2 SAMUEL 3
3
1Cabʌl guerra tsa' ujti ti' tojlel i pi'ʌlob Saúl yic'ot i pi'ʌlob David, pero chʌn p'ʌtʌl to tsa' ajni David che' bʌ tsa' caji i c'unte c'un'an i pi'ʌlob Saúl.
I yalobilob David tsa' bʌ i yilayob pañimil ti Hebrón
(1 Cr. 3.1-4)
2Jini ascuñʌl bʌ i yalobil David jiñʌch Amnón (i yalobil Ahinoam ch'oyol bʌ ti Jezreel). 3I cha'ticlel bʌ i yalobil jiñʌch Quileab (i yalobil Abigail tsa' bʌ cʌle ti meba' che' bʌ tsa' chʌmi Nabal ch'oyol bʌ ti Carmel). I yuxticlel i yalobil jiñʌch Absalón (i yalobil Maaca, i yalobil Talmai, jini rey ti Gesur). 4I chʌncticlel i yalobil jiñʌch Adonías (i yalobil Haguit). I jo'ticlel i yalobil jiñʌch Sefatías (i yalobil Abital). 5I wʌcticlel i yalobil jiñʌch Itream (i yalobil Egla i yijñam David). Pejtelel iliyi tsi' yilayob pañimil ti Hebrón.
Abner tsi' wa'choco i t'an ti' tojlel David
6Che' woliyob to ti guerra i pi'ʌlob Saúl ti' contra David, Abner tsa' caji ñuc'an ti' tojlel i pi'ʌlob Saúl. 7An juntiquil x'ixic i c'aba' Rizpa (i yalobil Aja). Jiñʌch i yixic Saúl. Isboset tsi' sube Abner: ¿Chucoch tsa' c'oti a pejcan i yixic c tat? che'en. 8Abner tsa' wen mich'a cha'an jini t'an tsa' bʌ i yʌlʌ Isboset. Abner tsi' yʌlʌ: ¿Ts'i'on ba cha'an mic lemben i c'ʌb Judá? C'ʌlʌ wʌle tsa'ix c wen colta i pi'ʌlob Saúl. Ma'anic tsa cʌc'ʌyetla ti' c'ʌb David. Wʌle wolix a pʌc'on ti mulil yic'ot jini x'ixic. 9Mux caj a toj yic'ot Dios. Mi caj j coltan David cha'an mi' ts'ʌctiyel i t'an lac Yum tsa' bʌ i sube David. 10Come lac Yum tsi' yʌq'ue David i yumʌntel Saúl. Mi caj i yochel ti' wenta. David mi caj i cha'len yumʌl ti Israel yic'ot ti Judá c'ʌlʌl ti Dan c'ʌlʌl ti Beerseba. Che' tsi' yʌlʌ Abner. 11Jini Isboset ma'anic bajche' tsa' mejli i jac'ben i t'an Abner, come woli' wen bʌc'ñan.
12Che' jini Abner tsi' choco majlel winicob i suben David: ¿Majqui i cha'an pejtelel ili lum? Yom mi lac tem lac t'an. Mi caj c cha'len wersa cha'an mi' yochelob ti a wenta pejtelel israelob, che'en. 13David tsi' sube: Uts'at, mux c laje' c t'an quic'otet. Pero junchajp jach mic wʌn c'ajtibeñet. Mach ma' to'ol tilel a q'uelon jinto ma' ñaxan pʌy tilel Mical i yalobil Saúl, che'en. 14David tsi' choco majlel winicob ba'an Isboset (i yalobil Saúl) cha'an mi' suben: Cha' chocbeñon tilel quijñam Mical, come jiñʌch tsa' bʌ c taja ti' q'uexol jo'c'al i pʌchʌlel filisteojob. Jiñʌch i tojol c'ajtibil bʌ cha'an a tat, che'en. 15Che' jini Isboset tsi' chocbe majlel. Tsi' chili loq'uel jini x'ixic ti' tojlel i ñoxi'al i c'aba' Paltiel (i yalobil Lais). 16I ñoxi'al Mical tsa' caji i tsʌclen majlel che' bʌ woli ti xʌmbal majlel. Woli ti uq'uel majlel c'ʌlʌl tsa' c'oti ti Bahurim. Abner tsi' sube: Cucux ti sujtel, che'en. Che' jini tsa' sujti jini winic.
17Abner tsi' cha'le t'an yic'ot jini xñoxob año' bʌ ti' lumal Israel. Tsi' yʌlʌ: Anix ora la' wom la' wotsan David ti rey ti la' tojlel. 18Cha'lenix la mecu, come lac Yum tsa'ix i yʌlʌ: “Mi caj j c'ʌn David cha'an mic loc'san Israel ti' c'ʌb filisteojob yic'ot ti' c'ʌb pejtelel i contrajob”, che'en. 19Che' ja'el Abner tsi' pejca jini año' bʌ ti Benjamín. Tsa' majli Abner ti Hebrón ba'an David cha'an mi' suben pejtelel chuqui tac yomob i mel jini israelob yic'ot jini benjamiñob. 20Che' bʌ tsa' c'oti ba'an David yic'ot junc'al winicob, David tsi' chajpʌbeyob i bʌl i ñʌc' Abner yic'ot pejtelel i winicob tsa' bʌ i pi'leyob tilel. 21Abner tsi' sube David: Mux c majlel c pejcan pejtelel israelob cha'an mi' temob i t'an, cha'an mi' yotsañetob ti rey ti' tojlelob. Che' jini mi mejlel a subeñob pejtelel chuqui a wom, che'en. Che' jini tsi' cʌyʌyob i bʌ David yic'ot Abner. Tsa' majli Abner ti' ñʌch'tʌlel i pusic'al.
