2 SAMUEL 14
14
Joab tsi' cha'le wersa cha'an mi' cha' pʌy sujtel Absalón
1Joab tsi' yubi wolix i cha' mel i pusic'al jini rey cha'an Absalón. 2Tsi' pʌyʌ tilel juntiquil x'ixic wen p'ip bʌ i pusic'al ch'oyol bʌ ti Tecoa. Joab tsi' sube: Yom ma' mel a bʌ che' bajche' meba'. Che'ʌch yom ma' lʌp a pislel cha'an mi' tsictiyel i ch'ijiyemlel a pusic'al. Mach yomic ma' bon a bʌ ti xojocña bʌ perfume. Yom wen ch'ijiyem ma' pʌs a bʌ ti' tojlel jini rey che' bajche' meba' anix bʌ ora woli' yuc'tan i pi'ʌl. 3Yom ma' majlel ba'an jini rey cha'an ma' suben chuqui mic subeñet. Che' tsi' yʌlʌ Joab.
4Che' bʌ tsa' c'oti jini x'ixic ba'an jini rey, tsi' ñocchoco i bʌ ti' tojlel. Tsi' yʌlʌ: C rey, a wocolic p'untañon, che'en. 5-6Jini rey tsi' c'ajtibe: ¿Chuqui a wom? che'en. Jini x'ixic tsi' yʌlʌ: Joñon meba'onix. Anix ora tsa' chʌmi c ñoxi'al. Añob cha'tiquil calobilob. Tsa' majliyob ti paxyal ti cholel. Tsa' cajiyob ti leto. Come i bajñelob, ma'anic majqui tsi' tiq'uiyob. Juntiquil tsi' tsʌnsa i yeran. 7Awilan, pejtelel c pi'ʌlob woli' wersa subeñoñob cha'an mi cʌc' ti tsʌnsʌntel jini tsa' bʌ i tsʌnsa i yeran. Mi tsa' ujti bajche' jini, mij cʌytʌl tic bajñelil. Che' jini muq'uix i ñajʌyel i c'aba' c ñoxi'al. Che' tsi' yʌlʌ jini x'ixic. 8Jini rey tsi' sube: Cucux ti sujtel ti a wotot. Muq'uix caj c mel pejtelel chuqui tsa' subeyon, che'en. 9Jini x'ixic tsi' sube: Wocolix a wʌlʌ, c rey. Pejtelel jini mulil la' ajnic tic wenta quic'ot c pi'ʌlob. Mach yomic mi' wis ajñel jini mulil ti a wenta, che'en. 10Jini rey tsi' sube: Mi an majqui mi' chʌn cajel ti t'an ti a contra, yom ma' pʌybeñon tilel ilayi. Ma'anix chuqui mi caj i tumbeñet, che'en. 11Pero mach jasʌlic tsi' yubi jini x'ixic. Tsi' chʌn cha'le t'an: Ti wocol t'an mic subeñet, c rey, c'ajtibeñon i yutslel lac Yum Dios. Mach yomix mi' chʌn tic'lʌntel jini calobil cha'an i q'uexol tsa' bʌ i mele, che'en. Jini rey tsi' jac'ʌ: Melelʌch come cuxul lac Yum, ma'anic mi caj i yajlel mi junt'ujmic i tsutsel i jol, che'en.
12Jini x'ixic tsi' yʌlʌ: Awocolic, c rey, com to c subeñet yambʌ jump'ejl t'an, che'en. Jini rey tsi' yʌlʌ: Subu, che'en. 13Jini x'ixic tsi' yʌlʌ: ¿Chucoch mach che'ic ma' coltan pejtelel i winicob Dios? Che' bʌ tsa' wʌc'ʌ a t'an tic tojlel, tsa' bajñel tsictesa a mul, come ma'anic wola' cha' pʌy tilel jini puts'em bʌ a walobil. 14Isujm wersa mi lac chʌmel ti lac pejtelel. Lajalonla bajche' ja' mu' bʌ i yajlel ti lum, mach bʌ mejlix ti cha' lujchel. Mi ma'anic ma' bʌc' pʌy tilel Absalón, mux i junyajlel sajtel ti a tojlel. Pero Dios mi' sajcan majlel jini sajtemo' bʌ. 15Jini cha'an tsa' tili c subeñet pejtelel jini t'an, come c pi'ʌlob tsi' bʌc'tesayoñob. Jini cha'an tsac ña'ta tilel c pejcan jini rey. “Tic'ʌl mi muq'uix i jac'beñon c t'an”, cho'on tic pusic'al. 16Tsac ña'ta ja'el isujm muq'uix cajel a coltañon loq'uel ti' p'ʌtʌlel jini yomo' bʌ i jisañon quic'ot calobil ti' tojlel Israel i tejclum Dios. 17Jini cha'an mic subeñet, c yum, cha'an yom ma' wʌc' a t'an cha'an mi' cha' tilel i ñuclel c pusic'al, come reyet wʌle. Lajalet bajche' juntiquil i yángel Dios mu' bʌ mejlel i ña'tan chuqui wen yic'ot chuqui jontol. Jini cha'an la' ajnic a wic'ot lac Yum Dios. Che' tsi' yʌlʌ jini x'ixic.
