DEUTERONOMIO 1
1
I t'an Moisés
1Jiñʌch i t'an Moisés tsa' bʌ i sube israelob ti junwejl Jordán ja' che' ya'to añob ti colem bʌ i tiquiñal pañimil i c'aba' Arabá am bʌ ti' tojel jini ñajb i c'aba' Chʌchʌc Bʌ. Joyolob ti tejclum tac i c'aba' Parán, yic'ot Tofel, yic'ot Labán, yic'ot Hazerot, yic'ot Dizahab. 2Che' mi lac loq'uel ti Horeb, yom junlujump'ejl q'uin xʌmbal ti' bijlel jini wits i c'aba' Seir, c'ʌlʌl mi laj c'otel ti Cades Barnea. 3Che' yomix ts'ʌctiyel cha'c'al jab, che' ti 15 de febrero, Moisés tsi' sube pejtelel jini israelob chuqui tac tsi' yʌlʌ lac Yum ti' tojlel che' bajche' tsi' yʌq'ue mandar lac Yum. 4-5Ujtemix i jisan jini Sehón i rey jini amorreojob tsa' bʌ i cha'le yumʌl ti Hesbón, yic'ot ja'el Og i rey jini año' bʌ ti Basán chumul bʌ ti Astarot. Tsi jisayob Og ya' ti Edrei am bʌ ti' junwejlel Jordán ti' lumal Moab. Moisés tsa' caji i tsictesʌbeñob jini mandar tac. Tsi' yʌlʌ:
6Lac Yum Dios tsi' subeyonla ya' ti Horeb: Cabʌlix ora wʌ' añetla ila ti wits. Jasʌlix. 7Cha' cucuxla ya' ti' lumalob amorreojob yic'ot ti' joytʌlel. Cucuxla ti Arabá jini joctʌl bʌ lum, yic'ot ti wits ya' ti Neguev, yic'ot ti' ti' ja'. La' cha'añʌch pejtel i lumal cananeojob, yic'ot Líbano c'ʌlʌl ti colem ja' i c'aba' Eufrates. 8Cucula, q'uelela. La' cha'añʌch jini lum come woli cʌq'ueñetla. Yom mi la' wochel ti chumtʌl ya'i che' bajche' tsac wʌn subeyob la' tat Abraham, yic'ot Isaac, yic'ot Jacob. La' cha'añʌch come i p'olbaletla. Che' tsi' yʌlʌ lac Yum.
Tsa' wa'chocontiyob mu' bʌ i cha'leñob meloñel
(Éx. 18.13-27)
9Ya' ti Horeb tsac subeyetla: Mach mejlix j cʌntañetla tic bajñelil. 10Come lac Yum Dios tsa'ix i wen p'ojlesayetla. Jini cha'an cabʌletixla che' bajche' jini ec' ti panchan. 11La' i chʌn p'ojlesañetla lac Yum Dios, i Dios la' ñojte'el jinto che' ñumen cabʌletla. La' i coltañetla che' bajche' tsi' yʌc'ʌ i t'an. 12Pero mach mejlic c bajñel cuchbeñetla la' tsic pusic'al yic'ot la' wocol yic'ot la' jontolil. 13Jini cha'an yom mi la' yajcan winicob ti la' tojlel, winicob año' bʌ i ña'tʌbal, cʌmbilo' bʌ la' cha'an, yujilo' bʌ meloñel. Mi caj c wa'chocoñob cha'an mi' meletob, cho'on tsac subeyetla. 14Che' jini tsa' la' jac'beyon: Uts'atʌch bajche' ma' wʌl, che'etla. 15Jini cha'an tsac pʌyʌ jini ñuc taco' bʌ i ye'tel ti la' tojlel año' bʌ cabʌl i ña'tʌbal. Tsac wa'chocoyob ti' ye'tel cha'an mi' cʌntañob winicob. An tsa' bʌ i tajayob ti mil tac ti jujunmojt, yic'ot ti jo'jo'c'al tac, yic'ot ti lujuntiquil tac i yuxc'al, yic'ot ti lujuntiquil tac. 16Ti jini jach bʌ ora tsac subeyob la' juezob: Yom mi la' ñich'tʌben i t'an la' pi'ʌlob. Yom toj mi la' cha'len meloñel ti' tojlelob. Yom junlajal mi la' mel la' pi'ʌlob, yic'ot jini ñajt bʌ ch'oyolob. 17Mach yomic jelchojc jach mi la' c'uxbin winicob che' mi la' melob. Yom lajal mi la' ñich'tʌbeñob i t'an jini p'ump'un bʌ che' bajche' ñuc bʌ. Mach yomic mi la' bʌc'ñan winicob mi juntiquilic, come jini meloñel i cha'añʌch Dios. Jini wocol tac bʌ mach bʌ mejlic la' mel yom mi la' subeñon cha'an mic mel. 18Ti jini jach bʌ ora tsac subeyetla bajche' yom mi la' cha'len.
