2 REYES 14
14
I yumʌntel Amasías
(2 Cr. 25.1-28)
1Che' ti' cha'p'ejlel jab i ye'tel jini rey Joás ya' ti Israel, tsa' caji i tech i yumʌntel jini rey Amasías ti Judá. 2An jo'p'ejl i cha'c'al (25) i jabilel che' bʌ tsa' ochi ti rey Amasías. Tsi' cha'le i ye'tel bolomp'ejl i cha'c'al (29) jab ya' ti Jerusalén. I c'aba' i ña' jiñʌch Joadán ch'oyol bʌ ti Jerusalén. 3Amasías tsi' mele chuqui wen ti' tojlel lac Yum, anquese mach wen lajalic tsi' mele bajche' i ñojte'el David. Pero tsi' mele che' bajche' Joás i tat. 4Pero ma'anic tsi' junyajlel jeme jini pulʌntib tac am bʌ ti bujbujtʌl. Jini cha'an jini israelob tsi' chʌn puluyob majtañʌl tac yic'ot pom ya' ti pulʌntib. 5Che' wen anix ti' ye'tel Amasías, tsi' tsʌnsa jini winicob tsa' bʌ i tsʌnsa Joás i tat. 6Ma'anic tsi' tsʌnsʌbeyob i yalobilob, come ya' ti' juñilel i mandar Moisés tsi' yʌlʌ Lac Yum mach yomic mi' tsʌnsʌntel jini tatʌl cha'an i mul i yalobilob, mi jinic alobob mi' tsʌnsʌntelob cha'an i mul tatʌlob, pero ti jujuntiquil mi' chʌmel cha'an i bajñel mul. Che'ʌch ts'ijbubil. 7Amasías tsi' tsʌnsa lujuntiquil ti mil año' bʌ ti Edom ya' ti joctʌl i c'aba' Ats'am. Tsi' ch'ʌmʌ jini tejclum Sela che' bʌ tsa' mʌjli i cha'an ti guerra. Tsi' cha' otsʌbe i c'aba' Jocteel. Che'ʌch i c'aba' c'ʌlʌl wʌle.
8Amasías tsi' choco majlel suboñel ba'an Joás jini rey ti Israel. Tsi' sube: La' laj contrajin lac bʌ ti guerra, che'en. 9Joás rey bʌ ti Israel tsi' chocbe ili lajiya Amasías rey bʌ ti Judá. Tsi' sube: Jini ch'ix am bʌ ti Líbano tsi' sube jini ch'ujte': “Aq'ueñon xch'oc bʌ a walobil”, che'en jini ch'ix. Pero tsa' ñumi majlel jini jontol bʌ bʌte'el ya' ti Líbano. Tsi' laj jisa jini ch'ix. 10Isujm tsa' jisa Edom. Wʌle chan wola' mel a bʌ cha'an tsa' mʌjli a cha'an. Pero ajñen ti a wotot ba' tijicñayet. ¿Chucoch ma' bajñel sajcan a wocol, cha'an ma' jilel yic'ot pejtel a pi'ʌlob ti Judá? che'en Joás rey bʌ ti Israel. 11Pero Amasías ma'anic tsi' jac'ʌ i tic'ol. Jini cha'an tsa' letsi tilel Joás rey bʌ ti Israel cha'an mi' contrajin. Tsi' tajayob i bʌ ti guerra ti jump'ejl i tejclum ti Judá i c'aba' Betsemes. 12Tsa' wen mʌjli i cha'an israelob. Jini año' bʌ ti Judá tsa' puts'iyob ti' tojlel jini israelob. Ti jujuntiquilob tsa' sujtiyob ti' yotot. 13Joás rey bʌ ti Israel tsi' wersa chucu Amasías rey bʌ ti Judá. Tsa' majli yic'ot i soldadojob ti Jerusalén. Tsi' jemeyob jini ts'ajc am bʌ ti' ti' jini puerta i c'aba' Efraín c'ʌlʌl ti puerta i c'aba' i Xujc, lujunc'al metro ti pejtelel. 14Joás tsi' wersa pʌyʌ majlel lamital judíojob ti cʌjchel. Tsi' laj ch'ʌmʌ jini oro yic'ot plata, yic'ot pejtelel mu' bʌ i c'ʌjñel ti' yotot lac Yum, yic'ot i chubʌ'an tac jini rey Amasías. Tsa' cha' sujti majlel ti Samaria.