18David tsi' sube jini x'ixic: Mach comic ma' wis mucbeñon mi ts'ita'ic jini mu' bʌ cajel j c'ajtibeñet, che'en. Jini x'ixic tsi' jac'ʌ: Muq'uix c laj subeñet, c rey, che'en. 19Jini rey tsi' c'ajtibe: ¿Mach ba jinic Joab tsa' bʌ i subeyet tilel ilayi? che'en. Jini x'ixic tsi' jac'be: Jincuyi. Isujm che' bajche' tsa' subeyon c rey. Joab tsi' chocoyon tilel. Tsi' laj cʌntesayon bajche' yom mic subeñet. 20Jini cha'an tsi' chocoyon tilel a winic Joab cha'an mi' q'uextʌyel a pusic'al. Cabʌl a ña'tʌbal che' bajche' juntiquil i yángel Dios. Wen a wujil chuqui an ti pañimil. Che' tsi' yʌlʌ jini x'ixic.
21Jini rey tsi' choco ti pʌyol Joab. Tsi' sube: Wʌle tsa'ix c ña'ta bajche' yom mic mel. Cucu, cha' pʌyʌ tilel Absalón, che'en. 22Joab tsi' ñocchoco i bʌ ti' tojlel rey. Tsi' yʌq'ue i yutslel i t'an. Joab tsi' yʌlʌ: Wʌle cujilix tsa'ix c taja i yutslel a pusic'al, c yum rey, come tsa'ix a melbeyon chuqui tsaj c'ajtibeyet, che'en. 23Ti ora tsa' majli Joab ti Gesur cha'an mi' pʌy tilel Absalón ti Jerusalén. 24Pero jini rey tsi' yʌlʌ: Che' mi' julel calobil, la' majlic ti' yotot. Mach comic mi' tilel i q'uelon, che'en. Jini cha'an che' bʌ tsa' c'oti Absalón, toj jach tsa' majli ti' yotot. Ma'anic tsa' majli ba'an jini rey.
Absalón tsi' contraji David
25Ti jim bʌ ora ma'anic yambʌ winic ti Jerusalén wen i t'ojol bʌ bajche' Absalón, come c'ʌlʌl ti' xin jol, c'ʌlʌl ti' mal i yoc, ma'anic chuqui wis leco. 26Junyajl ti jujump'ejl jab tsi' yʌc'ʌ ti loq'uel i jol, come tsa' wen tam'a. An i yalel i tsutsel i jol che' bajche' ojlil i cha'p'ejl kilo. 27Tsi' yila pañimil uxtiquil ch'iton bʌ i yalobil Absalón yic'ot juntiquil xch'oc i c'aba' Tamar. Che' colemix wen i t'ojol jax.
28Cha'p'ejl jab ya'an Absalón ti Jerusalén. Ma'anic tsi' wis q'uelbe i wut jini rey. 29Jini cha'an Absalón tsi' pʌyʌ tilel Joab cha'an mi' majlel i pejcan jini rey, pero Joab ma'anic tsi' jac'ʌ tilel ti' yotot Absalón. Ti' cha'yajlel tsi' cha' pʌyʌ, pero ma'anic tsi' wis jac'ʌ majlel Joab. 30Che' jini Absalón tsi' sube jini x'e'telob i cha'an: Cucula ti' jamil Joab ya' ba' pʌc'bil i cebada. Yom mi la' majlel la' wotsʌben c'ajc, che'en. Jini cha'an tsa' majliyob i winicob Absalón i yotsan c'ajc. 31Che' bʌ tsi' q'uele Joab pulemix i jamil, tsa' tili i pejcan Absalón. Tsi' sube: ¿Chucoch tsi' puluyob c jamil a winicob? che'en. 32Absalón tsi' jac'be: Come anix cha'yajl uxyajl tsac pʌyʌyet tilel cha'an mic choquet majlel ba'an rey, pero ma'anic tsa' jac'ʌ. Cucu c'ajtiben chucoch tsi' to'o chocoyon ti pʌyol ti Gesur. Come ñumen uts'at tsa'ic cʌleyon ti Gesur. Lolom jach mic to'ol ajñel ilayi ba' ma'anic mij q'uelben i wut rey. Mi añʌch c mul, la' i tsʌnsañon, che'en. 33Joab tsa' majli i suben jini rey chuqui tsa' ujti. David tsi' choco ti pʌyol Absalón. Che' bʌ tsa' c'oti Absalón ba'an jini rey, tsi' ñocchoco i bʌ. David tsi' ts'ujts'u Absalón.
Currently Selected:
2 SAMUEL 14: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.