I ye'tel jini lajchʌntiquil xq'uelojelob
(Nm. 13.1-33)
19Che' jini tsa' loq'uiyonla ti Horeb. Tsa' lac pam xʌñʌ jini bʌbʌq'uen bʌ i tiquiñal pañimil tsa' bʌ la' q'uele ya' ti bijlel amorreojob. Lac Yum tsi' chocoyonla majlel c'ʌlʌl tsa' c'otiyonla ti Cades Barnea. 20Ya'i tsac subeyetla: Wʌ'ix añetla ti wits i cha'an amorreojob. Isujm woli' yʌq'ueñonla jini lum lac Yum. 21Lac Yum Dios tsi' pʌyʌyonla tilel. Jini lum an ti' tojel la' wut. Cucuxla. Ch'ʌmʌla che' bajche' tsi' subeyetla lac Yum Dios, i Yum lac ñojte'elob. Mach mi la' cha'len bʌq'uen. Mach yomic c'un la' pusic'al. Che'ʌch tsac subeyetla. 22Jini cha'an tsa' la' subeyon: La' lac choc majlel xq'uelojelob cha'an mi' q'uelob bajche' yilal jini lum. La' cha' julicob i subeñonla bajche' yilal jini bij ba' mi lac letsel majlel, yic'ot jini tejclum ba' mi laj c'otel, che'etla. 23Jini cha'an uts'at tsa cubi jini la' t'an. Tsac choco majlel lajchʌntiquil la' pi'ʌlob tilemo' bʌ ti jini lajchʌntiquil i yalobilob israel. 24Che' jini tsa' caji' xʌñob majlel jini bij. Tsa' ñumiyob ti wits. Tsa' c'otiyob ya' ti' joctʌlel Escol. Che' jini tsi' cʌñʌyob jini lum. 25Tsi' ch'ʌmʌyob tilel i yejtal i wut jini lum cha'an mi' laj q'uel. Tsi' yʌlʌyob: Uts'atʌch jini lum woli bʌ i yʌq'ueñonla lac Yum, che'ob.
26Pero ma'anic tsa' la' jac'ʌ majlel. Tsa' la' ñusʌbe i t'an lac Yum. 27Tsa' la' cha'le wulwul a'leya ti pisil bʌ la' wotot. Tsa' la' wʌlʌ: ¿Chucoch tsi' loc'sayonla lac Yum ti' lumal Egipto? ¿Yom ba i choconla majlel ba'an jini amorreojob cha'an mi' jisañonla? 28¿Bajche' mi caj la cujtel? Come jini lac pi'ʌlob tsa'ix i bʌc'tesayonla. An abi jini tejclum ñumen colem bʌ che' bajche' lac lumal. Ñumen chañob abi jini winicob ja'el. An abi wen chan taco' bʌ i yotot, yic'ot chan tac bʌ ts'ajc. Tsabi q'ueleyob colem bʌ winicob, i yalobilob Anac, che'etla. 29Jini cha'an tsac subeyetla: Mach la' cha'len bʌq'uen. Mach yomic mi la' bʌc'ñañob. 30Jini lac Yum Dios jiñʌch mu' bʌ caj i ñaxan majlel ti la' tojlel cha'an mi' cʌntañetla che' bajche' tsi' coltayetla loq'uel ti Egipto. 31Belel q'uin tsa'ix la' q'uele i yutsel i pusic'al lac Yum tsa'ix bʌ i pʌyʌyetla tilel. Che' bajche' winic mi' coltan i yalobil lac Yum tsi' coltayetla tilel ti pejtelel jini bij tsa' bʌ la' xʌñʌ, cho'on tsac subeyetla. 32Tsa' la' q'uele iliyi, pero ma'anic tsa' la' ñopo lac Yum. 33Jini tsa' ñaxan majli ti' tojel la' wut cha'an mi' sʌclʌbeñetla jini lum baqui yom mi la' jijlel. Jini tsi' pʌsbeyetla majlel c'ajc che' ti ac'ʌlel yic'ot jini tocal che' ti q'uiñil.
