Proverbios 31
31
Sukan ko sa'a ko kuu tee kúu rey ma
1Tnu'u ya'a ka kuu tnu'u ndichi ni ka'an rey Lemuel ma
ja ni ndakaxtnu'u si'i de ma.
2Ro'o kúu sa'ya maa ri ja ni ñunee ro chii ri ma,
te maa ri ni jikan ña'a nuu Su'si ma.
3Máko ko sa'a ndeva'a ro tnu'u ndee tnu'u ndatnu ro a,
vaa kona'a ro ja ña'a ma chi ka sa'a ña ja ka skenaa rey ma maa de.
4Vaa kona'a ro, vi Lemuel, ja masu va'a‑ni ja rey ma
te jin ko'o de ndixi,
te suni tee ka netniñu ma, masu va'a‑ni ja jin ko'o tna de ndixi.
5Vaa nuna ko'o de ndixi ma
chi sa'a i ja ndunaa de sukan ká'an ley ma
te ndaxsama de sukan ká'an ma
te sa'a ndeva'a de ñayii nda'vi ma.
6Xndoo ndixi ma, te jin ko'o maa ñayii ka kuxii ka kunda'vi‑nka ini
te ka jani ini i ja masu jin kuu‑ka i ma.
7vaa ñayii ya'a chi ka ji'i i ndixi ma,
te ka ndunaa i ja ka kunda'vi ka kukee i ma
ji'in ndeva'a‑ni nawa ka ndo'o ka neni i ma.
8Ndakune yu'u ro a, te ka'an ro
te chindee ro ñayii ñatuu kúu jin ka'an ja jin kuu maa i ma.
9Ndakune yu'u ro a, te ka'nde ndaa ro tniñu ñayii nda'vi ma
ji'in ñayii ñatuu na in chíndee ña'a ma.
Ña'a ndichi ma chi ndimaa ja vii ja va'a sa'a ña
10Ña'a tiñi'i ini ma te ndúku ña ja sa'a ña ja va'a ma,
masu ndenu iyo ndeva'a ña'a yukan.
Vaa in ña'a kúu sukan chi ja va'a xeen‑ka kúu
sana yuu vivii ma ka ndee ya'vi xeen ma.
11Vaa yii ña ma chi kúkanu ini xeen de ña,
te nduu de ji'in ña chi ndimaa jin ko ni'i jin ko tna'a de.
12Ndimaa ja va'a sa'a ña ja kuu yii ña ma,
te ndaka kivi koteku de ma
chi masu sa'a ña ja ko ndo'o ko neni de.
13Vaa maa ña chi ja'an ña jan nduku ña ixi ndikachi
ji'in yu'va lino ma,
te sii ini‑ni satniñu ña ji'in nda'a ña ma te sa'a ña sa'ma.
14Te sukan kúu in barcu tee ndakuaan te ndaxiko de ndatniñu ma,
sukan kúu ña, vaa visi jika xi yatni,
te kua'an ña kuan nduku ña ja jin kaa ndaka ña ve'e ña ma.
15Ndanee‑ka ndákoo ña xtnee ne'e ma,
te wa'a ña ja ka jaa sa'ya ña ma
ji'in ña'a ka jinukuechi ve'e ña ma.
16Ja'an ña jan koto ña ñu'ú ka ndaxiko i ma
te ndákuaan ña ji'in xu'un ni ni'i maa ña ma,
te nuu ñu'ú yukan chi súnkoo ña ja ni jaan ña
ji'in xu'un ni ni'i ña ma.
17Ûni tnuñu ña satniñu ña,
ûni ni‑yu'u ni‑ini ña satniñu ña,
te kúndee ña kéne'e ña tniñu ma,
18te jito va'a ña nú va'a‑ni kuan koo ndaka tniñu sa'a kúu ña ma
te ni masu kuita ña, vaa visi jâ ni kunee ma te satniñu‑ka ña.
19Ji'in nda'a maa ña ma kéne'e ña yu'va ma,
te sa'a ña sa'ma jin kone'nu ña ve'e ña ma.
20Te ndimaa chíndee ña ñayii ka kunda'vi ka kukee ma
nawa ka jiniñu'u i ma.
21Maa ña chi másu ndí ini ña nawa jin kuu ñayii ve'e ña ma
kivi kuvijin xeen ma,
vaa jâ ni satu'va ña sa'ma kokon jin kone'nu i.
22Maa ña sa'a sa'ma ka yoxtnee nuu jito ka kixi ñayii ve'e ña ma,
te sa'a ña sa'ma lino, sa'ma va'a ne'nu ña.
23Yii ña ma chi ka ka'an vii ka ka'an va'a i ja kuu de
ora núkoo de ne'un tee ka tatnuni‑ka ma
nuu kivi o ini ñuu ma.
24Sa'a ña sa'ma ji'in ja jin ki'i ñayii ma chii i ma,
te xiko ña nuu ñayii ka ndaxiko nuya'vi ma.
25Iyo xeen tnu'u ndee tnu'u ndatnu nuu ña,
te iyo jayiñu'u ña nuu ñayii ma ja sukan sa'a ña ja va'a ma,
te másu nde yu'u ña nawa ko kuu kivi ki'in o ma.
26Te ora ká'an ña ma, ndimaa tnu'u ndichi ká'an ña,
vaa ja káxtnu'u ña ma kúu ja ndimaa jín kutoo tna'a ñayii ma
te jín kuaan mani tna'a i.
27Másu ña'a kuxi kúu ña,
vaa ndí ini ña ja ndaka ja iyo ve'e ña ma na jin koo va'a,
te másu nama jaa ña xita nú masu onde satniñu ña.
28Sa'ya ña ma chi ka jinkuiñi i,
te ka ka'an vii ka ka'an va'a i ja kuu ña,
te yii ña ma ndáchiñu'u de ña, te jiña'a de:
29“Kua'a xeen ña'a ka sa'a ja va'a,
kovaa ro'o chi sa'a va'a xeen‑ka ro
sana ndaka‑ka ña ma”, kúu de jiña'a de.
30Ja vivii kaa in ña'a ma te vivii ká'an ña ma
chi in ja xnda'vi‑ni ña'a kúu, nú chukan na kukanu ini o,
kovaa ña'a yu'u Su'si ma te ñatuu sa'a ña ja u'vi ma
chi ja ndaa kúu ja iyo ña ja koo jayiñu'u ña.
31Jin ndakua'a ni jayiñu'u ña'a sa'a ja va'a ma,
jin ndakunitnuni ni ndaka ja sukan sii ini satniñu ña ma.
Jin ndaka'an jin ndakachi ni ndaka ja vii ja va'a sa'a ña ma
te na jin kuni ndaka ñayii ma.
Currently Selected:
Proverbios 31: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.