1 REYES 14
14
Ahías tsi' subu t'an ti' contra Jeroboam
1Tsa' c'am'a i yalobil Jeroboam i c'aba' Abías. 2Jeroboam tsi' sube i yijñam: Yʌñʌ a wut, lʌpʌ yambʌ a bujc cha'an ma'anic mi' cʌñetob winicob x'ixicob, cha'an ma'anic mi' tsictiyel mi quijñamet. Cucu ti Silo ba'an jini x'alt'an i c'aba' Ahías. Jiñʌch tsa' bʌ i subeyon mi caj cochel ti rey ti' tojlel israelob. 3Ch'ʌmʌ majlel lujunlʌjts pan yic'ot tiquin bʌ ts'usub yic'ot junwojl chab. Aq'uen jini x'alt'an. Jini mi caj i subeñet mi mu'to i c'oc'an la calobil. Che' tsi' yʌlʌ Jeroboam.
4Che'ʌch tsi' mele i yijñam Jeroboam. Tsa' majli ti' yotot Ahías ya' ti Silo. Ñoxix Ahías. Ma'anix mi' c'otel i wut. 5Lac Yum tsi' sube: Tal i yijñam Jeroboam cha'an mi' c'ajtibeñet mi mu'to i c'oc'an i yalobil come c'am, che'en lac Yum. Tsi' sube ja'el bajche' yom mi' jac'ben.
6Che' bʌ tsa' c'oti jini x'ixic yʌñʌl bʌ i wut yic'ot i pislel cha'an mach yomic i yʌc' i bʌ ti cʌjñel, Ahías tsi' yubi ya' ch'ojch'ojña tilel i yoc ti' ti' otot. Tsi' pejca: Ochen, i yijñam Jeroboam. ¿Chucoch tsa' yʌñʌ a bʌ? Mi caj c subeñet ch'ijiyem bʌ t'an. 7Cucu suben Jeroboam: “Jiñʌch i t'an lac Yum i Dios Israel: Tsac yajcayet ti' tojlel israelob. Tsac wa'chocoyet cha'an ma' cha'len yumʌl ti' tojlel c cha'año' bʌ. 8Tsac chilbe i yumʌntel i p'olbal David cha'an mi cʌq'ueñet. Pero ma'anic tsa' jac'beyon c mandar che' bajche' tsi' jac'ʌ c winic David. David tsi' tsajcayon ti pejtelel i pusic'al. Tsi' cha'le chuqui toj tic wut. 9Ñumen jontolet che' bajche' pejtel yumʌlob. Cʌlʌx jax c mich'ajel, come tsa' mele i yejtal dios tac. Tsa' ch'ujutesa. Tsa' cʌyʌyon. 10Jini cha'an mi caj cʌq'ueñob wocol año' bʌ ti' yotot Jeroboam. Mi caj c jisan pejtel ch'iton bʌ i yalobilob cha'an ma'anic mi' cʌytʌl mi juntiquilic. Mi caj c misun loq'uel ti Israel pejtel i cha'año' bʌ Jeroboam che' bajche' mi' misuntel loq'uel i ta' alʌc'ʌl. 11Jini mu' bʌ i chʌmel ti mal tejclum mi caj i c'uxtʌl ti ts'i'. Jini mu' bʌ i chʌmel ti bij mi caj i c'uxtʌl ti xta'jol. Jiñʌch i t'an lac Yum. 12Cucux ti a wotot. Che' ma' wochel ti tejclum, mi caj i chʌmel a walobil. 13Mi caj i yuc'tañob pejtelel israelob. Mi caj i mucob. Pero cojach jini mi caj i mujquel. Come ti' tojlel pejtelel a pi'ʌlob ti' yotot Jeroboam cojach jini tsa' q'uejli ti uts'at ti' wut Dios. 14Lac Yum mi caj i wa'chocon yambʌ rey ti' tojlel israelob. Jini mi caj i tsʌnsan pejtel i p'olbal Jeroboam. 15Lac Yum mi caj i yʌq'uen wocol Israel che' bajche' amʌy jats'bil bʌ ti ja'. Mi caj i boc loq'uel che' bajche' te'. Mi caj i loc'sañob ti jini uts'at bʌ lum tsa' bʌ i yʌq'ueyob i ñojte'elob. Mi caj i laj pucob majlel ti junwejl Eufrates, come tsi' meleyob i yejtal dios tac. Tsi' techbeyob i mich'ajel lac Yum. 16Jini cha'an lac Yum mi caj i cʌy israelob cha'an ti' caj i mul Jeroboam, cha'an tsi' xiq'ui ti mulil jini israelob”. Che' yom ma' suben, che'en Ahías.
