1 SAMUEL 21
21
Tsa' puts'i loq'uel David ba'an Saúl
1Tsa' majli David ti Nob ya' ba'an jini motomaj Ahimelec. Tsa' toj sajti i pusic'al Ahimelec che' bʌ tsi' taja. Tsi' sube: ¿Chucoch wola' tilel ti a bajñelil? ¿Chucoch ma'anic majqui woli' pi'leñet tilel? che'en jini motomaj Ahimelec. 2David tsi' jac'be: Jini rey tsi' yʌq'ueyon tic wenta junchajp que'tel. Mach yomic i suben yambʌ winic jini que'tel woli bʌ i yʌq'ueñon tic wenta. Jini cha'an woli' chocon tilel. Jini cha'an tsac choco majlel c winicob. Tsac subeyob baqui yom mic cha' tempan lojon c bʌ. 3Wʌle, ¿chuqui an a cha'an? Aq'ueñon jo'q'uejl caxlan waj mi an a cha'an, o mi ñumen an a cha'an, a wocolic, aq'ueñon. Che' tsi' yʌlʌ David. 4Jini motomaj tsi' jac'be: Ma'anic c cha'an jini caxlan waj mu' bʌ mejlel a c'ux. Cojach jini ch'ujul bʌ caxlan waj i cha'an lac Yum. Mi mejlel cʌq'ueñetla mi tsa'ix i cʌntayob i bʌ a winicob ti' tojlel i yijñamob, che'en. 5David tsi' jac'be: Isujm, ñajt añob quijñam lojon tic tojlel lojon che' bajche' c tilel che' woliyon lojon ti xʌmbal. Sʌcon lojon. Ch'ujul c bʌc'tal lojon. Ñumen ch'ujul wʌle ti ili xʌmbal, che'en. 6Jini cha'an jini motomaj tsi' yʌq'ue jini ch'ujul bʌ caxlan waj, come ma'anic yambʌ waj, jini jach mu' bʌ i pʌsbentel lac Yum. Ujtel to i tʌts'ob ili waj cha'an tsi' yʌc'ʌyob yambʌ waj ticʌw bʌ ti' tojlel lac Yum. 7Ti jim bʌ q'uin ya' woli' sʌq'uesan i bʌ ti' tojlel lac Yum juntiquil i yaj e'tel Saúl ch'oyol bʌ ti Edom, i c'aba' Doeg. Jiñʌch ñaxan bʌ xcʌnta wacax i cha'an Saúl.
8David tsi' c'ajtibe Ahimelec: ¿Mach ba anic a cha'an lanza mi espada? come wersa yom mi' yujtel ti ora i ye'tel jini rey. Jini cha'an ma'anic tsa' mejli c ch'ʌm tilel quespada yic'ot yambʌ e'tijibʌl cha'an guerra, che'en. 9Jini motomaj tsi' sube: Cojach i yespada jini Goliat jini filisteo tsa' bʌ a tsʌnsa ya' ti joctʌl ti Ela. Wʌ' pixbil c cha'an ti pisil ti' pat i bujc motomaj. Mi a wom a ch'ʌm, ch'ʌmʌ, come ma'anic yambʌ, che'en. Tsi' yʌlʌ David: Ma'anic yambʌ lajal bajche' jini. Aq'ueñon, che'en.
10Tsa' puts'i David ti jim bʌ q'uin come tsi' bʌc'ña Saúl. Tsa' majli ba'an Aquis jini rey ti Gat. 11I winicob Aquis tsi' yʌlʌyob: ¿Mach ba jinic David? Tsi' cha'leyob c'ay yic'ot son che' bʌ tsi' yʌlʌyob: “Saúl tsi' lowo ti mil ti mil, pero David tsi' lowo ti pic ti pic”, che'ob. Che' tsi' yʌlʌyob jini winicob. 12David tsi' yʌc'ʌ ti' pusic'al jini t'an. Tsa' ochi cabʌl i bʌq'uen ti' tojlel Aquis jini rey ti Gat. 13Tsi' cuyu i bʌ che' bajche' sojquem i jol. Tsi' mele che' bajche' sojquem bʌ winic ti' tojlelob. Tsi' lajchi tac i ti' tac otot. Tsi' poj loc'sa tac i ya'lel i yej ti' tsucti'. 14Aquis tsi' sube i winicob: Q'uelela ili winic. Sojquem i jol. ¿Chucoch tsa' la' pʌyʌ tilel ilayi? 15¿Mach ba añobic sojquemo' bʌ i jol ti lac lumal? ¿Chucoch tsa' la' pʌybeyon tilel iliyi? ¿Yom ba mi' tilel ti chumtʌl ti lac lumal? che'en Aquis.
Currently Selected:
1 SAMUEL 21: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.