Salmos 107
107
Salmo 107
LIBRO V
Su'si ma chi sa'a ya ja ka kaku ñayii ñuu ya ma nuu tnundo'o tnuneni ma
1Jín ndachiñu'u o Su'si o Iya Tátnuni a, vaa iya va'a ini kúu ya,
te ni‑kani ni‑jika kúnda'vi ini ña'a ya.
2Te sukan tna jín kuña'a ndaka ñayii nuu Su'si Iya Tátnuni ma,
vaa ni sa'a ya ja ni ka kaku i nuu ja u'vi ma,
te ni ndene'e ya i nuu ñayii ñatuu ka kunimani nuu i ma.
3Vaa ñayii ka iyo in in ñuu ma,
kúu ichi nuu kána kandii ma, kúu ichi nuu kée kandii ma,
ichi ninu ma xi ichi nuu vee ma,
te ni ndaxtutu ya i.
4Te ñayii ma, kuan koo ve koo i nuu ñatuu nawa iyo kuiti ma,
te ka kuu maa ka kuu in‑nka i ichi ma nkuu,
te ñatuu nde ka ndani'i i in ñuu nuu jin koo i ma.
5Te ka kokon ka yichi i, te ka kuita ini anua i ma nkuu.
6Te nuu ka ndo'o ka neni i ma,
te ni ka ndakune'e i Su'si Iya Tátnuni ma,
te maa ya chi ni sa'a ya ja ni ka kaku i nuu tnundo'o tnuneni ma.
7Te ni ndaskaka ya i ichi ndaa ma
onde ni ka kenda koo i ñuu nuu kuu jin koo i ma.
8Te chukan kúu ja na jin ndakuan‑ta'vi i nuu Su'si o ma,
ja sukan kútoo ña'a ya ma,
ji'in ja sukan sa'a ya ja vii ja va'a ja jin kuu ndaka ñayii ma.
9Vaa maa ya wa'a ndaka tu'u ja ka jiniñu'u ñayii ma,
te wa'a ya ndaka nawa jin kaa i ma,
te ñatuu nde ka kokon ka yichi i.
10Te ka iyo ñayii ma kuenda tnu'u ja vekaa ka yinee i,
ni ka iyo i nuu nee ma,
te ni ka yo kuxii, ni ka yo kunda'vi ini i,
11kuechi ja ñatuu nde ni ka kandija i
ja ni tatnuni Su'si o Iya Tátnuni, iya iyo onde sukun ma,
su'va ni ka saxiko i ja ni ka'an ya ma.
12Te chukan kúu ja ni wa'a ya tnu'u
ja ni ka ndo'o, ni ka neni i.
Visi ni ka yo nduva i ma, kovaa masu na in ni yo chindee ña'a.
13Te ne'un tnundo'o tnuneni ma,
te ni ka ndakune'e i Su'si Iya Tátnuni ma,
te maa ya ni sa'a ja ni ka kaku i
nuu tnundo'o tnuneni ka iyo i ma.
14Te ni ndene'e ya i nuu nee ni ka iyo i ma,
te ni sakuechi, ni salikin ya yo'o kaa ni ka yo nu'ni i ma.
15Te chukan kúu ja na jin ndakuan‑ta'vi i nuu Su'si o ma,
ja sukan kútoo ña'a ya ma,
ji'in ja sukan sa'a ya ja vii ja va'a ja jin kuu ndaka ñayii ma.
16Te ni sa'a ya ja ni ka kukuechi, ni ka kulikin ye'e kaa
nuu ni ka yo ndesi va'a i ma,
ji'in kaa ka ñundijin ye'e ma.
17Te ni ka iyo tna ñayii ni ka yo ku'u xeen,
te ni ka yo ndo'o, ni ka yo neni i,
ja kuechi ja ñatuu ni ka yo kandija i ja ká'an Su'si ma
te ni ka yo sa'a‑ka maa i ja u'vi ma.
18Te ni ka yo kukini ini i ja jin kaa i ma,
te sani te jin kûu i ka kuni i,
vaa ñatuu nde ni ka yo ku‑asi‑ka yu'u i ja jin kaa i ma.
19Kovaa nuu ka ndo'o ka neni i ma,
te ni ka ndakune'e i Su'si Iya Tátnuni ma.
Te maa ya ni sa'a ja ni ka kaku i
nuu tnundo'o tnuneni ka iyo i ma.
20Ni tatnuni ya ja jin nduva'a i, te ni ka nduva'a i,
te ni ka kaku i ja ñatuu ni ka ji'i i ma.
21Te chukan kúu ja na jin ndakuan‑ta'vi i nuu Su'si o ma,
ja sukan kútoo ña'a ya ma,
ji'in ja sukan sa'a ya ja vii ja va'a ja jin kuu ndaka ñayii ma.
