1 Samuel 18
18
Jonatan ki David a ve banad’a
1Ata yima David dap zla mam mba ded’a mi Saul dapma, Jonatan amulâ Saul goroma, hurum ve David, mi le kam d’igi mam tamba na. 2Kur bur máma Saul mi ngom David gevemu, mi aram mi hulong nga avo habum mbi. 3Wani Jonatan azi ki David a djin vunaziya, kayam Jonatan mi le kam d’igi mam tamba na. 4Jonatan mi fok baru mam mba ngola, mi hat mi David, mi hum baru mam ma arigeina ki d’a didi’â mudjuk, mi hum mbigeu mam mba fiyaka ki yeû mamba ki d’ik mama mi. 5Ata yima lara ge pet ma Saul nga mi sun David kuana, nga mi le sun mamba djivid’a. Ni hina ba, Saul mi tinim ngola yam suma dur ayîna; suma pet kazungeîna hi Saul-lâ, tazi nga d’i lazi djivid’a kam mi.
Saul nga mi hal David á tchid’a
6Kur hulong mazi d’a avod’a, ata yima David mi tchi ma Filistê-nina, arop suma kur azì ma Israel-lâ tetengâ a nga hle sawala ki ndjongâ á ngaf amulâ Saul. A nga bu daliyâd’a, a nga er ad’uzi akulo ki furîd’a kading ma ziyom hindina mi. 7Arop suma a nga hle sawalina a nga ve vun tazi ala:
Saul mi tchi suma dubu,
David mi tchi dudubud’a dogo.
8Saul hurum zal ngola, zla ndata lum nga tam djivi d’i, mi dala: A he David dudubud’a dogo, a han an tanda ni dubu wü d’a; amul la ted’a ar avorom ihî ni ndad’u. 9Saul mi ve David kurum kur bur máma ki iram fafat.
10Tcha ndjivinda, muzuk ma tcho ma tcholï ata Alonina mi ve Saul, nga mi tcha tata kur gonga. David nga mi bu adingâ d’igi nga mi bum adjeu na. Saul mi nga kasapa abomu. 11Saul mi hlabom akulo kasapa nga mi pigid’ed’u, mi de kurum ala: An ngruvum asapa atam huyok gonga. Wani David mi fut abom fufut yam mbà. 12Saul nga mi le mandara David, kayam Ma didina mi nga ki sed’emu, wani mi wal lei ki mamu. 13Ni kayam ndata ba, mi wal David tei ki sed’emu, mi tinim ngola yam suma dubuna. David nga mi ndabua, nga mi hulongî avo avok sum mama.
14David sun mam mba nga mi lata nga d’i labom djivid’a, Ma didina mi nga ki sed’em mi. 15Ata yima Saul mi wala sun mamba nga d’i labom djivid’a kur burâ ped’u na, nga mi lum mandaramu. 16Israel-lâ ki suma Juda-na pet huruzi ve David, kayam mam nga mi ndabua, nga mi hulongî avo avoroziya.
David mi ve Mikal Saul goromba atchad’a
17Saul mi de mi David ala: Goron nda ngola Merap wana, an mba ni hangzi atchad’a; ang durun ayîna kad’engêngû, ang dur ayîna hi Ma didinina. Mi djib’er kurum ala: Ar an tchumî an ndi, wani Filistê-na a tchumî aziya.
18David mi hulong de mi Saul ala: An ni nge? Zlan ni zla me ge? Andjaf abun aduk Israel-lâ ni me tala an mbut amulâ akunoma d’a ge? 19Bur mala a he ni Merap Saul goromba atchad’a mi David-d’u na, a hat ni mi Adriyel ma Mehola-na.
20Mikal Saul goromba hurut ve David; a mba de Saul zla ndata, mam hurum ve mi. 21Saul mi de kurum ala: An mba ni humziya, kayam ti mbut ni dauna á vumu. Ar suma Filistê-na a tchumu. Saul mi de mi David kua yam á mbàd’a ala: Ang mba mbut akunona ini.
22Saul mi he vuna mazungeî mama ala: Agi dagi mi David gumun ala: Gola! Amulâ kazungeî mama pet, huruzi vang heî; ki tchetchemba, ang mbut akunoma.
23Azungeîna hi Saul-lâ a dugot zla ndata ded’a mi David. David mi hulong dazi ala: Na ni agi gologi ni vama afefetna iragi á mbut amulâ akunoma zu? Anu, an ni sama houd’a, an ni sama ndak va d’uo na mi.
24Azungeîna hi Saul-lâ a i dum zla d’a David mi data.
25Saul mi dazi ala: Agi i dagi mi David ala: Amulâ nga mi min ni begena d’i, wani mi min ni babak d’iu Filistê-na kis á sä atchugulum ki mam suma djangûna. Saul mi le hina ná zut David abo Filistê-na. 26Azungeîna hi Saul-lâ a mba de zla ndata mi David. David mi min kua á mbut amulâ akunoma.
Avok bur ma a ngamzina, 27David mi tchol ki sum mama, a iya, a tchi suma Filistê-na kikis mbà, a mba ki babak d’uwazi mamulâ d’igi mam ngamzi na á mbut akunoma. Ata yi máma Saul mi hum Mikal atchad’a.
28Saul mi gol na, mi wala Ma didina mi nga ki David; goromba Mikal hurut vum mi. 29Saul nga mi le mandara David ngola, mi mbut ni ma djangû mama ki iram fafat. 30Ata yi ma amulei suma Filistê-na a nga buzuk abagei á dur ayîna ki Israel-lîna, David nga mi tchi suma ngola kal ndrom azungeîna hi Saul-lâ pet; kayam ndata simiyêm nde yïna ngola.
