1 REYES 6
6
Salomón tsi' wa'choco jini Templo
(2 Cr. 3.1-14)
1Anix jumbajc' yic'ot chʌnc'al jab che' bʌ loq'uemobix jini israelob ti Egipto. Wolix i majlel ti chʌmp'ejl jab i yumʌntel jini rey Salomón. Ti jini jach bʌ jab Salomón tsa' caji i wa'chocon i yotot lac Yum. 2Jini i p'isol Templo jiñʌch lujump'ejl i cha'c'al (30) metro i tamlel, yic'ot lujump'ejl metro i xujc. Jo'lujump'ejl (15) metro i chanlel. 3An i lejch' otot ya' ti' tojel jini Templo, lujump'ejl metro i tamlel lajal bajche' i xujc otot, yic'ot jo'p'ejl metro i xujc jini coyerol. 4Tsi' mele q'ueloñib ti Templo. Tsi' yʌq'ue tac i majc ti jumpat yic'ot yambʌ ti mal. 5Tsi' mele jini tsalʌl tac ti jujunwejl i tamlel jini Templo, yic'ot ti' joytilel jini ts'ajc ti jumpat. 6I xujc jini tsalʌl tac am bʌ ti yebal jiñʌch ojlil i yuxp'ejl metro. I xujc jini tsalʌl tac am bʌ ti' cha'lajmlel otot jiñʌch uxp'ejl metro. I xujc jini tsalʌl am bʌ ti' yuxlajmlel otot jiñʌch ojlil i chʌmp'ejl metro. I cucujlel tac jini otot bichbich ñumen ts'ita' tac, cha'an ya'i mi' yʌc'ob i cucujlel jini tsalʌl am bʌ ti' cha'wejlel jini Templo.
7Ya' baqui tsi' c'oloyob loq'uel jini xajlel tsi' toj'esayob. Jini cha'an che' bʌ tsi' wa'chocoyob, ma'anic tsi' c'ʌñʌyob martillo mi jacha mi yambʌ tsucul taq'uin.
8Ya' ti' tojel i ñoj jini otot an i ti' jini tsalʌl tac am bʌ ti yebal. Quejpʌctic jini letsibʌl ti' cha'lajmlel otot yic'ot ti' yuxlajmlel. 9Salomón tsa' ujti i wa'chocon jini otot. Puro ch'ujte' jini cucujl tac yic'ot i yoyel otot yic'ot jini bojte' ti' mal ts'ajc. 10An ojlil i yuxp'ejl metro i chanlel jini tsalʌl tac am bʌ ti' cha'wejlel jini Templo. Lajal i chanlel ti jujunlajm. Ya' jach ñotol jini ch'ujte' bʌ i cucujlel yic'ot i ts'ajquil Templo.
11-12Tsa' tili i t'an lac Yum ba'an Salomón che' woli' wa'chocon jini Templo. Tsi' yʌlʌ: Mi xuc'ul ma' chʌn jac'beñon c t'an yic'ot j cʌntesa yic'ot pejtel c mandar, mi caj c ts'ʌctesan c t'an ti a tojlel che' bajche' tsac sube David a tat. 13Mi caj c chʌn ajñel ti' tojlel pejtelel israelob. Ma'anic mi caj j cʌyob, che'en.
14Salomón tsa' ujti i mel jini otot. 15Tsi' c'ʌñʌ ch'ujte' bʌ tabla tac cha'an mi' ñotben i mal jini otot, c'ʌlʌl ti' yebal c'ʌlʌl ti' cucujlel jini otot. Tsi' c'ʌñʌ ciprés bʌ tabla tac cha'an i pisojlel. 16Che' ja'el ti' mal jini otot tsi' mele yambʌ tsalʌl lujump'ejl metro i tamlel, lujump'ejl metro i xujc, lujump'ejl metro i chanlel. Tsi' yʌc'ʌ jini ch'ujte' bʌ tabla tac ya' ti' yebal i mal c'ʌlʌl ti' jol tsalʌl. Jiñʌch jini C'ax Ch'ujul bʌ Ajñibʌl. 17Jini ñaxan bʌ i mal jini Templo am bʌ ti tojel jini C'ax Ch'ujul bʌ Ajñibʌl an junc'al (20) metro i tamlel. 18Xot mʌcbil ti tabla jini cha'tsajlel i mal. T'obil jini tabla ba' tsi' meleyob i yejtal nich pimel yic'ot nich te'. Ya' ti mal ma'anic tsiquil jini xajlel, come xot mʌcbil ti ch'ujte'. 19Ya' ti C'ax Ch'ujul bʌ Ajñibʌl mi' yajñel jini Arca ba' lotol jini xuc'ul bʌ i t'an lac Yum. 20Lujump'ejl metro i tamlel jini C'ax Ch'ujul bʌ Ajñibʌl, lujump'ejl metro i xujc, lujump'ejl metro i chanlel. Laj tep'bil ti oro, che' ja'el tep'bil ti oro jini pulʌntib melbil bʌ ti ch'ujte'. 21-22Salomón tsi' tep'e ti oro i mal jini otot yic'ot jini pulʌntib. Tsi' ñup'u cʌytʌl i ti' jini C'ax Ch'ujul bʌ Ajñibʌl ti cadena melbil bʌ ti oro.
23-28Tsi' mele cha'tiquil i yejtal ángelob ti olivote'. Jujuntiquil an i chanlel jo'p'ejl metro. Ti jujuntiquil añob i wich' ojlil i yuxp'ejl metro. Jo'p'ejl metro i tamlel che' tich'il i wich'. Junlajalob ti cha'ticlel. Lajal i chanlel, lajal i tamlel i wich'. Tsi' yotsayob jini melbil bʌ ángelob ti' mal Templo. Ti junwejl i wich' tsi' tajayob bojte'. Ti ojlil tsi' tajayob i bʌ i wich'. Laj tep'bil ti oro jini ángelob ja'el.
29T'obil tac i bojte'lel Templo ti cha'tsajlel i mal. Tsi' meleyob i yejtal tac ángelob yic'ot bonxan, yic'ot i nich pimel. 30Tsi' tep'eyob jini piso ti oro ti cha'p'ejl i mal.
31-32Tsi' meleyob cha'q'uejl ñujp'il i ti' cha'an i puertajlel jini C'ax Ch'ujul bʌ Ajñibʌl. Ya' ti' cha'q'uejl bʌ i puerta melbil bʌ ti olivote' tsi' meleyob i yejtal tac ángel yic'ot bonxan yic'ot i nich pimel. Tsi' laj tep'eyob ti oro.
33Tsi' c'ʌñʌyob olivote' cha'an i chumte'lel i ti' Templo. 34An cha'q'uejl i puertajlel Templo melbil ti cipreste'. An bisagre ti jujunq'uejl i ti'. 35Ya' ti' puertajlel Templo tsi' meleyob i yejtal tac ángel yic'ot bonxan, yic'ot i nich pimel. Tsi' laj tep'eyob ti oro. 36Uxlajm i pimlel i ts'ajquil jini patio yic'ot junlajm ch'ujte'.
37Tsi' ts'ʌlʌyob letsel i yebal Templo che' ti mayo che' wolix i majlel ti chʌmp'ejl jab i ye'tel Salomón. 38Tsa' ujti i melob Templo che' ti noviembre che' ti junlujump'ejl jab i ye'tel Salomón. Tsa' ñumi wucp'ejl jab ti melol.
Currently Selected:
1 REYES 6: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.