2 REYES 17

Tsa' jisʌnti Samaria

1Oseas, i yalobil Ela, tsi' teche i ye'tel ti Israel che' lajchʌmp'ejlix jab i ye'tel Acaz ya' ti Judá. Bolomp'ejl jab tsi' cha'le i yumʌntel ti Samaria. 2Tsi' mele jontolil, pero mach lajalic bajche' tsi' meleyob yambʌ reyob ti Israel.

3Salmanasar jini rey ti Asiria tsa' tili i contrajin Oseas ti guerra. Oseas tsa' caji i yuman Salmanasar. Tsi' chocbe majlel tojoñel. 4Salmanasar, jini yumʌl ti Asiria, tsi' yubi bajche' woli' ña'tan i tʌts' i bʌ Oseas ti' wenta Asiria. Oseas tsi' choco majlel suboñel ba'an So jini rey bʌ ti Egipto. Ma'anix tsi' chʌn chocbe majlel tojoñel jini rey ti Asiria che' bajche' tsi' mele ti yan tac bʌ jab. Jini cha'an jini rey ti Asiria tsi' chucu Oseas. Tsi' yotsa ti mʌjquibʌl.

5Jini rey ti Asiria tsi' cha'le xʌmbal ñumel ti pejtelel i lumal Israel yic'ot i soldadojob. Uxp'ejl jab tsi' joy mʌcta Samaria. 6Che' bolomp'ejl jab i ye'tel Oseas, tsa' mʌjli i cha'an jini rey ti Asiria. Tsa' ochi ti Samaria. Cʌchʌl tsi' pʌyʌ majlel jini israelob c'ʌlʌl ti Asiria. Tsi' yotsayob ya' ti Halah, yic'ot ti Habor ti' tojel jini colem ja' i c'aba' Gozán, yic'ot ya' ti colem tejclum tac am bʌ ti Media.

7Tsa' ujti pejtelel iliyi cha'an ti' caj i mul jini israelob ti' wut lac Yum Dios tsa' bʌ i loc'sayob ti' lumal egiptojob ti' p'ʌtʌlel Faraón rey bʌ ti Egipto. Tsi' cʌyʌyob Dios. Tsi' ch'ujutesayob jini melbil tac bʌ mach bʌ Diosic. 8Tsi' ñopoyob i mel che' bajche' tsi' meleyob jini winicob x'ixicob ts'a'lebilo' bʌ ti lac Yum tsa' bʌ wʌn chojquiyob loq'uel ti jini lum. 9An cabʌl chuqui tsi' meleyob ti mucul jach ti' contra lac Yum Dios. Tsi' melbeyob i pulʌntib i dioste' ti pejtelel i lumal Israel. 10Tsi' meleyob wa'al bʌ xajlel tac yic'ot dioste' tac ya' ti bujbujtʌl, yic'ot ti yebal jini yʌxte' ti pejtelel i lumal. 11Tsi' pulbeyob i majtan diostac ya' ti bujbujtʌl che' bajche' tsi' meleyob jini winicob tsa' bʌ i jisayob lac Yum ti' tojlel Israel. Cabʌl tsi' techbeyob i mich'ajel lac Yum ti' caj pejtelel i jontolil. 12Tsi' ch'ujutesayob dios tac, anquese tic'bil i cha'an lac Yum.

