1 REYES 11
11
I mul Salomón
1Salomón mach cojic jach tsi' pʌyʌ ti' yijñam i yalobil Faraón. Tsi' cha'le ñujpuñel yic'ot yaño' bʌ ch'oyolo' bʌ ti Moab, yic'ot ti Amón, yic'ot ti Edom, yic'ot ti Sidón, yic'ot ti Het, 2anquese tic'bil cha'an mi' pʌyob ti' yijñam jini ch'oyolo' bʌ ti yan tac bʌ lum. Come i tilel jini x'ixicob mi' subeñob i ñoxi'al cha'an mi' ch'ujutesan dioste' tac. Pero Salomón ma'anic tsi' jac'ʌ i tic'ol. 3An jo'lujunc'al i cha'bajc' (700) i yijñam Salomón ti pejtelelob. Che' ja'el an jo'lujunc'al (300) i majan ijñam. I yijñamob Salomón tsa' caji i socbeñob i pusic'al cha'an mi' cʌy lac Yum. 4Che' anix i jabilel Salomón, i yijñamob tsi' xiq'uiyob cha'an mi' ch'ujutesan i diosob. Ma'anic tsi' ñopo lac Yum Dios che' bajche' tsi' ñopo i tat David. 5Salomón tsi' ch'ujutesa Astoret jini x'ixic bʌ dios mu' bʌ i c'uxbiñob sidoñob, yic'ot Milcom, jini leco bʌ i dios amoñob. 6Che' jini mach tojic tsi' mele. Tsi' cʌyʌ lac Yum. Ma'anic tsi' tsajca che' bajche' David i tat. 7Tsi' melbe i yotlel dioste' i c'aba' Quemos ya' ti Olivo wits am bʌ ti' tojel Jerusalén. Jiñʌch leco bʌ i dios moabob. Tsi' melbe i yotlel Moloc, i dios amoñob. 8Tsi' mele ja'el pulʌntib tac ba' mi' pulob pom i yijñamob, ba' mi' tsʌnsʌbeñob i majtan tac i diosob.
9-10Lac Yum tsi' wen mich'le Salomón, come tsi' tʌts'ʌ loq'uel i bʌ ba'an lac Yum i Dios Israel. Cha'yajl tsi' wʌn sube cha'an ma'anic mi' ch'ujutesan yambʌ diosob. Pero ma'anic tsi' jac'ʌ i tic'ol. 11Jini cha'an lac Yum tsi' sube Salomón: Tsa' ñusʌbeyon c mandar. Jini cha'an mi caj c chilbeñet a yumʌntel cha'an ti' caj a mul. Mi caj cʌq'uen juntiquil x'e'tel a cha'an. 12-13Cha'an i c'uxbintel a tat ma'anic mi caj c mel che' cuxulet to. Mi caj c chilben i yumʌntel a walobil. Mi caj j cʌyben a walobil junmojt israelob cha'an c'ux mi cubin David yic'ot Jerusalén, jini tejclum tsa' bʌ c yajca. Che' tsi' yʌlʌ lac Yum.
14Lac Yum tsi' yʌq'ue i p'ʌtʌlel Hadad cha'an mi' contrajin Salomón. Hadad i yalobilʌch jini rey ti Edom. 15Che' cuxul to David tsajni ti Edom yic'ot Joab cha'an mi' mucob jini soldadojob israelo' bʌ tsa' bʌ chʌmiyob ti guerra. Ti jim bʌ ora jini israelob tsa' yʌlʌ i laj jisañob jini winicob año' bʌ ti Edom. 16Tsa' cʌleyob jini soldadojob israelo' bʌ wʌcp'ejl uw che' bʌ tsi' jisayob jini winicob ti Edom. 17Pero cuxul tsa' cʌle Hadad yic'ot cha'tiquil uxtiquil año' bʌ i ye'tel tsa' bʌ puts'iyob. Jini año' bʌ i ye'tel tsi' pʌyʌyob majlel Hadad ti Egipto come alob to. 18Tsa' loq'uiyob ti Madián, tsa' c'otiyob ti Parán. Ya'i tsi' tajayob yaño' bʌ. Temel tsa' majliyob ti Egipto. Faraón tsi' yʌq'ueyob otot yic'ot i bʌl i ñʌc'. 19Hadad tsa' ajni ti jump'ejl i pusic'al yic'ot Faraón. Faraón tsi' yʌq'ue i mu' cha'an i yijñam. Jiñʌch i yijts'in Tahpenes i yijñam bʌ Faraón. 20Tsa' tili ti pañimil ch'iton bʌ i yalobil i c'aba' Genubat. Tsa' caji ti colel ti' yotot Faraón yic'ot i yalobilob Faraón. 21Ya' ti Egipto Hadad tsa' caji i yubin chʌmenix David yic'ot Joab. Tsi' c'ajtibe wocol t'an Faraón cha'an mi' sujtel ti Edom. 22Faraón tsi' c'ajtibe: ¿Chucoch a wom majlel? ¿Chuqui anto yom ilayi? che'en Faraón. Hadad tsi' jac'ʌ: Ma'anic chuqui anto yom. Che' jach com majlel ba'an c pi'ʌlob, che'en Hadad.
