1 CRONICAS 23
23
Tsa' aq'uentiyob i ye'tel jini levíjob
1Che' cabʌlix i jabilel jini David, tsi' wa'choco ti rey ti Israel i yalobil i c'aba' Salomón. 2Tsi' tempa pejtelel jini ñuc taco' bʌ i ye'tel ti Israel, yic'ot jini motomajob yic'ot jini levíjob. 3Tsa' cajiyob ti tsijquel jini levíjob añobix bʌ lujump'ejl i cha'c'al jab yic'ot ñumeñobix bʌ ti lujump'ejl i cha'c'al jab. Ti pejtelel añob waxʌclujuntiquil i cha'c'al mil (38,000). 4-5Ti' tojlelob mi caj i loq'uelob chʌntiquil i cha'c'al mil (24,000) cha'an mi' q'uelob jini e'tel tac ti' melol jini Templo. Wʌcp'ejl mil mi caj i yochelob ti yumʌl yic'ot ti juezob. Che' ja'el mi caj i yochelob chʌmp'ejl mil ti xcʌntayajob, yic'ot chʌmp'ejl mil mu' bʌ i ñuq'uesañob lac Yum ti música. 6David tsi' t'oxoyob ti uxmojt che' bajche' i yalobilob Leví. Jiñobʌch Gersón yic'ot Coat yic'ot Merari.
7Yambʌ cha'mojt tsa' otsʌbentiyob i c'aba' Laadán yic'ot Simei (i p'olbalob Gersón). 8-9Tsa' cha' t'oxleyob ti yambʌ wʌcmojt, uxmojt ti' wenta i yalobilob Laadán. Jiñobʌch Jehiel, Zetam yic'ot Joel. Yambʌ uxmojt ti' wenta i yalobilob Simei: jiñobʌch Selomit, Haziel, Harán. Jiñobʌch i yumob otot tac. 10-11Tsa' cha' t'oxleyob levíjob ti' wenta i yalobilob Simei. Jiñobʌch Jahat, Zina, Jeús yic'ot Bería. Pero ma'añobic cabʌl i yalobil Jeús yic'ot Bería. Jini cha'an tsa' tsijquiyob che' bajche' junmojt.
12Tsa' t'oxle i p'olbal Coat ti chʌnmojt ti' wenta i yalobilob. Jiñobʌch Amram, Izhar, Hebrón, Uziel. 13Amram jiñʌch i tat Aarón yic'ot Moisés. Jini Aarón temel yic'ot i yalobilob tsa' wa'chocontiyob ti ch'ujul bʌ i ye'tel cha'an mi' yʌq'ueñob i majtan tac lac Yum, cha'an mi' melob i ye'tel, yic'ot cha'an mi' subeñob wocolix i yʌlʌ lac Yum c'ʌlʌl ti pejtelel ora.
14-15Tsa' tem ch'ʌjmiyob ti tsic i yalobilob Moisés, i winic lac Yum yic'ot jini levíjob. Jini i yalobilob Moisés jiñobʌch Gersón yic'ot Eliezer. 16I yalobil jini Gersón jiñʌch Sebuel am bʌ i ye'tel. 17I yalobil Eliezer, jiñʌch Rehabías jini yumʌl. Ma'anic yambʌ i yalobil Eliezer, pero wen cabʌlob i yalobilob Rehabías. 18I yalobil Izhar jiñʌch Selomit jini yumʌl. 19I yalobil Hebrón jiñʌch Jerías jini yumʌl, i cha'ticlel jiñʌch Amarías, i yuxticlel jiñʌch Jahaziel, i chʌnticlel jiñʌch Jecamán. 20I yalobilob Uziel jiñʌch Micaía jini yumʌl, i cha'ticlel jiñʌch Isías.
21I yalobilob Merari jiñobʌch Mahli yic'ot Musi. I yalobilob Mahli jiñobʌch Eleazar yic'ot Cis. 22Eleazar tsa' chʌmi che' ma'anic ch'iton bʌ i yalobil, cojach xch'ocob. Cis tsi' siji i yalolobilob yic'otob i yumijelob. 23I yalobilob Musi jiñobʌch Mahli, yic'ot Edar yic'ot Jeremot.
24Pejtelel iliyi jiñobʌch i p'olbalob Leví. Tsa' ochiyob ti censo che' bajche' jaytiquilob i p'olbal i ñojte'elob jini año' bʌ ti jujunc'al i jabilel yic'ot ñumenobix bʌ i jabilel. Jiñobʌch jini tsa' bʌ cajiyob ti e'tel ya' ti Templo. 25Come David tsi' yʌlʌ: Lac Yum i Dios israelob tsa'ix i yʌc'ʌyonla ti ajñel ti ñʌch'ʌl. Mi caj i chumtʌl ti Jerusalén c'ʌlʌl ti pejtelel ora. 26Che' jini mach wersajix mi' chʌn ch'ʌmob majlel jini pisil bʌ otot jini levíjob, yic'ot jini uch'ijibʌl tac am bʌ ti' wenta. Che' tsi' yʌlʌ David.
27Che' bʌ tsi' tsiquiyob i p'olbalob Leví, jiñʌch junchajp jini cojix bʌ i melbal David che' cuxul to. 28An ti' wenta levíjob i p'olbalo' bʌ Aarón cha'an mi' coltañob jini motomajob ya' ti Templo che' mi' tsʌnsʌbeñob i majtan tac Dios. An ti' wenta ja'el cha'an mi' cʌntañob Templo, cha'an mi' sʌq'uesañob chuqui yom sʌq'uesʌntel. 29Tsi' chajpayob waj ja'el mu' bʌ i pʌsbentel Dios, yic'ot i ñich harina cha'an majtañʌl, yic'ot jini waj mach bʌ paj'esʌbilic, yic'ot ch'ilbil tac bʌ, yic'ot jini woch'esʌbil tac bʌ. Che' ja'el tsi' chajpayob jini p'isoñib tac. 30Ti jujump'ejl sʌc'ajel yic'ot ti ic'ajel tsa' ochiyob ti' tojlel lac Yum cha'an mi' c'ʌyibeñob wocolix i yʌlʌ. 31Tsi' coltayob motomajob ja'el ti jujunyajl che' bʌ tsi' pulbeyob lac Yum jini tsʌnsʌbil bʌ alʌc'ʌl tac. Tsi' coltayob che' ti yorajlel c'aj o yic'ot che' ti tsijib uw, yic'ot ti ñuc tac bʌ q'uinijel. Ti pejtelel ora ts'ʌcʌl tsa' c'otiyob jini levíjob che' bajche' yom cha'an ili e'tel ti' tojel lac Yum. 32Tsi' cʌntayob jini Tabernáculo yic'ot jini Templo. Tsi' chʌn coltayob jini motomajob ti pejtelel i ye'tel ti' yotot lac Yum.
Currently Selected:
1 CRONICAS 23: ctuBI
Highlight
Copy
Compare
Share
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.