13Pero lac Yum tsi' chʌn tsictesʌbeyob i mul jini israelob yic'ot Judá. Tsi' chocbeyob tilel jini x'alt'añob yic'ot jini cʌntesʌbilo' bʌ ti Dios tsa' bʌ i subeyob: “Cʌyʌx la' mul. Jac'benla c t'an yic'ot c mandar che' bajche' tsac subeyob la' ñojte'elob ti' tojlel jini x'alt'añob. Che'ʌch woli yʌl lac Yum”, che'ob. 14Pero ma'anic tsi' jac'beyob. Wen tsʌtsob jax i pusic'al che' bajche' i ñojte'elob mach bʌ anic tsi' ñopoyob lac Yum Dios. 15Tsi' ñusʌbeyob i mandar lac Yum yic'ot jini xuc'ul bʌ t'an tsa' bʌ i mele yic'ot i ñojte'elob. Ma'anic tsi' jac'beyob i t'an. Tsa' jach i bajñel sajcayob jini lolom tac bʌ am bʌ ti pañimil. Tsa' sojquiyob. Lajal tsi' meleyob che' bajche' i tilel mi' melob jini mach bʌ i cʌñʌyobic Dios, anquese tic'bilob ti Dios. 16Tsi' ñusʌbeyob pejtelel i mandar i Yum Dios. Tsi' bajñel meleyob i diosob ti oro, cha'cojt wacax yic'ot yantac bʌ dios quisintic jax bʌ ti q'uelol. Tsi' ch'ujutesayob jini q'uin, yic'ot uw, yic'ot ec'. Tsi' ch'ujutesayob Baal ja'el. 17Tsi' puluyob ti c'ajc jini ch'iton bʌ yic'ot xch'oc bʌ i yalobilob cha'an i majtan Moloc. Tsi' pejcayob jini xch'ʌcojelob yic'ot xtic'layajob. Tsi' junyajlel cʌyʌyob i bijlel Dios cha'an mi' melob chuqui leco ti' wut lac Yum cha'an mi' techbeñob i mich'ajel. 18Jini cha'an lac Yum tsi' chocoyob loq'uel ti' tojlel. Cojach tsa' cʌle jini junmojt am bʌ ti Judá.

19Pero jini año' bʌ ti Judá ja'el ma'anic tsi' jac'beyob i mandar lac Yum Dios. Lajal tsi' meleyob che' bajche' tsi' meleyob jini israelob. 20Jini cha'an lac Yum tsi' cʌyʌ jini israelob. Tsi' chocbeyob tilel wocol. Tsi' yʌc'ʌyob ti' c'ʌb i contrajob cha'an mi' chojquelob loq'uel ti' tojlel. 21Come tsi' t'oxoyob i bʌ jini israelob ti' tojlel i p'olbal David. Jini lujunmojt israelob tsi' wa'chocoyob ti rey Jeroboam (i yalobil Nabat) tsa' bʌ i xiq'uiyob ti mulil cha'an mi' cʌyob i bijlel lac Yum. Tsi' yʌsayob ti ñuc bʌ i sajtemal. 22Jini israelob tsi' tsajcʌbeyob pejtelel i sajtemal Jeroboam. Ma'anic tsi' cʌyʌyob i mul. 23Jini cha'an lac Yum tsi' wets'eyob loq'uel che' bajche' tsi' subeyob jini x'alt'añob i cha'an. Jini cha'an tsa' cʌjchiyob majlel jini israelob c'ʌlʌl ti Asiria ba' chumulob c'ʌlʌl wʌle.

Jini asiriajob tsi' cha'leyob chumtʌl ya' ti Samaria

24Jini rey ti Asiria tsi' pʌyʌ tilel winicob ch'oyolo' bʌ ti Babilonia, yic'ot ti Cuta, yic'ot ti Ava, yic'ot ti Hamat, yic'ot ti Sefarvaim, cha'an mi' yʌc'ob ti chumtʌl ya' ti Samaria ti' q'uexol jini israelob. Tsi' ch'ʌmʌyob ti' wenta Samaria yic'ot pejtel i tejclum tac Israel. 25Che' bʌ tsa' cajiyob ti chumtʌl ya'i, ma'anic tsi' ch'ujutesayob lac Yum. Jini cha'an tsi' choco tilel bajlum ti' tojlelob cha'an mi' lamital jisañob. 26Jini winicob tsi' chocbeyob ti subentel jini rey ya' ti Asiria: Tsa' tiliyon lojon ti chumtʌl ti Samaria, pero mach j cʌñʌyic lojon i dios jini lum yic'ot i mandar. Tsi' choco tilel bajlum cha'an mi' jisañon lojon, come ma'anic wolic ch'ujutesan lojon, che'ob. 27Jini rey ti Asiria tsi' yʌc'ʌ i t'an cha'an mi' cha' chojquel sujtel ti Samaria motomaj tsa' bʌ pʌjyi loq'uel ti Samaria cha'an mi' cʌntesañob bajche' an i dios jini lum yic'ot i mandar. 28Jini cha'an tsa' c'oti ti Samaria juntiquil motomaj tsa' bʌ cʌjchi majlel. Tsa' caji i chumtʌl ya' ti Betel. Tsa' caji i cʌntesan winicob bajche' yom mi' ch'ujutesañob lac Yum.

