1 CRONICAS 4
4
I p'olbalob Judá
1Jini ch'iton bʌ i yalobilob Judá jiñobʌch Fares, Hezrón, Carmi, Hur, Sobal. 2I yalobil Sobal jiñʌch Reaía. I yalobil Reaía jiñʌch Jahat. I yalobil Jahat jiñʌch Ahumai yic'ot Lahad. Jiñobʌch i pi'ʌlob jini zoratob. 3-4I p'olbalob Etam jiñobʌch iliyi:
Jezreel, Isma, Ibdas, Hazelelponi jini xch'oc bʌ i yalobil, Penuel (i ñojte'el Gedor), Ezer (i ñojte'el Husa). Jini ascuñʌl bʌ i yalobil Hur jiñʌch Efrata jini tsa' bʌ i teche Belén.
5I tat Tecoa jiñʌch Asur. I yijñam Asur jiñʌch Hela yic'ot Naara. 6Naara tsi' yʌc'ʌ ti pañimil Ahuzam, Hefer, Temeni, Ahastari. 7Hela tsi' yʌc'ʌ ti pañimil Zeret, Jezoar, Etnán. 8I tat Anub yic'ot Zobeba jiñʌch Cos. Jiñʌch i ñojte'el ja'el i pi'ʌlob Aharhel i yalobil bʌ Harum.
9Ñumen an i ña'tʌbal Jabes bajche' pejtelel i yerañob. I ña' tsi' yotsʌbe i c'aba' ti Jabes come wocol jax tsi' yubi che' bʌ tsi' yʌc'ʌ ti pañimil. 10Jini Jabes tsi' pejca i Dios Israel ti oración: Awocolic aq'ueñon i yutslel a pusic'al. Coltañon ti que'tel. Yom ma' wajñel quic'ot ti pejtelel chuqui mic mel. Coltañon cha'an ma'anic mi' tajon mulil mi wocol. Che'ʌch tsi' c'ajtibe Jabes. Che' jini lac Yum tsi' yʌq'ue jini tsa' bʌ i c'ajtibe.
11-12I p'olbal Reca jiñobʌch iliyi: Quelub (i yeran Súa) i tatʌch Mehir. I yalobil Mehir jiñʌch Estón. I yalobilob Estón jiñʌch Betrafa, Paseah, Tehina. I yalobil Tehina jiñʌch Irnahas. 13I yalobilob Cenaz jiñobʌch Otoniel yic'ot Seraías. I yalobilob Otoniel jiñobʌch Hatat yic'ot Meonotai. 14I yalobil Meonotai jiñʌch Ofra. I yalobil Seraías jiñʌch Joab. Joab jiñʌch i ñojte'el jini chumulo' bʌ ya' ti Carisim. Che'ʌch tsa' otsʌbenti i c'aba' come yujilob e'tel ti tsucu taq'uin.
15I yalobilob Caleb (i yalobil Jefone) jiñobʌch Iru, Ela, Naam. I yalobil Ela jiñʌch Cenaz. 16I yalobilob Jehalelel jiñobʌch Zif, Zifa, Tirías, Asareel.
17I yalobilob Esdras jiñobʌch Jeter, Mered, Efer, Jalón. Mered tsi' cha'le ñujpuñel yic'ot Bitiah jini ch'oyol bʌ ti Egipto. I yalobilob Bitiah jiñobʌch Miriam, Samai, Isba. Isba jiñʌch i ñojte'el Estemoa. 18Jini i yijñam Estemoa ch'oyol ti Judá. Tsi' yʌc'ʌ ti pañimil Jered (i ñojte'el jini gedorob), yic'ot Heber (i ñojte'el jini socojob), yic'ot Jecutiel (i ñojte'el jini zanoajob). 19I yijñam Hodías jiñʌch i yijts'in Naham. Juntiquil i yalobil jiñʌch i tat Keila jini garm. Yambʌ i yalobil jiñʌch Estemoa jini maacateo.
