2 REYES 5
5
Eliseo yic'ot Naamán
1Naamán jiñʌch i yum soldadojob ya' ti Siria. Tsi' q'uele ti ñuc jini rey. Lac Yum tsi' colta Naamán ti guerra cha'an mi' mʌjlel i cha'an. Wen ñuc Naamán, pero tsa' coli leco bʌ i c'amʌjel ti' pʌchʌlel. 2Junmojt soldadojob tsa' loq'uiyob ti Siria. Che' bʌ tsa' sujtiyob, tsi' xujch'iyob majlel xch'ocob ch'oyolo' bʌ ti Israel. Juntiquil xch'oc tsa' caji ti e'tel ti' yotot Naamán yic'ot i yijñam. 3Jini xch'oc tsi' sube i yijñam Naamán: Muq'uic i majlel c yum Naamán ba'an jini x'alt'an ya' ti Samaria, mi mejlel i lajmesʌben leco bʌ i tsoy, che'en. 4Naamán tsa' majli i suben jini rey chuqui tsi' yʌlʌ jini xch'oc ch'oyol bʌ ti Israel. 5Jini rey ti Siria tsi' sube Naamán: Yom ma' majlel a q'uel jini x'alt'an. Mi caj c chocben majlel jun jini rey ti Israel, che'en. Che' jini tsa' loq'ui majlel Naamán. Tsi' ch'ʌmʌ majlel plata am bʌ i tojol che' bajche' lujunc'al yic'ot lujump'ejl i yuxc'al mil (250,000) peso, yic'ot oro am bʌ i tojol jo'lujunc'al i cha'bajc' yic'ot lujump'ejl i yuxc'al mil (750,000) peso, yic'ot lujumpajc bujcʌl.
6Che' ja'el tsi' ch'ʌmʌ majlel jini jun cha'an mi' yʌq'uen jini rey ti Israel. Ya' ti jun tsi' yʌlʌ: Com ma' ña'tan wolic chocbeñet tilel ili c winic Naamán cha'an ma' lajmesʌben leco bʌ i tsoy, che'en. 7Che' bʌ tsa' ujti i q'uel jini jun jini rey ti Israel, tsi' jet' tsili i bujc. Tsi' yʌlʌ: ¿Dioson ba cha'an mi cʌq'uen i cuxtʌlel winicob, cha'an mi cʌc'ob ti chʌmel ja'el? ¿Chucoch mi' choc tilel ba' añon juntiquil winic am bʌ leco bʌ i tsoy? Q'uelela bajche' woli' ña'tan i jop'beñon c mul cha'an mi' contrajiñon. Che' tsi' yʌlʌ jini rey ti Israel.
8Tsi' tsili i bujc. Che' bʌ tsi' yubi Eliseo, tsi' choco ti subentel jini rey: ¿Chucoch tsa' tsili a bujc? La' tilic Naamán ba' añon cha'an mi' ña'tan añʌch x'alt'an ti Israel, che'en Eliseo. 9Tsa' majli Naamán yic'ot i caballo tac yic'ot carreta tac. Tsa' c'oti ti wa'tʌl ti' ti' i yotot Eliseo. 10Eliseo tsi' choco majlel i winic cha'an mi' suben: Cucu ti ts'ʌmel ti Jordán. Wucyajl yom ma' choc ochel a bʌ ti ja'. Che' jini mi caj i lajmel a tsoy. Sʌc mi caj a cʌytʌl, che'en. 11Tsa' wen mich'a Naamán. Tsa' caji ti majlel. Tsi' yʌlʌ: Tsac lon ña'ta mi cajel i tilel i q'uelon. Mi caj i pejcan i Yum Dios. Mi caj i tich' i c'ʌb tic pam ya' ba' wa'alon. Che' jini mi' caj ti lajmel jini c tsoy, che'en. 12Jini Abana ja' yic'ot Farfar ja' mu' bʌ i ñumel ti Damasco, ¿mach ba ñumen wenic che' bajche' pejtelel ja' ti Israel? Mi tsa' majli c poc c bʌ ya' ti jini ja', ¿mach ba anic mic lajmel ja'el? che'en. Jini cha'an wen mich' tsa' caji ti majlel. 13Pero jini x'e'telob i cha'an tsi' subeyob: C yum lojon, tsa'ic i subeyet jini x'alt'an chuqui wocol ti melol, ¿mach ba anic tsa' mele? Jini cha'an yom ma' mel anquese mach wocolic jini tsa' bʌ i subeyet. Tsa' jach i subeyet cha'an ma' poc a bʌ ya' ti ja'. Che' jini mi caj a lajmel, che'ob. 14Jini cha'an tsa' majli Naamán ya' ti Jordán. Wucyajl tsi' choco ochel i bʌ che' bajche' tsi' sube jini x'alt'an Eliseo. Che' jini tsa' junyajlel lajmi jini leco bʌ i tsoy am bʌ ti' bʌc'tal. Lajal tsa' cʌle che' bajche' i pʌchʌlel alʌl.