Currently Selected:
1 Samuel 18: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
1 Samuel 18
18
Jonatan ki David a ve banad’a
1Ata yima David dap zla mam mba ded’a mi Saul dapma, Jonatan amulâ Saul goroma, hurum ve David, mi le kam d’igi mam tamba na. 2Kur bur máma Saul mi ngom David gevemu, mi aram mi hulong nga avo habum mbi. 3Wani Jonatan azi ki David a djin vunaziya, kayam Jonatan mi le kam d’igi mam tamba na. 4Jonatan mi fok baru mam mba ngola, mi hat mi David, mi hum baru mam ma arigeina ki d’a didi’â mudjuk, mi hum mbigeu mam mba fiyaka ki yeû mamba ki d’ik mama mi. 5Ata yima lara ge pet ma Saul nga mi sun David kuana, nga mi le sun mamba djivid’a. Ni hina ba, Saul mi tinim ngola yam suma dur ayîna; suma pet kazungeîna hi Saul-lâ, tazi nga d’i lazi djivid’a kam mi.
Saul nga mi hal David á tchid’a
6Kur hulong mazi d’a avod’a, ata yima David mi tchi ma Filistê-nina, arop suma kur azì ma Israel-lâ tetengâ a nga hle sawala ki ndjongâ á ngaf amulâ Saul. A nga bu daliyâd’a, a nga er ad’uzi akulo ki furîd’a kading ma ziyom hindina mi. 7Arop suma a nga hle sawalina a nga ve vun tazi ala:
Saul mi tchi suma dubu,
David mi tchi dudubud’a dogo.
8Saul hurum zal ngola, zla ndata lum nga tam djivi d’i, mi dala: A he David dudubud’a dogo, a han an tanda ni dubu wü d’a; amul la ted’a ar avorom ihî ni ndad’u. 9Saul mi ve David kurum kur bur máma ki iram fafat.
10Tcha ndjivinda, muzuk ma tcho ma tcholï ata Alonina mi ve Saul, nga mi tcha tata kur gonga. David nga mi bu adingâ d’igi nga mi bum adjeu na. Saul mi nga kasapa abomu. 11Saul mi hlabom akulo kasapa nga mi pigid’ed’u, mi de kurum ala: An ngruvum asapa atam huyok gonga. Wani David mi fut abom fufut yam mbà. 12Saul nga mi le mandara David, kayam Ma didina mi nga ki sed’emu, wani mi wal lei ki mamu. 13Ni kayam ndata ba, mi wal David tei ki sed’emu, mi tinim ngola yam suma dubuna. David nga mi ndabua, nga mi hulongî avo avok sum mama.
14David sun mam mba nga mi lata nga d’i labom djivid’a, Ma didina mi nga ki sed’em mi. 15Ata yima Saul mi wala sun mamba nga d’i labom djivid’a kur burâ ped’u na, nga mi lum mandaramu. 16Israel-lâ ki suma Juda-na pet huruzi ve David, kayam mam nga mi ndabua, nga mi hulongî avo avoroziya.
David mi ve Mikal Saul goromba atchad’a
17Saul mi de mi David ala: Goron nda ngola Merap wana, an mba ni hangzi atchad’a; ang durun ayîna kad’engêngû, ang dur ayîna hi Ma didinina. Mi djib’er kurum ala: Ar an tchumî an ndi, wani Filistê-na a tchumî aziya.
18David mi hulong de mi Saul ala: An ni nge? Zlan ni zla me ge? Andjaf abun aduk Israel-lâ ni me tala an mbut amulâ akunoma d’a ge? 19Bur mala a he ni Merap Saul goromba atchad’a mi David-d’u na, a hat ni mi Adriyel ma Mehola-na.
20Mikal Saul goromba hurut ve David; a mba de Saul zla ndata, mam hurum ve mi. 21Saul mi de kurum ala: An mba ni humziya, kayam ti mbut ni dauna á vumu. Ar suma Filistê-na a tchumu. Saul mi de mi David kua yam á mbàd’a ala: Ang mba mbut akunona ini.
22Saul mi he vuna mazungeî mama ala: Agi dagi mi David gumun ala: Gola! Amulâ kazungeî mama pet, huruzi vang heî; ki tchetchemba, ang mbut akunoma.
23Azungeîna hi Saul-lâ a dugot zla ndata ded’a mi David. David mi hulong dazi ala: Na ni agi gologi ni vama afefetna iragi á mbut amulâ akunoma zu? Anu, an ni sama houd’a, an ni sama ndak va d’uo na mi.
24Azungeîna hi Saul-lâ a i dum zla d’a David mi data.
25Saul mi dazi ala: Agi i dagi mi David ala: Amulâ nga mi min ni begena d’i, wani mi min ni babak d’iu Filistê-na kis á sä atchugulum ki mam suma djangûna. Saul mi le hina ná zut David abo Filistê-na. 26Azungeîna hi Saul-lâ a mba de zla ndata mi David. David mi min kua á mbut amulâ akunoma.
Avok bur ma a ngamzina, 27David mi tchol ki sum mama, a iya, a tchi suma Filistê-na kikis mbà, a mba ki babak d’uwazi mamulâ d’igi mam ngamzi na á mbut akunoma. Ata yi máma Saul mi hum Mikal atchad’a.
28Saul mi gol na, mi wala Ma didina mi nga ki David; goromba Mikal hurut vum mi. 29Saul nga mi le mandara David ngola, mi mbut ni ma djangû mama ki iram fafat. 30Ata yi ma amulei suma Filistê-na a nga buzuk abagei á dur ayîna ki Israel-lîna, David nga mi tchi suma ngola kal ndrom azungeîna hi Saul-lâ pet; kayam ndata simiyêm nde yïna ngola.
Azumeina Bible © Alliance Biblique du Tchad, 1999.