ti Basán, yic'ot i lum jini cha'tiquil rey tsa' bʌ i yumayob jini amorreojob ti' tojel Jordán ba' mi' pasel q'uin. 48Jini israelob tsi' ch'ʌmʌyob jini lum Aroer am bʌ ti joctʌl ya' ba'an colem ja' i c'aba' Arnón c'ʌlʌl ti wits i c'aba' Sion, jiñʌch Hermón, 49yicot pejtel jini joctʌl am bʌ ti' tojel Jordán ja' ya' ba' mi' pasel q'uin, c'ʌlʌl ti colem ja' am bʌ i yʌts'mil i c'aba' Arabá ti' yebal wits i c'aba' Pisga.
Currently Selected:
DEUTERONOMIO 4: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.