29Pero jini winicob ch'oyolo' bʌ ti Asiria tsi' chʌn ch'ujutesayob i dios tac. Tsi' yʌc'ʌyob ya' ti' yotlel tsa bʌ i meleyob jini samaritanojob ti bujbujtʌl. 30Jini babiloniajob tsi' diosiyob jini Sucotbenot. Jini ch'oyolo' bʌ ti Cuta tsi' diosiyob jini Nergal. Jini ch'oyolo' bʌ ti Hamat tsi' diosiyob Asima. 31Jini aveojob tsi' diosiyob Nibhaz yic'ot Tartac. Jini ch'oyolo' bʌ ti Sefarvaim tsi' puluyob ti c'ajc i yalobilob cha'an mi' ch'ujutesañob jini dios Adramelec yic'ot Anamelec. Jiñʌch tsa' bʌ i diosiyob Sefarvaim.

32Tsi' ch'ujutesayob lac Yum ja'el. Pero tsi' bajñel wa'chocoyob i motomaj cha'an mi' pulbeñob i majtan ya' ti pulʌntib tac am bʌ ti bujbujtʌl. 33Tsi' ch'ujutesayob lac Yum, pero tsi' chʌn ch'ujutesayob i diosob ja'el che' bajche' i tilel ti' lumal ba' ch'oyolob. 34C'ʌlʌl ti ili ora mi' chʌn melob che' bajche' jini. Ma'anic mi' bʌc'ñañob lac Yum. Ma'anic mi' jac'beñob i t'an yic'ot i mandar che' bajche' lac Yum tsi' cʌntesa i p'olbal Jacob tsa' bʌ otsʌbenti i c'aba' Israel. 35Come lac Yum tsi' yʌq'ueyob xuc'ul bʌ i t'an. Tsi' subeyob: Mach la' bʌc'ñan yambʌ dios. Mach la' ch'ujutesan. Mach yomic mi la' pulben i majtan. 36Ch'ujutesañon, come la' Yumon tsa' bʌ c loc'sayetla ti Egipto ti cabʌl c p'ʌtʌlel. Bʌc'ñañon. Pulbeñon c majtan. 37Yom chʌn c'ajal la' cha'an ti pejtelel ora jini c mandar yic'ot c t'an yic'ot la' tic'ol, yic'ot la' cʌntesʌntel tsa' bʌ cʌc'ʌ ti ts'ijbuntel cha'an mi la' jac'. Mach yomic mi la' bʌc'ñan yambʌ dios. 38Mach yomic mi' wis ñajʌyel la' cha'an ti pejtelel ora jini xuc'ul bʌ c t'an tsa' bʌ cʌq'ueyetla. Mach mi la' ch'ujutesan yambʌ dios. 39Pero yom mi la' chʌn bʌc'ñañon, come la' Yumon la' Dioson. Tsaj coltayetla loq'uel ti' tojlel pejtelel la' contrajob, che'en. 40Pero ma'anic tsi' jac'ʌyob. Tsi' cha'leyob che' bajche' ti ñaxan. 41Jini winicob ch'oyolo' bʌ ti Babilonia tsi' bʌc'ñayob lac Yum, pero tsi' chʌn ch'ujutesayob i diosob ja'el. C'ʌlʌl wʌle che'ʌch mi' chʌn melob i p'olbalob che' bajche' tsi' meleyob i ñojte'elob.

Currently Selected:

2 REYES 17: ctuBI

Highlight

Compare

Copy