AMOS 2
2
1Lac Yum woli' yʌl: Cabʌlix i jontolil Moab. Tsa' cʌlʌx ñumi i p'isol i jontolil. Mach chʌn cujchix c cha'an, come tsi' pulbeyob i bʌquel i rey Edom c'ʌlʌl tsa' sujti ti tan. 2Jini cha'an mi caj c choc tilel c'ajc ti Moab. Mi caj c laj pulben jini wen melbil tac bʌ i yotot ya' ti Queriot. Jini año' bʌ ti Moab mi' cajelob ti chʌmel ti guerra. Bajc'ʌl winicob mi' cajelob ti oñel che' woli' wustʌl trompeta tac. 3Mi caj c junyajlel jisan jini rey ti Moab. Mi caj c tsʌnsan pejtelel i yumob ja'el, che'en lac Yum.
4Lac Yum woli' yʌl: Cabʌlix i jontolil Judá. Tsa' cʌlʌx ñumi i p'isol i jontolil. Mach chʌn cujchix c cha'an, come tsi' ñusʌbeyon c t'an, ma'anic tsi' jac'beyon c mandar. Tsa' sajtiyob cha'an tsi' ñopoyob lot. Tsi' ñopoyob dioste' tac che' bajche' i tatob. 5Jini cha'an mi caj c choc tilel c'ajc ya' ti Judá. Mi caj c laj pulben jini wen melbil tac bʌ i yotot ti Jerusalén.
Dios mi caj i bʌc' mel Israel
6Lac Yum woli' yʌl: Cabʌlix i jontolil Israel. Tsa' cʌlʌx ñumi i p'isol i jontolil. Mach chʌn cujchix c cha'an, come mi' choñob jini mach bʌ añobic i mul cha'an i wo'lel ti taq'uin. Mi' c'ʌñob i tojol jini p'ump'uño' bʌ cha'an mi' mʌñob i huarach. 7Mi' yʌq'ueñob wocol bʌ e'tel jini p'ump'uño' bʌ. Mi' t'uchtañob che' bajche' ts'ubejn. Ñumen ti p'is mi' tic'lañob ti e'tel jini utso' bʌ. Jini ch'iton yic'ot i tat mi' comol pi'leñob jini jach bʌ xch'oc, cha'an mi' yʌc'ob ti wajlentel jini ch'ujul bʌ j c'aba'. 8Ya' ti' t'ejl pejtel pulʌntib mi' ñoltʌlob ba' tajsibil i pislel tsa' bʌ i ch'ʌmʌyob ti prenda. Ti' yotot Dios mi' japob vino tsa' bʌ i ch'ʌmʌyob cha'an multa.
9Pero joñon tsac jisa jini amorreojob tsa' bʌ i contrajiyetla. Lajal i chanlel amorreojob bajche' ch'ujte', wen tsʌtsob bajche' c'olol. Pero tsac jisayob che' bajche' te'. Tsac jisʌbe i wut am bʌ ti' c'ʌb. Tsac bocbe i wi' chucul bʌ ti lum. 10Joñon tsac pʌyʌyetla loq'uel ti' lumal Egipto. Cha'c'al jab tsac pʌyʌyetla majlel ti jochol bʌ lum cha'an mi la' ch'ʌm i lumal amorreojob. 11Tsac wa'choco lamital ch'iton bʌ la' walobilob cha'an mi' yochelob ti x'alt'añob yic'ot nazareojob. Winicob x'ixicob ti Israel, jac'beñonla. ¿Mach ba isujmic? che'en lac Yum.
12Pero jatetla tsa' la' wʌq'ueyob i jap vino nazareojob. Tsa' la' tiq'ui jini x'alt'añob: “Mach mi la' cha'len subt'an”, che'etla. 13La' wilan, mi caj c teñetla che' bajche' mi' ten lum carreta che' but'ul ti seset cʌchbil bʌ jam. 14Lolom jach mi' ña'tan puts'el jini ch'ejl bʌ ti xʌmbal. Mi caj i jilel jini ch'ejl bʌ. Jini ñuc bʌ mach mejlic i coltan i bʌ. 15Jini mu' bʌ i ch'ʌm jalʌjb ma'anic mi caj i mʌjlel i cha'an. Jini ch'ejl bʌ ti xʌmbal ma'anic mi caj i coltan i bʌ. Anquese c'ʌchʌl ti caballo, ma'anic mi caj i coltan i bʌ. 16Ti jim bʌ ora jini ñumen ch'ejl bʌ i pusic'al ti' tojlel jini ñuco' bʌ xguerrajob mi caj i choc i ye'tijib cha'an guerra. Mi' caj ti puts'el. Che'ʌch woli' yʌl lac Yum.
Currently Selected:
AMOS 2: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.