Lac Yum tsi' yʌq'ueyob wocol israelob
(Nm. 14.20-35)
34-35Tsa' mich'a lac Yum che' bʌ tsi' yubi la' t'an. Tsi' yʌlʌ: Ma'anic mi juntiquilic mu' bʌ caj i q'uel jini wen bʌ lum tsa' bʌ c subeyob la' ñojte'elob cha'an mi caj cʌq'ueñob. 36Jini jach Caleb i yalobil Jefone mi caj i q'uel jini wen bʌ lum ya' ba' tsi' yʌc'ʌ i yoc, come mi caj cʌq'uen yic'ot i yalobilob, come chʌn toj tsi' tsajcayon ti pejtelel i pusic'al. Che' tsi' yʌlʌ lac Yum. 37Che' ja'el lac Yum tsi' mich'leyon ti la' caj. Tsi' subeyon: Jatet ma'anic mi caj a wochel ya' ti jini lum, 38pero Josué (i yalobil Nun), jini a pi'ʌl ti e'tel, mi' caj ti ochel ajñel. Yom ma' xic'ben, come jini mi caj i pʌy ochel pejtelel israelob. 39Mi caj i yochelob la' walobilob. Tsa' la' lon ña'ta mi caj i jisʌntelob ti' c'ʌbob la' contrajob. Mi caj i ch'ʌmob jini lum la' walobilob maxto bʌ yujilobic chuqui wen yic'ot chuqui leco. 40Pero jatetla cha' cucuxla ti sujtel ya' ti colem bʌ i tiquiñal pañimil ti' bijlel jini Chʌchʌc bʌ Ñajb, che'en lac Yum.
Tsa' aq'uentiyob i wocol israelob ya' ti Horma
(Nm. 14.39-45)
41Che' jini tsa' la' subeyon: Tsa'ix c cha'le lojon mulil ti' wut lac Yum. Jini cha'an mi caj c letsel lojon majlel ti guerra che' bajche' tsi' subeyon lojon lac Yum Dios, che'etla. Tsa' la' lon ch'ʌlʌ la' bʌ ti la' we'tijib. Tsa' cajiyetla ti lon letsel majlel ya' ti wits. 42Pero lac Yum tsi' subeyon: Yom ma' subeñob: Mach yomic mi la' letsel majlel ti guerra. Mi caj i jisañetla la' contrajob, come ma'anic mi caj cajñel la' wic'ot, che'en lac Yum.
43Joñon tsac subeyetla pero ma'anic tsa' la' ñich'tʌbeyon c t'an. Tsa' la' juch' t'uchtʌbe i mandar lac Yum. Tsa' cajiyetla ti lon letsel majlel ti guerra. 44Che' jini tsa' loq'uiyob jini amorreojob ya' ba' chumulob ti wits. Tsa' tiliyob i tajetla. Tsa' caji i yajñesañetla che' bajche' xux. Tsi' tsʌnsayob la' pi'ʌlob ya' ti Seir c'ʌlʌl ti Horma. Tsi' p'ump'un tic'layetla. 45Che' jini tsa' cha' sujtiyetla. Tsa' la' wuc'ta la' bʌ ti' tojlel lac Yum, pero ma'anix tsi' chʌn ñich'tʌbeyetla la' t'an. Ma'anic tsi' jac'ʌyetla. 46Jini cha'an cabʌl ora tsa' cʌleyetla ti Cades.
Currently Selected:
DEUTERONOMIO 1: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.