1 CRONICAS 2
2
I p'olbalob Israel
(Gn. 35.22-26)
1-2Jiñobʌch ch'iton bʌ i yalobilob Israel: Rubén, Simeón, Leví, Judá, Isacar, Zabulón, Dan, José, Benjamín, Neftalí, Gad, Aser.
I p'olbalob Judá
3An uxtiquil ch'iton bʌ i yalobilob i yijñam Judá, i c'aba' Batsúa ch'oyol bʌ ti Canaán: Er, Onán, yic'ot Sela. Er jiñʌch ñoj ñaxan bʌ i yalobil Judá. Jontol jax ili winic ti' wut lac Yum. Jini cha'an tsi' tsʌnsa. 4Judá tsi' pi'le Tamar i yʌ'lib. Tsi' yʌc'ʌ ti pañimil Fares yic'ot Zera. An jo'tiquil ch'iton bʌ i yalobilob Judá ti pejtelel. 5Jini ch'iton bʌ i yalobilob Fares jiñobʌch Hezrón yic'ot Hamul. 6I yalobilob Zera jiñobʌch Zimri, Etán, Hemán, Calcol, Dara. 7I yalobil Carmi, jiñʌch Acán. Jiñʌch tsa' bʌ i tic'la israelob, come tsi' xujch'ibe i chubʌ'an Dios. Cabʌl tsi' tic'layob israelob. 8Azarías jiñʌch i yalobil Etán. 9Jini ch'iton bʌ i yalobilob Hezrón jiñobʌch Jerameel, Ram, yic'ot Quelubai. 10Ram i tatʌch Aminadab. Aminadab i tatʌch Naasón, juntiquil yumʌl bʌ ti Judá. 11Naasón i tatʌch Salmón. Salmón i tatʌch Booz.
12Booz i tatʌch Obed. Obed i tatʌch Isaí. 13Jini ascuñʌl bʌ i yalobil Isaí jiñʌch Eliab. I cha'ticlel bʌ i yalobil jiñʌch Abinadab. I yuxticlel bʌ jiñʌch Simea. 14I chʌnticlel bʌ jiñʌch Natanael. I jo'ticlel bʌ jiñʌch Radai. 15I wʌcticlel bʌ jiñʌch Ozem. I wucticlel bʌ jiñʌch David. 16An xch'oc bʌ i yalobilob ja'el, jiñobʌch Sarvia yic'ot Abigail. An uxtiquil ch'iton bʌ i yalobilob Sarvia, jiñobʌch Abisai, Joab, Asael. 17I ñoxi'al Abigail jiñʌch Jeter ch'oyol bʌ ti' lumal Ismael. Abigail tsi' yʌc'ʌ ti pañimil Amasa.
18Caleb (i yalobil Hezrón) tsi' pʌyʌ cha'tiquil i yijñam, jiñobʌch Azuba yic'ot Jeriot. I yalobilob Azuba jiñʌch Jeser, Sobab, Ardón. 19Che' bʌ chʌmenix Azuba, Caleb tsi' pʌyʌ Efrata cha'an i yijñam. Efrata tsi' yʌc'ʌ ti pañimil Hur. 20Hur i tatʌch Uri. Uri i tatʌch Bezaleel. 21Che' anix uxc'al i jabilel Hezrón, tsi' pʌyʌ i yalobil Maquir cha'an i yijñam. Tsi' yila pañimil Segub. (Maquir i tatʌch Galaad ja'el.) 22Segub i tatʌch Jair. Jair tsi' cha'le yumʌl ti' tojlel uxp'ejl i cha'c'al (23) tejclum tac an tac bʌ ti Galaad. 23Pero Gesur yic'ot Aram tsi' chilbeyob Jair jini tejclum tac. Tsi' chiliyob ja'el Kenat yic'ot uxc'al colonia tac an tac bʌ ti' joytʌlel. Ti pejtelel i p'olbalob Maquir (i tat Galaad). 24Che' bʌ chʌmenix Hezrón, Caleb tsi' pʌyʌ Efrata, jini cʌybil bʌ ti meba' che' bʌ tsa' chʌmi i tat Caleb. Tsi' yʌc'ʌ ti pañimil Asur. Asur i tatʌch Tecoa.
