Salmos 99
99
Salmo 99
Su'si ma chi ñatuu xndoo ya ñayii ñuu ya ma
1Su'si o iya tátnuni ñuu ñayivi a,
núkoo ya siki ángel nani querubín ma,
te chukan kúu ja ndaka ñayii ka iyo ndaka ñuu ma,
ka ni'i ka ni'i‑nka i ja ka yu'u i vaa skanda ya ñu'ú a.
2Su'si ma, iya kanuu kúu ya ñuu Sion ma,
te ndaka ñayii ka iyo ñuu ñayivi a,
ka ka'an i ja maa ya kanuu‑ka sana ndaka‑ka ñuu ma.
3Jin ndachiñu'u ni ya,
vaa iya kanuu iya ii iya koyu'u o kúu ya,
te sa'a jin kuña'a ni ya:
4“Maa ni kúu Rey iya sa'a ndaa sa'a ndija ma,
te chukan kúu ja kóo jayiñu'u nuu maa ni a.
Te maa ni káxtnu'u ja inuu‑ni ka kuu ndaka ñayii ma,
te ñatuu na nde i kanuu‑ka.
Te sukan ni sa'a ndaa ni sa'a ndija ni ji'in sa'ya tata Jacob ma.”
Sa'a jin kuña'a ni ya.
5Jín ndachiñu'u o Su'si o Iya Tátnuni ma,
te jín kunukoo jiti o nuu ja'a ya ma,
vaa maa ya chi iya ii kúu ya.
6Moisés ma, ji'in Aarón ma,
ji'in ndaka‑ka sutu ni ka yo jinukuechi nuu Su'si ma,
ji'in Samuel ma,
ji'in ndaka‑ka tee ni ka yo ndakune'e Su'si ma,
ni ka yo jikan‑ta'vi de nuu ya,
te maa ya ni yo ndakone'e nawa ka jikan‑ta'vi de ma.
7Te ne'un viko ma ni yo ka'an Su'si ma nuu de ma,
te ni ka yo sa'a de ndaka sukan ni yo tatnuni ya ma.
8Iya Tátnuni, maa ni ni yo ndakone'e
nawa ni ka yo ka'an de ma,
te maa ni kúu Su'si iya ni yo sakanu ini
na kuechi ñayii ñuu ni ma,
te ni yo sa'a ni ja ni ka yo ndakuni, ni ka yo ndakoto i
ja u'vi ni ka yo sa'a, ni ka yo kuu i ma.
9Te chukan kúu ja yo'o chi jín kunukoo jiti o
nuu yuku ii ya ma,
te jín ndachiñu'u o Su'si o Iya Tátnuni ma,
vaa iya ii kúu ya.
Currently Selected:
Salmos 99: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
