1 CRONICAS 27
27
Yan tac bʌ x'e'telob i cha'an David
1Tsa' t'oxle jini soldadojob israelo' bʌ ti lajchʌnmojt. Añob 24,000 soldadojob yic'ot yumʌlob ti jujunmojt. Tsa' pʌjyi jujunmojt cha'an mi' cha'leñob i ye'tel jump'ejl uw ti jujump'ejl jab. Jiñʌch i listajlel ti jujunmojt yic'ot i yumob:
2-3I yum jini ñaxan bʌ junmojt jiñʌch Jasobeam (i yalobil Zabdiel). Añob chʌmp'ejl i cha'c'al (24,000) soldadojob ti' wenta. Tsi' cha'leyob e'tel ti ñaxan bʌ uw ti jujump'ejl jab.
4I yum i cha'mojtlel jiñʌch Dodai (i p'olbal Ahoh). Añob 24,000 soldadojob ti' wenta. Tsi' cha'leyob e'tel ti' cha'p'ejlel bʌ uw ti jujump'ejl jab. Jini yumʌl tsa' bʌ i colta Dodai jiñʌch Miclot.
5-6I yum jini i yuxmojtlel jiñʌch Benaía. Añob 24,000 soldadojob ti' wenta. Tsi' cha'leyob e'tel ti' yuxp'ejlel bʌ uw ti jujump'ejl jab. (Benaía jiñʌch i yalobil jini ñuc bʌ motomaj i c'aba' Joiada. Benaía i yumʌch jini Lujuntiquil i Cha'c'al ñuc bʌ yumʌlob ti' tojlel i soldadojob David.) I yalobil Benaía i c'aba' Amisabad tsi' ch'ʌmbe i ye'tel Benaía ti' tojlel soldadojob.
7I yum jini i chʌnmojtlel jiñʌch Asael (i yeran Joab). Añob 24,000 soldadojob ti' wenta. Tsi' cha'leyob e'tel ti' chʌmp'ejlel uw ti jujump'ejl jab. Ti wi'il i yalobil Asael i c'aba' Zebadías tsi' q'uexola i tat.
8I yum jini i jo'mojtlel bʌ jiñʌch Samhut ch'oyol bʌ ti Izrah. Añob 24,000 soldadojob ti' wenta. Tsi' cha'leyob e'tel ti' jo'p'ejlel bʌ uw ti jujump'ejl jab.
9I yum jini i wʌcmojtlel bʌ jiñʌch Ira (i yalobil Iques ch'oyol bʌ ti Tecoa). Añob 24,000 soldadojob ti' wenta. Tsi' cha'leyob e'tel ti' wʌcp'ejlel bʌ uw ti jujump'ejl jab.
10I yum jini i wucmojtlel bʌ jiñʌch Heles ch'oyol bʌ ti Pelón am bʌ ti Efraín. Añob 24,000 soldadojob ti' wenta. Tsi' cha'leyob e'tel ti' wucp'ejlel bʌ uw ti jujump'ejl jab.
11I yum jini i waxʌcmojtlel bʌ jiñʌch Sibecai (i p'olbal bʌ Husat ch'oyol bʌ ti Zera). Añob 24,000 soldadojob ti' wenta. Tsi' cha'leyob e'tel ti' waxʌcp'ejlel bʌ uw ti jujump'ejl jab.
12I yum jini i bolonmojtlel bʌ jiñʌch Abiezer (i p'olbal bʌ Benjamín ch'oyol bʌ ti Anatot). Añob 24,000 soldadojob ti' wenta. Tsi' cha'lyeob e'tel ti' bolomp'ejlel bʌ uw ti jujump'ejl jab.
13I yum jini i lujunmojtlel bʌ jiñʌch Maharai ch'oyol bʌ ti Netofat am bʌ ti Zera. Añob 24,000 soldadojob ti' wenta. Tsi' cha'leyob e'tel ti' lujump'ejlel bʌ uw ti jujump'ejl jab.
14I yum jini junlujunmojtlel bʌ jiñʌch Benaía ch'oyol bʌ ti Piratón am bʌ ti Efraín. Añob 24,000 soldadojob ti' wenta. Tsi' cha'leyob e'tel ti' junlujump'ejlel bʌ uw ti jujump'ejl jab.
15I yum jini lajchʌnmojtlel bʌ jiñʌch Heldai ch'oyol bʌ Netof am bʌ ti' lumal Otoniel. Añob 24,000 soldadojob ti' wenta. Tsa' cha'leyob e'tel ti' lajchʌmp'ejlel bʌ uw ti jujump'ejl jab.
