Salmos 92
92
Salmo 92
Sukan jin ndachiñu'u o Su'si iya va'a ini ma
1Ja va'a xeen kúu ja jin ndachiñu'u ña'a sa, vi Su'si Iya Tátnuni,
te jin kata sa in yaa ká'an jayiñu'u ja kuu maa ni,
vi Su'si iya iyo onde andivi ma.
2Te xtnee ne'e ma,
te jin ndaka'an jin ndakachi sa sukan nda'vi ini ni ma,
te jakuaa ma, te jin ndaka'an jin ndakachi sa
ja maa ni chi ndimaa sa'a ni sukan skuiso ni ma.
3Te jin tee sa guitarra ma, te vivii jin kata sa nuu maa ni.
4Vaa nde'ya sa ndaka ja ni sa'a ni a,
te chukan kúu ja iyo sii ini xen‑xeen sa, vi Su'si.
5Masu na in kundee ndaka'an ndakachi
ndaka ja ni sa'a, ni kuu ni, vi Su'si.
Te ûni kua'a xeen kúu ja jani ini ni
ja ni masu na in kundee ja jaku'ni ini i ndaka, vi Su'si.
6Kovaa ñayii ñatuu ndása'a kuenda ndaka ja sa'a ja kúu ni a
chi masu nawa jini kuiti i,
te ñayii ndee ini ma chi ñatuu jáku'ni ini i
ja maa ni ni sa'a ndaka ma.
7Te chukan kúu ja kua'a xeen ñayii ka sa'a ja u'vi ma ka iyo,
te ka ni'i ka tna'a i.
Sukan nána kua'a xeen yi'i ma, sukan ka iyo i,
kovaa iyo tu'va ja jin skenaa i maa i ni‑kani ni‑jika.
8Kovaa maa ni chi ni‑kani ni‑jika iyo ni ichi andivi ma.
9Te ja ndaa ndija kúu ja ñayii
ñatuu nde ka kunimani i nuu ni ma
chi jin skenaa i maa i,
te ñayii ka sa'a ja u'vi ma
chi jin skenaa i maa i,
sani te jin kuitenuu i.
10Kovaa nuu saña chi ndataa kua'a‑ka ni tnu'u ndee tnu'u ndatnu,
sukan iyo tnu'u ndee tnu'u ndatnu xndiki ka'nu ka'nu ma,
te chiso ni aceite tnu olivo ja yika ni kee ma xini sa a.
11Te konde'ya sa sukan jin kotuu
ñayii ñatuu ka kunimani nuu sa ma,
te kuniso'o sa sukan jin skenaa
ñayii ka sa'a ja u'vi ma.
12Te ñayii ka sa'a ja va'a ja ndaa ma chi jin konukuiñi va'a i
sukan ka nukuiñi va'a tnu ñuu ma,
te jin koo va'a i
sukan ka iyo tnu itni ka iyo ñuu Líbano ma.
13Te jin koo va'a i ini ve'e Iya Tátnuni ma,
te vivii jin ko kuu i nuke'e Su'si o ma.
14Te visi ni ka kuu nija'nu i ma,
kovaa jin sa'a i ja vii ja va'a ma,
te ndimaa jin koo tnu'u ndee tnu'u ndatnu i,
te sukan, te jin kuni ñayii ma ja ka iyo ndee ka iyo ndatnu i.
15Te ja sukan ma, te ka kaxtnu'u i nuu ñayii ma
ja Su'si Iya Tátnuni ma kúu iya wa'a
tnu'u ndee tnu'u ndatnu ma
iya sa'a ndaa sa'a ndija ma,
te maa ya chi masu nde sa'a ndeva'a ya ñayii ma,
vaa iya va'a ini kúu ya.
Currently Selected:
Salmos 92: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