15Che' lajmenix, tsa' cha' majli ba'an i winic Dios. Tsa' c'otiyob ti wa'tʌl ti' tojlel jini x'alt'an. Naamán tsi' sube Eliseo: Cujilix ma'anix yambʌ Dios ti pañimil, cojach ti Israel. Jini cha'an a wocolic yom ma' ch'ʌm a majtan woli bʌ c pʌsbeñet, come a winicon, che'en Naamán. 16Eliseo tsi' jac'ʌ: Ti' c'aba' jini cuxul bʌ lac Yum am bʌ quic'ot, ma'anic mi caj c ch'ʌm, che'en. Naamán tsi' wersa sube cha'an mi' ch'ʌm, pero Eliseo ma'anic tsi' jac'ʌ. 17Naamán tsi' sube: Awocolic aq'ueñon cha'cujch a lum che' jini, cha'an mic mel pulʌntib. Come ma'anix mi caj cʌq'uen i majtan yambʌ dios, cojach mi caj cʌq'uen i majtan jini cuxul bʌ Dios. 18La' i ñusʌbeñon c mul lac Yum Dios che' wersa mij coltan c rey ba' ora mi' yochel ti' templo Rimón cha'an mi' ch'ujutesan i dios. Che' mi' licchocon i bʌ tij quejlab, la' i ñusʌbeñon c mul lac Yum Dios che' mij c'uchchocon c bʌ ja'el quic'ot c rey ya' ti' templo Rimón. 19Eliseo tsi' sube: Cucu ti' ñʌch'tʌlel a pusic'al, che'en. Tsa' majli Naamán.
20Giezi jini x'e'tel i cha'an Eliseo, i winic Dios, tsa' caji i ña'tan ti' pusic'al: Ma'anic chuqui tsi' ch'ʌmʌ c yum ti pejtelel majtañʌl tsa' bʌ i ch'ʌmʌ tilel Naamán. Wʌle mi caj c majlel ti ajñel cha'an mic ch'ʌmben ts'ita' jini majtañʌl, che'en. 21Jini cha'an Giezi tsa' majli ti ajñel ba'an Naamán. Che' bʌ tsi' sutq'ui i wut Naamán, tsi' can q'uele woli' tilel ti ajñel. Che' jini tsa' jubi ti' carreta cha'an mi' pejcan: ¿Chuqui tsa' ujti? ¿Uts'at ba? che'en. 22Giezi tsi' jac'ʌ: Uts'at cu, che'en. Jini c yum tsi' chocoyon tilel cha'an mic subeñet tsa' c'otiyob cha'tiquil ch'iton x'alt'añob ch'oyolo' bʌ ti Efraín wits. Jini cha'an a wocolic aq'ueñon plata jo'p'ejl i cha'c'al mil (25,000) peso, yic'ot cha'pajc jini bujcʌl, che'en Giezi. 23Naamán tsi' yʌlʌ: Uts'at, a wocolic ch'ʌmʌ lujump'ejl i yuxc'al mil (50,000) peso jini plata, che'en. Tsi' xiq'ui cha'an mi' ch'ʌm. Che' jini tsi' but'be jini plata ti cha'p'ejl mucujc. Tsi' cʌchbe i ti'. Tsi' yʌq'ue ja'el cha'pajc bujcʌl. Tsi' choco majlel cha'tiquil i winic cha'an mi' cuchbeñob majlel ti' tojel i wut. 24Che' bʌ tsa' c'oti ti bujtʌl che' ñajt to i yotot Eliseo, Giezi tsi' ch'ʌmʌ jini majtañʌl. Tsi' subeyob jini winicob cha'an mi' cha' majlelob ba'an i yum. Giezi tsi' loto jini cha'p'ejl mucujc plata ya' ti' mal i yotot. 25Che' jini tsa' majli ba'an i yum. Che' bʌ tsa' ochi ti' yotot, Eliseo tsi' c'ajtibe: ¿Baqui tsajniyet? che'en. Giezi tsi' jac'ʌ: Ma'anic ba' tsajniyon, che'en. 26Eliseo tsi' sube: ¿Mach ba tsa'ic j q'ueleyet tic ch'ujlel che' bʌ tsajniyet ba'an Naamán, che' bʌ tsa' jubi ti' carreta cha'an mi' pejcañet? Mach i yorajlelic wʌle cha'an mi' ch'ʌjmel plata, yic'ot bujcʌl, yic'ot aceite, yic'ot ts'usub, yic'ot tiñʌme', yic'ot wacax, yic'ot mozojob. 27Jini cha'an mi caj i c'axel ti a bʌc'tal i tsoy Naamán cha'an mi' toyet yic'ot a p'olbalob ti pejtelel ora, che'en. Che' bʌ tsa' majli Giezi, tsa' loq'ui leco bʌ i tsoy ti' pʌchʌlel, wen sʌsʌc bajche' i ña'al tsʌñal.
Currently Selected:
2 REYES 5: ctuBI
Highlight
Share
Compare
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.