Joab tsi' tsʌnsa Abner
22Awilan wolix i sujtelob i soldadojob David yic'ot Joab. Woli' ch'ʌmob tilel cabʌl chubʌ'añʌl tsa' bʌ i tajayob ti guerra. Pero mach ya'ix an Abner yic'ot David ya' ti Hebrón, come majlemix ti' ñʌch'tʌlel i pusic'al. 23Che' bʌ tsa' c'oti Joab yic'ot pejtelel jini soldadojob tsajniyo' bʌ yic'ot ti guerra, tsa' subenti cha'an tsi' pejca jini rey Abner i yalobil Ner, pero cha' sujtemix ti' ñʌch'tilel i pusic'al. 24Joab tsa' majli ba'an rey. Tsa' caji i yʌ'len: ¿Chuqui tsa' mele? Come wʌle tsa'ix tili Abner i pejcañet. ¿Chucoch tsa' wʌc'ʌ ti sujtel? 25Wen cʌmbil a cha'an Abner (i yalobil Ner). Tsa' jach tili i lotiñet cha'an mi' cʌn baqui ma' loq'uel, yic'ot baqui ma' wochel, yic'ot pejtelel chuqui ma' mel, che'en.
26Che' bʌ loq'uemix Joab ba'an David, tsi' cha' choco winicob cha'an mi' pʌyob Abner. Tsi' tajayob ba'an jini pozo i c'aba' Sira. Tsi' cha' pʌyʌyob, pero mach wis yujilic David chuqui woli' yujtel. 27Che bʌ tsa' cha' c'oti Abner ya' ti Hebrón, Joab tsi' mucu pʌyʌ Abner cha'an mi' bajñel pejcan ba'an colem tranca. Ya'i tsi' q'uextʌbe i mul cha'an tsi' tsʌnsʌbe i yeran, Asael. Tsi' sʌl jeq'ue ti' yojlil i ch'il'at. Che' jini tsa' chʌmi Abner. 28Che' bʌ tsi' yubi David chuqui tsa' ujti, tsi' yʌlʌ: Mic sub ti' tojlel Dios, mach c mulic, mach i mulic c pi'ʌlob ja'el cha'an tsa' tsʌnsʌnti Abner (i yalobil Ner). 29La' ajnic ti' wenta Joab yic'ot pejtelel año' bʌ ti' yotot. Ti pejtelel ora la' ajnic c'amʌjel ti' yotot, yic'ot leco tac bʌ i tsoy, yic'ot tiquin tac bʌ i yoc. Uts'at mi' laj chʌmelob ti espada yic'ot ti wi'ñal jini año' bʌ ti' yotot Joab, che'en. 30Abner tsi' tsʌnsa Asael ti guerra ya' ti Gabaón. Jini cha'an Joab yic'ot Abisai i yeran tsi' tsʌnsayob Abner.
31Pero David tsi' sube Joab yic'ot pejtelel jini año' bʌ ti tejclum: Yom mi la' tsil la' bujc. Yom mi la' mel la' pusic'al cha'an tsa' chʌmi Abner, che'en. David tsi' cha'le xʌmbal majlel ti' pat jini ch'ujlelʌl. 32Che' jini tsi' q'uecheyob majlel i bʌc'tal Abner c'ʌlʌl ti Hebrón cha'an mi' mucob. Jini rey c'am tsi' cha'le uq'uel yic'ot pejtelel jini año' bʌ ti tejclum. 33Ch'ijiyem jax tsi' cha'le t'an. Tsi' yʌlʌ: ¿Che' ba yom mi' chʌmel Abner che' bajche' mi' chʌmel juntiquil mach bʌ anix i c'ʌjñibal? 34Ma'anic ba' ora tsa' cʌjchi a c'ʌb yic'ot a woc. Pero tsa' tsʌnsʌntiyet che' bajche' xñujp'el ti' p'ʌtʌlel jontol bʌ winicob, che'en. 35Pejtelel i pi'ʌlob ti tejclum tsi' wersa subeyob David cha'an mi' c'ux i waj che' q'uiñil to. Pero David tsi' yʌlʌ: La' i coltañon lac Yum. Ma'anic chuqui mi caj j c'ux jinto mi' bʌjlel q'uin, che'en. 36Che' bʌ tsi' yubibeyob i t'an David pejtelel winicob x'ixicob, uts'at tsi' q'ueleyob David yic'ot pejtelel chuqui tac tsi' mele. 37Ti pejtelel jini tejclum tac ti pejtelel Israel tsi' ch'ʌmbeyob isujm mach i mulic jini rey che' bʌ tsa' chʌmi Abner (i yalobil Ner). 38Jini rey tsi' sube x'e'telob i cha'an: ¿Mach ba la' wujilic? Jiñʌch ñuc bʌ yumʌl ti' lumal Israel jini tsa' bʌ chʌmi. 39C'uñonix wʌle, anquese yajcʌbilon cha'an mi cochel ti yumʌl, come ili winicob (i yalobilo' bʌ Sarvia) wen tsʌtsob i pusic'al tic tojlel. Lac Yum la' i yʌq'ueñob i toj i mul jini mu' bʌ i cha'leñob jontolil. Che' tsi' yʌlʌ David.
Currently Selected:
2 SAMUEL 3: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.