25Jiñʌch ch'iton bʌ i yalobilob Jerameel jini ascuñʌl bʌ i yalobil Hezrón: Ram, Buna, Orén, Ozem, Ahías. 26An yambʌ i yijñam Jerameel i c'aba' Atara. Jiñʌch i ña' Onam. 27Jini ch'iton bʌ i yalobilob Ram jiñobʌch Maaz, Jamín, Equer. 28Jini ch'iton bʌ i yalobilob Onam jiñobʌch Samai yic'ot Jada. Jini ch'iton bʌ i yalobilob Samai jiñobʌch Nadab yic'ot Abisur. 29Jini ch'iton bʌ i yalobilob Abisur yic'ot Abihail i yijñam jiñobʌch Ahbán yic'ot Molid. 30Jini ch'iton bʌ i yalobilob Nadab jiñobʌch Seled yic'ot Apaim. Seled tsa' chʌmi che' ñoj ma'anic i yalobil. 31Pero an i yalobil Apaim i c'aba' Isi. Isi i tatʌch Sesán. Sesán i tatʌch Ahlai. 32An cha'tiquil i yalobilob Jada i yijts'in bʌ Samai, jiñobʌch: Jeter yic'ot Jonatán. Jeter tsa' chʌmi che' ñoj ma'anic i yalobil. 33Pero an cha'tiquil ch'iton bʌ i yalobilob Jonatán, jiñobʌch Pelet yic'ot Zaza. I p'olbalʌch Jerameel.
34-35Ma'anic ch'iton bʌ i yalobilob Sesán, pero an xch'oc bʌ i yalobilob. Sesán tsi' siji juntiquil xch'oc bʌ i yalobil cha'an mi' yochel ti' yijñam Jarha jini i winic ch'oyol bʌ ti Egipto. Tsi' yila pañimil i yalobil i c'aba' Atai. 36-41Atai i tatʌch Natán. Natán i tatʌch Zabad. Zabad i tatʌch Eflal. Eflal i tatʌch Obed. Obed i tatʌch Jehú. Jehú i tatʌch Azarías. Azarías i tatʌch Heles. Heles i tatʌch Elasa. Elasa i tatʌch Sismai. Sismai i tatʌch Salum. Salum i tatʌch Jecamías. Jecamías i tatʌch Elisama.
42Jini ascuñʌl bʌ i yalobil Caleb i yeran Jerameel jiñʌch Mesa. Mesa i tatʌch Zif. Zif i tatʌch Maresa. Maresa i tatʌch Hebrón. 43Jini ch'iton bʌ i yalobilob Hebrón jiñobʌch Coré, Tapúa, Requem, Sema. 44Sema i tatʌch Raham. Raham i tatʌch Jorcoam. Requem i tatʌch Samai. 45Samai i tatʌch Maón. Maón i tatʌch Betsur. 46Efa i yixic Caleb tsi' yʌc'ʌ ti pañimil Harán, yic'ot Mosa, yic'ot Gazez. Harán i tatʌch Gazez. 47Jini ch'iton bʌ i yalobilob Jahdai jiñobʌch Regem, Jotam, Gesam, Pelet, Efa, Saaf. 48-49An yambʌ i yixic Caleb i c'aba' Maaca. Tsi' yʌc'ʌ ti pañimil Seber, yic'ot Tirhana, yic'ot Saaf (i tat Madmana), yic'ot Seva (i tat Macbena yic'ot Gibea). An xch'oc bʌ i yalobil Caleb ja'el, i c'aba' Acsa.
50Jini ch'iton bʌ i yalobilob Hur (jini ascuñʌl bʌ i yalobil Caleb yic'ot Efrata) jiñʌch Sobal (i tat Quiriat Jearim), 51yic'ot Salma (i tat Belén), yic'ot Haref (i tat Betgader). 52Jini ch'iton bʌ i yalobilob Sobal jiñobʌch Quiriat Jearim yic'ot Haroe. Jiñʌch i ñojte'el lamital jini manahetob. 53I pi'ʌlob jini quiriat jearimob jiñobʌch jini itrajob, yic'ot jini futob, yic'ot jini sumatob, yic'ot jini misrajob. Jiñobʌch i ñojte'elob jini zoratob yic'ot jini estaolob.
54I p'olbalob Salma jiñobʌch Belén i yalobil, yic'ot jini netofatob, yic'ot jini Atrot Betjoab, yic'ot ojlil jini manahetob, yic'ot jini zoratob. Jini xts'ijbayajob chumulo' bʌ ti Jabes i p'olbalʌch Salma. 55Jiñobʌch jini tirateojob, yic'ot jini simeatejob, yic'ot jini sucateojob. Ti pejtelel jiñobʌch ceneojob i p'olbalo' bʌ Hamat. Hamat i ñojte'el ja'el i pi'ʌlob Recab.
Currently Selected:
1 CRONICAS 2: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.