2 SAMUEL 17
17
I consejo Ahitofel yic'ot Husai
1Ahitofel tsi' sube Absalón: La' c bʌc' yajcan lajchʌntiquil mil winicob cha'an mi' loq'uelob wʌle ti ac'ʌlel cha'an mi' contrajiñob David ti guerra. 2Che' jini mi caj c taj che' wen lujb i bʌc'tal, che' wen ch'ijiyem. Mi caj c tʌts' loq'uel David ba'an i pi'ʌlob. Mi' cajelob ti puts'el. Che' jini mi mejlel a tsʌnsan jini rey che' i bajñel. Muq'uix caj a cha'len rey ti Israel ti' q'uexol a tat. 3Che' jini mi caj c cha' pʌy tilel ba'añet pejtelel jini winicob, come juntiquil jach jini woli bʌ a contrajin. Jini cha'an che' mi' jaq'uetob pejtel winicob, ñʌch'ʌl mi caj i yajñelob. Che' tsi' yʌlʌ Ahitofel. 4Uts'at tsi' yubi ili t'an Absalón yic'ot pejtelel jini xñoxtaco' bʌ año' bʌ ti Jerusalén.
5Absalón tsi' yʌlʌ: Pʌyʌ tilel ja'el Husai jini arquita cha'an mi la cubin chuqui mi' subeñonla, che'en. 6Che' bʌ tsa' tili Husai, Absalón tsi' sube pejtelel i t'an Ahitofel. Tsi' c'ajtibe: ¿Bajche' ma' ña'tan jatet? ¿Yom ba mi lac jac'ben jini t'an? Mi mach yomic, subeñon, che'en. 7Che' jini Husai tsi' jac'be Absalón: Mach uts'atic jini t'an tsa' bʌ ujti i subeñet Ahitofel, che'en. 8Come cʌmbilix a cha'an a tat yic'ot pejtelel i winicob. Wen ch'ejlob ti guerra, cojco to wʌle, wen mich'ob, lajalob bajche' bajlum tsa' bʌ chilbenti i yal. Che'ʌch ja'el a tat come wen ñʌmʌl ti guerra. Mach jijlic yic'ot i yonlel i soldadojob ti ili ac'ʌlel. 9Tic'ʌl mi puts'em ti mal ch'en. Mi tsa' bʌc' tsʌnsʌnti cha'tiquil uxtiquil a winicob che' woli jax to i tejchel jini guerra, mi caj i yʌlob: “Woli' mʌjlel i cha'an David. Wolix i jisañonla cha'an woli lac tsajcan Absalón”, che'ob. 10Anquese wen p'ʌtʌlob jini winicob bajche' bajlum, mi' cajelob ti bʌq'uen, come cʌmbilix i cha'an pejtelel israelob wen yujil guerra a tat yic'ot pejtelel i winicob. 11Jini cha'an mic subeñet, la' i tempañob i bʌ pejtelel israelob ti a tojlel, jini año' bʌ ti Dan c'ʌlʌl ti Beerseba. Yom wen cabʌl jini winicob che' bajche' i ji'il colem ja'. Che' jini mi caj a pʌyob majlel jatet, che'en. 12Mi caj lac tajob baqui jach añob. Mux caj lac pam ñumel ti' tojlelob che' bajche' mi' yajlel ye'eb ti pañimil. Che' jini ma'anix mi caj i colel David yic'ot i pi'ʌlob mi juntiquilic. 13Mi tsa' ochi i tajob i coltʌntel ti jump'ejl tejclum, che' jini pejtelel israelob mi caj i ch'ʌmob tilel lazo cha'an mi' jexbañob majlel i ts'ajquil tejclum. Mux i chojquel ti joctʌl jinto che' jocholix mi' cʌytʌl jini otot tac. Che' tsi' yʌlʌ Husai. 14Absalón yic'ot pejtelel jini israelob tsi' yʌlʌyob: Uts'at bajche' tsi' ña'ta Husai jini arquita. Mach uts'atic tsi' cʌn ña'ta Ahitofel, che'ob. Come lac Yum tsi' ña'ta i jem jini uts'at bʌ i t'an Ahitofel cha'an mi' yʌc' ti wocol Absalón.
15Jini cha'an Husai tsa' majli i laj suben jini motomaj Sadoc yic'ot Abiatar: Che'ʌch tsi' cha'le t'an jini Ahitofel ti' tojlel Absalón yic'ot ti' tojlel jini xñoxo' bʌ. Pero mach che'ic tsac subeyob. Absalón yic'ot x'e'telob i cha'an tsi' ñopoyoñob, che'en. 16Tsi' yʌlʌ ja'el: Jini cha'an yom mi la' se'ñun la' bʌ cha'an mi la' choc majlel suboñel ti' tojlel David, cha'an ma'anic mi' cʌytʌl ya' ti' ti' jini ja'. Wʌle ti ac'ʌlel yom mi' c'axel ti ora cha'an ma'anic mi' tsʌnsʌntel yic'ot pejtelel woli bʌ i pi'leñob majlel, che'en.