20I yalobilob Simón jiñobʌch Amnón, Rina, Benhanán, Tilón. I yalobilob Isi jiñobʌch Zohet yic'ot Benzohet. 21-22I yalobilob Sela (i yalobil bʌ Judá) jiñobʌch:
Er (i tat Leca), Laada (i tat Maresa), jini winicob x'ixicob ya' ti Betasbea mu' bʌ i jalob lino bʌ pisil, yic'ot Joacim, yic'ot i pi'ʌlob Cozeba, yic'ot Joás, yic'ot Saraf (jini tsa' bʌ i cha'le yumʌl ti Moab che' maxto anic tsa' sujti majlel ti Lehem). Loq'uemix pejtelel i c'aba' ti jun an tac bʌ ti wajali.
I p'olbalob Simeón
23Ili winicob wen yujilob melol jini p'ejt tac melbil bʌ ti lum, yic'ot e'tel ti pʌc'ʌbʌl tac. Ti pejtelel tsi' melbeyob i ye'tel jini reyob.
24I yalobilob Simeón jiñobʌch Nemuel, Jamín, Jarib, Zera, Saúl. 25I yalobil Saúl jiñʌch Salum. I yalobil Salum jiñʌch Mibsam. I yalobil Mibsam jiñʌch Misma. 26Misma i tatʌch Hamuel (i tat Zacur; Zacur i tatʌch Simei). 27An wʌclujuntiquil (16) ch'iton bʌ i yalobilob Simei. Che' ja'el an wʌctiquil xch'oc bʌ i yalobilob. Pero mach tanto añobic i yalobilob i yerañob Simei bajche' i pi'ʌlob ti Judá. 28-31Jini tejclum tac ya' ba' tsa' chumleyob jiñobʌch: Beerseba, Molada, Hazarsual, Bilha, Ezem, Tolad, Betuel, Horma, Siclag, Betmarcabot, Hazarsusim, Betbirai, Saaraim. Ili tejclum tac tsa' ajniyob ti' wentajob jinto che' ti' yorajlel David. 32-33Jini tejclum tac ya' ba' tsa' chumleyob i p'olbalob jiñobʌch Etam, Aín, Rimón, Toquén, Asán. An tac ja'el alʌ colonia tac ti' joytʌlel ili tejclum tac c'ʌlʌl ti Baal. Ts'ijbubil i c'aba' tac iliyi ti' juñilel jini winicob ti mojt ti mojt.
34-39Lamital jini yumʌlob tsa' majliyob ti' tojel jini Gedor ba' mi' pasel q'uin cha'an mi' sʌclañob potrero tac cha'an i yʌlac'ob come tsa' wen p'ojliyob. Jiñobʌch i c'aba'ob:
Mesobab, Jamlec, Josías, Joel, Jehú, Elioenai, Jaacoba, Jesohaía, Asaías, Adiel, Jesimiel, Benaía, Ziza (i yalobil Sifi, i yalobil Alón, i yalobil Jedaías, i yalobil Simri, i yalobil Semaías).
40-41Tsi' tajayob jini wen c'oc tac bʌ jamil baqui ñʌch'ʌl pañimil, pero jini lum tac i cha'añʌch i p'olbalob Cam. Jini cha'an che' ti' yorajlel jini rey Ezequías am bʌ ti Judá, jini yumʌlob tsi' wersa chilbeyob i p'olbalob Cam jini lum tac. Tsi' jisa tac i yotot. Tsi' tsʌnsayob jini ya' bʌ chumulob. Tsa' ochiyob ti' wenta. 42Ti wi'il jo'c'al i cha'bajc' (500) i p'olbalob Simeón tsa' majliyob ti wits i c'aba' Seir (jini yumʌlob jiñobʌch i yalobilob Isi: Pelatías, Nearías, Refaías, Uziel). 43Che' jini tsi' laj jisayob jini tsa' bʌ cʌleyob ti' tojlel Amalec. Tsa' cajiyob ti chumtʌl ya'i c'ʌlʌl wʌle.
Currently Selected:
1 CRONICAS 4: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.