AMOS 6
6
I jisʌntel israelob
1Mi caj i yubiñob wocol jini wen chumulo' bʌ ti Jerusalén yic'ot ti Samaria, yic'ot jini ñuco' bʌ año' bʌ i ye'tel ti' tojlel israelob. 2Yom mi la' ñumel ti Calne, jini colem tejclum am bʌ ti Babilonia, cha'an mi la' q'uel. Cucula ti Hamat, colem bʌ tejclum ti Siria. Ti wi'il cucuxla ti jubel ti Gat ti' lumal filisteojob. Ti yambʌ ora uts'at i lumal, cabʌl i p'ʌtʌlel. Pero tsa'ix jili.
3Mi la' lon ña'tan mach muq'uic i tajetla i yorajlel wocol. Mi la' wa'chocon ti e'tel jini yujil bʌ jontolil. 4Mi la' ñoltʌl ti ch'ac melbil bʌ ti marfil. Jal mi la' c'aj la' wo ti la' wʌyib. Mi la' c'ux yajcʌbil bʌ tiñʌme' yic'ot jujp'em bʌ alʌ wacax. 5Mi la' lon ña'tan la' mel música tac che' bajche' David. Mi la' cha'len c'ay mach bʌ anic i sujmlel che' mi la' ñijcan arpa. 6Cabʌl mi la' jap vino ti colem taza tac mu' bʌ i c'ʌjñel cha'an i majtan Dios. Mi la' bon la' bʌ ti aceite yic'ot perfume ti' tijicñʌyel la' pusic'al. Pero ma'anic mi la' p'untan la' pi'ʌlob woliyo' bʌ ti wocol. 7Jini cha'an ñaxan mi caj la' loq'uel ti' tojlel la' pi'ʌlob. Mi caj la' cʌjchel majlel ti ñajt bʌ lum. Mi caj i ñʌjch'el i t'an xq'uiñijelob.
8Lac Yum Dios tsi' bajñel ac'ʌ i t'an. Lac Yum, i Dios Panchan yic'ot Pañimil, woli' yʌl: Ts'a' mij q'uel i p'olbal Jacob, come chan mi' melob i bʌ. Ts'a' mij q'uelbeñob i yotot anquese i t'ojol jax ti q'uelol. Mi caj cʌc' ti jisʌntel jini tejclum yic'ot pejtel i chubʌ'an.
9Mi tsa' cʌleyob lujuntiquil winicob ti jump'ejl otot mi caj i laj chʌmelob. 10Che' mi' tilel i yumijel chʌmen bʌ cha'an mi' bomben i cuctal cha'an mi' muc, mux i suben jini am bʌ ti otot: “¿Anto ba juntiquil awic'ot?” che'en. Mi caj i yʌl: “Ma'anic. Tsajaletme. Mach yomic mi la cʌl i c'aba' lac Yum”, che'en. 11Come lac Yum tsi' yʌc'ʌ mandar cha'an mi' bic'ti jejmel tac jini colem otot yic'ot alʌ otot.
12Jini caballo, ¿mu' ba i cha'len ajñel ti xajlelol? ¿Am ba winic mu' bʌ i pic majlel colem ñajb yic'ot tat wacax? Pero ñumen tontojetla come tsa' la' pʌntesa jini toj bʌ meloñel ti veneno yilal. Tsa' la' tse'ta jini toj bʌ i pusic'al cha'an mi la' wʌc' ti wocol. 13Mi la' tijicñesan la' bʌ yic'ot jini lolom tac bʌ. Mi la' lon al: “Ti lac bajñel p'ʌtʌlel tsa' mʌjli lac cha'an”, lon che'etla. 14Awilan, mi caj j contrajiñetla añet bʌ la ti Israel. Mi caj c pʌy tilel ti la' contra jump'ejl colem tejclum mu' bʌ caj i tic'lañetla ya' ti' yochib Hamat c'ʌlʌl ti pa' am bʌ ti joctʌl Arabá, che'en lac Yum, i Dios Panchan yic'ot Pañimil.
Currently Selected:
AMOS 6: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.