17Ti jim bʌ ora Jonatán yic'ot Ahimaas woli' pijtañob suboñel ya' ti' tojel jini ja' i c'aba' Rogel. Juntiquil criada tsa' majli i tsictesʌbeñob jini t'an, ame anic majch mi' q'uelob ti tejclum. Che' bʌ tsi' yubiyob jini cha'tiquilob, ti ora jach tsa' majli i subeñob David. 18Pero juntiquil ch'iton tsi' q'ueleyob. Tsa' majli i bʌc' suben Absalón, pero jini cha'tiquilob ti ora jach tsi' chucuyob loq'uel i yajñel. Tsa' c'otiyob ti' yotot juntiquil winic am bʌ ti Bahurim. Ya'an tocbil bʌ pozo ti patio ti' t'ejl i yotot. Ya' tsa' bʌc' ochiyob Ahimaas yic'ot Jonatán. 19Che' jini tsa' loq'ui ti otot i yijñam jini winic. Tsa' tili i mʌcben i ti' jini pozo. Tsi' ts'ita' p'ujp'u trigo ya' ti' pam. Jini cha'an ma'anic tsi' wis ña'tayob mi an majqui ochem ya'i. 20Che' bʌ tsa' c'otiyob i winicob Absalón ya' ti otot, tsi' c'ajtibeyob jini x'ixic: ¿Baqui tsa' majliyob Ahimaas yic'ot Jonatán? che'en. Jini x'ixic tsi' jac'ʌ: Tsa'ix c'axiyob ya' ti' junwejl ja', che'en. Ti ora jach tsa' majliyob jini winicob cha'an mi' sʌclañob. Che' ma'anic tsi' tajayob tsa' cha' sujtiyob ti Jerusalén. 21Che' cha' sujtemobix i winicob Absalón, tsa' cha' loq'uiyob Ahimaas yic'ot Jonatán. Tsa' majli i tsictesʌbeñob David chuqui woli' yujtel. Tsi' subeyob: Yom mi la' se'ñun la' bʌ cha'an mi la' c'axel ti ja', come Ahitofel woli' suben Absalón cha'an mi' bʌc' tilel i contrajiñet, che'ob. 22Ti ora tsa' cajiyob ti c'axel ti Jordán ja' David yic'ot pejtelel i winicob. Che' ti sʌc'ajel ma'anix majch tsa' cʌle mi juntiquilic.
23Che' bʌ tsi' q'uele Ahitofel ma'anic woli' jac'beñob i t'an, tsa' cha' sujti majlel ti' yotot ya' ti' tejclum. Tsa' ujti i wʌn q'uel pejtel chuqui an ti' yotot. Che' jini tsi' jich'i i bʌ. Tsa' chʌmi. Tsi' mucuyob ya' ba' tsa' mujqui i tat.
Guerra ti' tojlel David yic'ot Absalón
24Che' bʌ tsa' c'axi Absalón yic'ot israelob ya' ti Jordán ja', c'otemix David c'ʌlʌl ti Mahanaim. 25Absalón tsi' wa'choco ti e'tel Amasa ti' q'uexol Joab cha'an mi' cʌntan soldadojob. I tat Joab jiñʌch Itra jini ismael tsa' bʌ i pʌyʌ Abigail (i yalobil Nahas). Tsi' pi'le ja'el Sarvia (i ña' Joab). Jini Sarvia i yijts'iñʌch Abigail. 26Tsa' c'oti Absalón ti Galaad yic'ot pejtelel jini israelob. 27Che' bʌ tsa' c'oti David ti Mahanaim, tsa' tili i taj Sobi (i yalobil Nahas ch'oyol bʌ ti Rabá ba'an jini amoñob), yic'ot Maquir (i yalobil Amiel ch'oyol bʌ ti Lodebar), yic'ot Barzilai jini am bʌ ti Galaad ti Rogelim. 28-29Tsi' ch'ʌmbeyob tilel i majtan David, pojp tac, yic'ot tsuts, yic'ot taza tac, yic'ot poc' tac, yic'ot trigo, yic'ot cebada, yic'ot harina, yic'ot bu'ul, yic'ot lenteja, yic'ot chab, yic'ot lew, yic'ot queso. Tsi' yʌq'ueyob David yic'ot i pi'ʌlob cha'an mi' c'uxob, come tsi' ña'tayob mux i chʌmelob ti wi'ñal yic'ot tiquin ti' cha'an cabʌl xʌmbal.
Currently Selected:
2 SAMUEL 17: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.