15Ts'ijbubil ti' juñilel i reyob Israel pejtelel i ye'tel tsa' bʌ i mele Joás, yic'ot bajche' tsa' ujti guerra ti' contra Amasías rey bʌ ti Judá. 16Tsa' chʌmi Joás che' bajche' i tatob. Tsa' mujqui ya' ba' mucul i reyob Israel ya' ti Samaria. Tsa' caji i cha'len yumʌl Jeroboam ti' q'uexol i tat. 17Amasías jini rey bʌ ti Judá cuxul to tsa' ajni yambʌ jo'lujump'ejl jab che' chʌmenix Joás. 18Ts'ijbubil ti' juñilel i reyob Judá pejtelel i melbal Amasías. 19I winicob Amasías tsa' caji i contrajiñob ya' ti Jerusalén. Jini cha'an tsa' puts'i majlel Amasías ti Laquis. Pero jini winicob tsi' yajñesayob majlel. Tsi' tsʌnsayob ya' ti Laquis. 20Tsi' ch'ʌmbeyob sujtel i bʌc'tal ti caballo. Tsa' mujqui ya' ba' muculob i tatob ya' ti Jerusalén i tejclum David. 21Pejtelel jini winicob ti Judá tsi' wa'chocoyob ti rey Azarías (i yalobil Amasías) ti' q'uexol i tat. An wʌclujump'ejl (16) i jabilel Azarías che' bʌ tsa' ochi ti rey. 22Azarías tsi' cha' wen mele jini tejclum i c'aba' Elat. Tsi' cha' otsa ti' wenta Judá.
I yumʌntel jini Jeroboam
23Che' ti' jo'lujump'ejlel jab i ye'tel Amasías rey bʌ ti Judá, tsa' caji ti yumʌntel Jeroboam (i yalobil Joás) ti Israel. Jeroboam tsi' cha'le yumʌl jump'ejl i yuxc'al (41) jab ya' ti Samaria. 24Tsi' mele jontolil ti' wut lac Yum che' bajche' tsi' mele jini ñaxan bʌ rey Jeroboam (i yalobil bʌ Nabat) tsa' bʌ i yʌsa ti mulil israelob. 25Jeroboam tsi' cha' ch'ʌmʌ ti' wenta i lumal Israel c'ʌlʌl ti' yochib Hamat c'ʌlʌl ti jini colem ñajb i c'aba' Ats'am, che' bajche' tsi' yʌlʌ lac Yum i Dios Israel, che' bajche' tsi' yʌlʌ jini x'e'tel i cha'an Dios i c'aba' Jonás i yalobil Amitai. Jiñʌch jini x'alt'an ch'oyol bʌ ti Gathefer. 26Lac Yum Dios tsi' q'uele wen cabʌl i wocol jini israelob. Ma'anic mi juntiquilic winic tsa' bʌ mejli i coltañob. 27Pero lac Yum ma'anic tsi' ña'ta i junyajlel jisan jini israelob. Tsi' p'ʌtesa Jeroboam cha'an mi' coltañob. 28Ts'ijbubil ti' juñilel i reyob Israel pejtelel i melbal Jeroboam, yic'ot pejtelel i ñuclel yic'ot bajche' tsa' ujti guerra ba' ora Israel tsi' cha' ch'ʌmʌ ti' wenta jini Damasco yic'ot Hamat, jini tejclum tac tsa' bʌ cʌn ochi ti' wenta Judá. 29Tsa' chʌmi Jeroboam. Tsa' mujqui ya' ba' muculob jini reyob ti Israel. Tsa' caji i cha'len yumʌntel Zacarías ti' q'uexol i tat.
Currently Selected:
2 REYES 14: ctuBI
Highlight
Share
Compare
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.
