DEUTERONOMIO 16
16
Jini q'uin tac ti jujump'ejl jab
(Éx. 23.14-17; 34.18-24)
1Ti jujump'ejl jab che' ti abril yom mi la' mel q'uin cha'an Pascua ti' tojlel lac Yum Dios. Come ti jim bʌ ora lac Yum Dios tsi' loc'sayetla ti Egipto che' ti ac'ʌlel. 2Yom mi la' ch'ʌmben majlel i majtan lac Yum ti q'uiñijel, mi wacax mi tiñʌme'. Yom mi la' tsʌnsʌben lac Yum Dios ya' ti Ch'ujul bʌ Ajñibʌl yajcʌbil bʌ i cha'an lac Yum ba' mi caj i ch'ujutesʌntel. 3Yom mi la' c'ux we'el yic'ot waj mach bʌ anic i levadurajlel. Wucp'ejl q'uin mach yomic mi la' c'ux waj am bʌ i levadurajlel cha'an mi la' ña'tan bajche' tsa' loq'uiyetla ti' lumal Egipto. Ma'anic tsa' mejli a xʌb otsan i pajel cha'an tsa' bʌc' loq'uiyetla. Yom mi la' chʌn ña'tan ti pejtelel ora. 4Wucp'ejl q'uin mach yomic mi' tajtʌl paj bʌ waj ti la' wotot. Ti ic'ajel che' ti' tejchibal q'uiñijel mi caj la' tsʌnsan wacax o mi tiñʌme'. Pero mach mejlic ti cʌytʌl i colojbal cha'an yambʌ q'uin. 5Mach yomic mi la' c'uxben i we'el jini Pascua ti la' wotot. 6Cojach yom mi la' c'ux ya' ti Ch'ujul bʌ Ajñibʌl yajcʌbil bʌ i cha'an lac Yum Dios. Yom mi la' tech jini q'uin che' ti ic'ajel che' woli ti bʌjlel q'uin, come jiñʌch i yorajlel che' bʌ tsa' loq'uiyetla ti Egipto. 7Jini we'elʌl yom mi la' laj pojpon. Che' ujtemix yom mi la' c'ux ya' ti ajñibʌl yajcʌbil bʌ i cha'an lac Yum. Che' ti sʌc'ajel mi mejlel la' cha' sujtel ti la' wotot. 8Wʌcp'ejl q'uin yom mi la' c'ux jini waj mach bʌ anic i pajel. Che' ti' wucp'ejlel q'uin yom mi la' tempan la' bʌ ti' tojlel lac Yum Dios ti jujump'ejl tejclum ba' chumuletla. Mach yomic mi la' cha'len e'tel ti jini q'uin.
9Ti jim bʌ ora che' mi la' tech la' tuc' i wut trigo, i tejchibalʌch wucp'ejl semana. Che' bʌ tsa'ix ñumi wucp'ejl semana, 10mi caj la' mel jini ñuc bʌ q'uiñijel i cha'an lac Yum Dios, i q'uiñilel jini semana tac. Yom mi la' ch'ʌmben majlel i majtan loc'sʌbil bʌ ti pejtelel chuqui tac tsa' la' taja ti la' we'tel che' bajche' jaycujch tsi' yʌq'ueyetla lac Yum Dios. 11La' ñuc'ac la' pusic'al ti' tojlel lac Yum, jatet yic'ot ch'iton bʌ, yic'ot xch'oc bʌ la' walobilob, yic'ot la' winicob, yic'ot la' criada, yic'ot jini levíjob ya' bʌ chumulob la' wic'ot, yic'ot jini ñajt bʌ ch'oyolob, yic'ot meba' alʌlob, yic'ot meba' x'ixicob am bʌ ti la' tojlel. Ya' yom mi la' tempan la' bʌ ti jini ajñibʌl yajcʌbil bʌ i cha'an lac Yum Dios. 12Ña'tanla bajche' tsa' la' cha'le majtan e'tel ti Egipto. Jac'ʌla ti uts'at pejtel jini mandar.
13Che' ujtemix la' tuc' la' trigo, yic'ot che' mi' yujtel la' yʌts' la' ts'usub, yom mi la' mel q'uiñijel. Wucp'ejl q'uin yom mi la' mel jini q'uin che' mi' melob lejchempat tac. 14La' ñuc'ac la' pusic'al, jatet, yic'ot ch'iton bʌ yic'ot xch'oc bʌ la' walobilob, yic'ot la' winicob, yic'ot la' criada, yic'ot jini levíjob, yic'ot jini ñajt bʌ ch'oyolob, yic'ot meba' alʌlob, yic'ot meba' x'ixicob ya' bʌ chumulob ti la' lumal. 15Wucp'ejl q'uin yom mi la' cha'len q'uiñijel ya' ti ajñibʌl yajcʌbil bʌ i cha'an lac Yum Dios, come lac Yum mi caj i pʌsbeñetla i yutslel ti pejtelel la' we'tel. On mi caj la' c'aj. Mi caj la' wubin i tijicñʌyel la' pusic'al. 16Uxyajl ti jujump'ejl jab mi caj i majlelob winicob yic'ot ch'iton bʌ la' walobilob ya' ti ajñibʌl yajcʌbil bʌ i cha'an lac Yum Dios che' ti' q'uiñilel jini waj mach bʌ anic i pajel, yic'ot i q'uiñilel jini semana tac, yic'ot i q'uiñilel jini Tabernáculo. Mach yomic to'ol meq'uel la' c'ʌb mi' la' tilel. 17Pero ti jujuntiquiletla ch'ʌmʌla tilel ofrenda ti pejtelel chuqui tsa' aq'uentiyetla che' bajche' tsi' coltayetla lac Yum Dios.
Tsa' wa'choconti jini año' bʌ i ye'tel
18Yom mi la' wa'chocon jini juezob yic'ot año' bʌ i ye'tel ti pejtelel la' tejclum tac mu' bʌ caj i yʌq'ueñetla lac Yum Dios. Aq'ueñob i ye'tel ti meloñel cha'an mi' melob i pi'ʌlob ti toj. 19Mach yomic mi la' jem jini toj bʌ. Mach yomic jelchojc jach mi la' c'uxbin winicob. Mach yomic mi la' ch'ʌm la' majtan ti' tojlelob, come jini majtañʌl mi' mʌcben i wut jini am bʌ i ña'tʌbal. Mi' socben i t'an jini tojo' bʌ. 20Pejtelel chuqui toj jiñʌch yom bʌ mi la' tsajcan cha'an mi la' ch'ʌm, cha'an mi la' jal'an ti la' lum mu' bʌ caj i yʌq'ueñetla lac Yum Dios. 21Mach mi la' wa'chocon jini dioste' tac ti' t'ejl jini pulʌntib i cha'an lac Yum Dios. 22Mach yomic mi la' wa'chocon oy tac mi wa'al bʌ xajlel ti' t'ejl i pulʌntib, come ts'a' mi' q'uel lac Yum Dios.
Currently Selected:
DEUTERONOMIO 16: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.