22Te tna'a ja jin ndakuan‑ta'vi i nuu Su'si ma
ko kuu yaa ja ká'an sukan sa'a sukan kúu ya ma,
te jín kaxtnu'u sii ini i nuu ñayii ma sukan sa'a ya ma.
23Te ka iyo ñayii kuan koo ve koo i nuu mar ma ji'in barcu i ma,
ka nduku i nawa jin xiko i.
24Te ñayii yukan chi ka jini i naxe kaa ni‑ka'nu nuu mar ma
onde ka'a mar ma ndaka nawa iyo ma,
te ka ndasa'a i kuenda ja maa Su'si ma ni sa'a ndaka ma.
25Te suni maa ya tátnuni nuu mar ma,
te yi'i xen‑xeen tachi ma, te ja'nu ja'nu‑nka nuu ndute ma.
26Te ka nda koo ka nu koo barcu ma nuu ndute ma ka kuu tnu,
te ka yu'u ka yu'u‑nka ñayii ma,
nasa yukan, te jin skenaa i maa i ma.
27Te ka ni'i ka ni'i‑nka i ja ka yu'u xen‑xeen i,
kuenda tnu'u ja ka ndajini i ma,
te visi inundichi xeen i ma, kovaa masu nawa kúu jin sa'a i ma.
28Nú masu ja onde ka ndakune'e i Su'si Iya Tátnuni ma,
sana chíndee ña'a ya, te ka kaku i nuu tnundo'o tnuneni ma.
29Te sa'a ya ja tachi kuiñi kuiñi‑nka ni yi'i,
te ndúkuee kuiti‑nka‑ni nuu ndute ma.
30Sani te ka ndusii ini i ja ni ndukuee nuu ndute ma,
te maa ya skaka ña'a onde ka ndani'i i nuu jin koo i ka kuni i ma.
31Te chukan kúu ja na jin ndakuan‑ta'vi i nuu Su'si o ma,
ja sukan kútoo ña'a ya ma,
ji'in ja sukan sa'a ya ja vii ja va'a ja jin kuu ndaka ñayii ma.
32Ora ka ndatna'a ñayii ma, te jín ndachiñu'u i Su'si o ma,
te nuu ka ndatna'a tee ka kuu ja'nu ma,
te jín ndachiñu'u tna de ya.
33Vaa Su'si ma chi kuu sa'a ya ja yute ma, te ndayichi i,
te masu na ndute‑ka ko kaka,
te kuu sa'a ya ja nuu tóo ndute ma, te ndayichi kuiti i.
34Te ñu'ú nuu kúu xeen nawa ka saka i ma,
te ndasa'a ya ja nduu i in ñu'ú ja masu nawa kuu kuiti‑ka,
ja kuechi ja u'vi ka sa'a ñayii ka iyo ma.
35Te kuu ndasa'a ya ja nuu yichi nuu ñatuu kuiti nawa iyo ma,
te nuku'un ndute,
te ñu'ú yichi ma,
te ndatoo kua'a xeen ndute.
36Te sa'a ya ja yukan jin koo ñayii ka kokon ka yichi ma,
te jin ndasañuu maa i, te yukan jin koo i.
37Te jin saka maa i tnu uva ma,
te kua'a xeen nde'ya ma jin ni'i i ja jin ndaxtutu i.
38Te vivii sa'a ya, sukan‑va'a jin ndukua'a xeen ñayii ma.
Te kiti i ma, jín ndukua'a xeen tna ti.
39Kovaa nú ka ji'i ñayii ma,
kuechi ja ka sa'a ndeva'a ña'a ñayii ka tatnuni‑ka ma kúu.
40Kovaa Su'si ma, saxiko ya ñayii ka sa'a ndeva'a tna'a ma,
te sa'a ya ja kuan koo ve koo maa i
jin ko kuu i nuu ñatuu kuiti nawa iyo ma.
41Kovaa Su'si ma chi ndene'e ya ñayii
ka ñunee nuu ka kunda'vi ka kukee i ma,
te sa'a ya ja jin ndukua'a sa'ya tata i ma,
sukan ka kuu ndikachi ma.
42Jín konde'ya ndaka ñayii ja ka iyo va'a i nuu Su'si o ma,
te jín ndusii ini i,
te ndaka ñayii ka sa'a ja u'vi ma, na jin kasiyu'u i.
43Ñayii ndichi ma, na konde'ya va'a i sukan sa'a ya ma,
te jáku'ni ini i sukan kútoo ña'a Su'si Iya Tátnuni ma.
Currently Selected:
Salmos 107: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