17Jini cha'an tsa' sujti ti Tirsa i yijñam Jeroboam. Che' woli' c'otel ti' ti' i yotot, tsa' chʌmi i yalobil. 18Tsi' mucuyob. Pejtelel israelob tsi' yuc'tayob che' bajche' lac Yum tsi' sube jini x'alt'an Ahías. 19Ts'ijbubil ti' juñilel i reyob Israel yan tac bʌ i melbal Jeroboam yic'ot bajche' tsa' ujti guerra ti' tojlel. 20Jeroboam tsi' cha'le yumʌntel cha'p'ejl i cha'c'al jab. Che' bʌ tsa' chʌmi Jeroboam, tsi' ch'ʌmbe i ye'tel i yalobil i c'aba' Nadab.
I yumʌntel Roboam
(2 Cr. 12.1-16)
21Ya' ti Judá tsi' cha'le yumʌl Roboam (i yalobil Salomón). Anix jump'ejl i yuxc'al (41) i jabilel che' bʌ tsa' caji ti yumʌntel. Wuclujump'ejl (17) jab tsi' cha'le yumʌl ya' ti Jerusalén, jini tejclum tsa' bʌ i yajca lac Yum ti' tojlel pejtel Israel cha'an mi' cʌjñel i c'aba'. I ña' Roboam jiñʌch Naama ch'oyol bʌ ti Amón. 22Jini año' bʌ ti Judá ja'el tsi' cha'leyob jontolil ti' wut lac Yum. Tsi' techbeyob i mich'ajel lac Yum cha'an cabʌl i mul, ñumen bajche' i ñojte'elob. 23Tsi' wa'chocoyob oy ba' mi' cha'leñob ch'ujutesaya ya' ti bujbujtʌl. Tsi' meleyob dios tac. Tsi' yʌc'ʌyob ti jujump'ejl chan bʌ bujtʌl yic'ot ti yebal jujuntejc jupul bʌ te'. 24An winicob ti Judá tsa' bʌ i pi'leyob i bʌ ti' ts'i'lel. Jini chumulo' bʌ ti Judá leco tsi' meleyob che' bajche' tsi' meleyob jini ñaxan bʌ i yumob jini lum. Lac Yum tsi' chocoyob loq'uel cha'an i mul cha'an mi' ch'ʌmob i lum jini israelob.
25Che' ti' jo'p'ejlel i jabilel i yumʌntel Roboam, jini rey ti Egipto i c'aba' Sisac tsi' teche guerra ti' contra Jerusalén. 26Tsi' loc'sa jini letsem tac bʌ i tojol am bʌ ti' yotot lac Yum yic'ot ti' yotot jini rey. Tsi' lu' xujch'i majlel yic'ot jini mʌctʌjibʌl cha'an guerra tsa' bʌ i mele Salomón ti oro. 27Roboam tsi' mele yambʌ mʌctʌjibʌl ti bronce cha'an i q'uexol. Tsi' yʌq'ueyob i yumob xcʌntayajob mu' bʌ i cʌntañob i ti' i yotot rey. 28Che' bʌ tsa' majli jini rey ti' yotot lac Yum, jini xcʌntayajob tsi' ye'eyob majlel jini mʌctʌjib. Che' bʌ tsa' sujti tsi' cha' lotoyob ti' yajñib.
29Ts'ijbubil ti' juñilel i reyob Judá jini yan tac bʌ i melbal Roboam yic'ot pejtel tsa' bʌ ujti che' woli' mel i ye'tel. 30Tsi' contrajiyob i bʌ Roboam yic'ot Jeroboam che' cuxulob to. 31(I ña' Roboam jiñʌch Naama jini ch'oyol bʌ ti Amón.) Che' bʌ tsa' chʌmi Roboam, tsa' mujqui ba' mucul i ñojte'elob ya' ti Jerusalén. I yalobil i c'aba' Abiam tsi' ch'ʌmbe i ye'tel.
Currently Selected:
1 REYES 14: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.