16-22Jini ñuc bʌ yumʌlob ti' tojlel jujunmojt i p'olbalob Israel jiñobʌch iliyi:
Cha'an Rubén, jiñʌch Eliezer (i yalobil Zicri). Cha'an Simeón, jiñʌch Sefatías (i yalobil Maaca). Cha'an Leví, jiñʌch Hasabías (i yalobil Kemuel). Cha'an i p'olbalob Aarón, jiñʌch Sadoc. Cha'an Judá, jiñʌch Eliú (i yeran jini rey David). Cha'an Isacar, jiñʌch Omri (i yalobil Micael). Cha'an Zabulón, jiñʌch Ismaías (i yalobil Abdías). Cha'an Neftalí, jiñʌch Jerimot (i yalobil Azriel). Cha'an Efraín, jiñʌch Oseas (i yalobil Azazías). Cha'an ojlil i p'olbal Manasés, jiñʌch Joel (i yalobil Pedaías). Cha'an jini yambʌ ojlil Manasés am bʌ ti Galaad, jiñʌch Iddo (i yalobil Zacarías). Cha'an Benjamín, jiñʌch Jaasiel (i yalobil Abner). Cha'an Dan, jiñʌch Azareel (i yalobil Jeroham).
23Pero David ma'anic tsi' ch'ʌmʌ ti tsic jini maxto bʌ anic junc'al i jabilel, come lac Yum Dios tsi' wʌn sube cha'an mi caj i p'ojlesan jini israelob che' bajche' ec' ti panchan. 24Joab (i yalobil Sarvia) tsa' caji i ñop i tsic, pero ma'anic tsa' ujti i tsic, come tsa'ix tili jini wocol ti' tojlel israelob cha'an i mich'lel lac Yum. Che' jini ma'anic tsi' laj otsa ti jun jini rey David jaytiquilob jini winicob ti pejtelel.
25Ti jim bʌ ora jini Azmavet (i yalobil Adiel) an i ye'tel ti ñuc bʌ xcʌnta taq'uin ti' tojlel jini rey David. Jini Jonatán (i yalobil Uzías) tsa' cʌle ti' wenta cha'an mi' cʌntan pejtelel taq'uin yic'ot chubʌ'añʌl ti wen melbil bʌ tejclum tac ti pejtelel Israel.
26Jini Ezri (i yalobil Quelub) tsa' cʌle ti' wenta cha'an mi' q'uel pejtelel e'tel ti cholel tac i cha'an bʌ rey. 27Jini Simei ch'oyol bʌ ti Ramat tsa' cʌle ti' wenta cha'an mi' cʌntan jini ts'usubil tac i cha'an rey. Jini Zabdi ch'oyol bʌ ti Sifmi tsa' ajni ti' wenta cha'an mi' q'uel pejtelel jini e'tel cha'an i chajpʌntel i ya'lel ts'usub yic'ot bajche' mi' lojtel. 28Jini Baalhanán ch'oyol bʌ ti Geder tsa' cʌle ti' wenta jini olivojil, yic'ot jini higuerajil an tac bʌ ti joctʌl lʌc'ʌl ba'an i lumal filisteojob. Tsa' cʌle ti' wenta Joás cha'an mi' q'uel ba' mi' lojtel tac jini aceite.
29Jini wacax tac am bʌ ya' ti Sarón tsa' cʌle ti' wenta Sitrai ch'oyol bʌ ti Sarón. Jini wacax tac am bʌ ya' ti joctʌl, tsa' cʌle ti' wenta cha'an mi' q'uel jini Safat (i yalobil Adlai). 30Jini Obil ch'oyol bʌ ti' lumal Ismael tsa' cʌle ti' wenta cha'an mi' q'uel jini camello tac. Jini Jehedías ch'oyol bʌ ti Meronot tsa' cʌle ti' wenta cha'an mi' q'uel jini burro tac. 31Jini Jaziz jini agareño tsa' cʌle ti' wenta cha'an mi' q'uel jini tiñʌme' tac. Jini winicob ti pejtelelob jiñobʌch tsa' bʌ i melbeyob i ye'tel jini rey David.
32Jonatán, i yumijel David, an i ña'tʌbal ti pejtelel e'tel tac. Jiñʌch consejero i cha'an David. Yujilix ts'ijb. Uts i pusic'al jini winic. Jonatán yic'ot Jehiel (i yalobil Hacmoni) tsi' cʌntesayob i yalobilob jini rey David.
33Ahitofel tsa' wa'choconti cha'an i yaj toj'esaya jini rey David. Jiñʌch ñuc bʌ i consejero. Husai jini arqui tsa' cʌle ti' yaj toj'esaya jini rey David. 34Joiada (i yalobil Benaía) yic'ot Abiatar tsi' ch'ʌmbeyob i ye'tel Ahitofel che' bʌ tsi' cʌyʌ. Joab tsa' ochi ti' yum jini soldadojob.
Currently Selected:
1 CRONICAS 27: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.