23Dios tsa' caji i yʌq'uen i p'ʌtʌlel yambʌ i contra Salomón, i c'aba' Rezón (i yalobil Eliada) tsa' bʌ puts'i loq'uel ti' tojlel i yum. I yum jiñʌch Hadadezer rey ti Soba. 24Rezón tsa' ochi ti' yum xujch'ob. Che' bʌ David tsi' jisa Soba, tsa' puts'iyob majlel ti Damasco. Ya'i tsi' yotsa i bʌ ti rey Rezón. 25Ti pejtelel i jabilel Salomón, jini Rezón yic'ot Hadad tsi' contrajiyob, come tsi' ts'a'leyob israelob. Rezón tsi' cha'le yumʌl ti Siria.
26Jeroboam (i yalobil Nabat) jiñʌch yambʌ i contra Salomón ch'oyol bʌ ti Sereda am bʌ ti Efraín. Meba' i ña' i c'aba' Zerúa. 27-28Jeroboam tsa' caji i contrajin Salomón. Salomón tsi' wa'choco jini Milo i tejclum soldadojob. Tsi' cha' weñ'esa i ts'ajquil jini tejclum tsa' bʌ i mele David i tat. Tsi' yʌq'ue i ye'tel Jeroboam che' bʌ tsi' q'uele ch'ejl i pusic'al, cabʌl i ña'tʌbal. Tsi' yʌq'ue i ye'tel cha'an mi' q'uel x'e'telob, i p'olbalo' bʌ José, junmojt bʌ israelob.
29Ti jump'ejl q'uin che' woli' loq'uel majlel ti Jerusalén Jeroboam, tsi' taja jini x'alt'an i c'aba' Ahías ch'oyol bʌ ti Silón, lʌpbil bʌ i cha'an tsiji' bʌ i bujc. Tsa' caji i pejcañob i bʌ ya' ti bij. I bajñel jach ya' añob. 30Ahías tsi' wʌc' tsili i bujc lʌpbil bʌ i cha'an, lajchʌntsijl i bujc. 31Ahías tsi' sube Jeroboam: Ch'ʌmʌ lujuntsijl, come lac Yum i Dios Israel woli' yʌl: “Mi caj c chilben i yumʌntel Salomón. Mi caj cʌq'ueñet lujunmojt israelob. 32Junmojt jach mi caj i cʌytʌl ti' wenta Salomón cha'an ti' caj David yic'ot Jerusalén. Come tsac yajca Jerusalén ti' tojlel pejtelel Israel. 33Che'ʌch mic mel cha'an tsi' cʌyʌyon Salomón. Tsi' ch'ujutesa Astoret, jini x'ixic bʌ dios i cha'an sidoñajob, yic'ot Quemos i dios moabob, yic'ot Milcom i dios amoñob. Ma'anic tsi' jac'ʌ c mandar. Ma'anic woli' mel chuqui toj tic wut. Ma'anic woli' jac'beñon c t'an che' bajche' David i tat. 34Pero ma'anic mi caj c chilben i yumʌntel che' cuxul to cha'an ti' caj mij c'uxbin c winic David tsa' bʌ c yajca, come tsi' jac'beyon c t'an yic'ot c mandar.
35Che' woli ti yumʌntel i yalobil, mi caj c chilben lujunmojt israelob. Mi caj cʌq'ueñet. 36Mi caj cʌq'uen junmojt israelob cha'an c'ux mi cubin c winic David tsa' bʌ c yajca. Jini cha'an ma'anic mi caj i yajpel i c'ʌc'al David ya' ba' tsa cʌc'ʌ j c'aba' ti Jerusalén. 37Mi caj c wa'chocoñet ti rey ti' tojlel israelob. 38Mi xuc'ul ma' jac' pejtel c mandar cha'an ma' mel chuqui uts'at tic wut che' bajche' tsi' mele c winic David, che' jini mi caj cajñel a wic'ot. Mi caj cʌq'ueñob i yumʌntel a walobilob ti' tojlel Israel ti pejtelel ora che' bajche' tsac sube David. 39Pero mi caj c poj peq'uesan i p'olbal David cha'an ti' caj i mul Salomón, pero mach ti pejtelelic ora”, che'en lac Yum Dios. Che' tsi' yʌlʌ jini x'alt'an Ahías. 40Che' bʌ tsi' ña'ta Salomón tsi' ñopo i tsʌnsan Jeroboam, pero tsa' puts'i ba'an Sisac jini rey am bʌ ti Egipto. Ya' tsa' jal'a jinto tsa' chʌmi Salomón.
Tsa' chʌmi Salomón
(2 Cr. 9.29-31)
41An i juñilel Salomón ba' ts'ijbubil pejtel i melbal yic'ot pejtel i subal mu' bʌ i tsictesan i ña'tʌbal. 42Cha'c'al jab tsi' cha'le yumʌl Salomón ya' ti Jerusalén ti' tojlel pejtelel israelob. 43Tsa' chʌmi che' bajche' i ñojte'elob. Tsa' mujqui ya' ti Jerusalén ti' tejclum David i tat. Che' jini tsa' caji i cha'len yumʌl Roboam i yalobil.
Currently Selected:
1 REYES 11: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.