Roomma 16
16
Pauroofa narí aqoondiuqa nimandaidanoo.
1Oo qini qiqoondiuqa Roomma maqusai mariasa anaasee moo fannoo Keenakareea maqusai Yisuna ufa irimariasa dadaaqimari anaaseefa maasa nisookifa mina auqu Fooeebee nammarifa qusasaa innee iannai Roomma maqusai fuannoo. 2Mifa andeeqara anaasee marinoo oonurainaqa innee Anutuna faiqi namu naanna ramasee karaambaiqa ufa irimari anaasee fee qimasee amiqimandee qumaree rakisidaqa mi anaaseefa moo ainaina ummaara moo bisinisa Roomma maqusai auqainaqa innee kaqi dadaaqiaqa. Mi anaaseefa moomoo fasiqa anaasee dadaaqirafa qini faqa dadaaqira qiqoondi maridanoo.
3-4Inni Roomma maqusai maria fasiqa anaaseeqanda, anaasee auqu Pirisikaa nammarifa maridanoo afaaqi auqu Akuiraafa mi qafaqiqanda qini dadaaqirana nári kuqiranara paasoosamandee moomoo kari nimeekaranaki fidaqa qini dadaaqimariasa maridaqa, asauku mundirana Yisuna ainainirana dadaaqi mariaqanda maridaqa. Sia qini kai dadaaqimariaqanda aiqama aanaamuru Yisuna ufara suqufi qimariasa misa faqa dadaaqimariaqanda marianara misa faqa qinee faqa miqandara dufi dufi qidaqa. Qinee maa pasanaki mi qafaqisa nimandaida.
5Mi qafaqisa maaqaki Yisuna ufara suqufi qimariasa amaana maqa sia marinara suqufida qimariasa misa faqa maa pasanaki nimandaidaqa. Qini qifaaqasaa qiqoondi auqu Eepaeeneetusafa aiqama Asia maqannaakina indaaru asauku mundirana aqoondikufa, qinee maa pasanaki mina faqa amandaidaqa.
6Moo anaasee auqu Maria nammarifa (sia Yisuna anoofau mina amarafa) firaaqoo inni Roomma maqusanaasara kadaapirufa maridanoo qinee mina faqa amandaidaqa.
7Qini maqannaa Yuda maqannaa fasiqa anaasee qini faqa karabusaki maruqanda nuqu Andaroonikusafa faqa Iunia nammarifa faqa mi qafaqisa naaree Yisuna saqariki maruqanda maridaqa qinee innaaqianna. Yisufa niqiqoo fasiqausa amiqimandee miqandara iri mariqau. Qinee miqandara faqa maa pasanaki nimandaidaqa.
8Qini qifaaqasaa qiqoondi moo auqu Ampariatusafa mifa faqa maasa faqa karaambaiqa ufaki maasa faqa moodaanaki mariufa inni faqa marifaqa mina faqa maa akaranakiqari amandaidaqa.
9Asauku mundirana ainainiranakina maasa faqa moodaanaki mariufa. Urabanusana faqa inni faqa marina amandaidaqa, Qini qifaaqasaa qiqoondi moo auqu Sarakisafa inni faqa marina amandaidaqa.
10Apeereesana faqa amandaidaqa, mifa aukuana aukuana asauku mundiranasaa atooqafinoo mina ainainirana faakanaikirafa marifa. Aristooburusana faqa mina aiku asauku faqa nimandaidaqa.
11Qini qiqoonna Yuda maqannaa Eeroodioonana mina faqa amandaidaqa. Narakisusana narí aiku asaukukiqari Yisuna ufa iri mariasa nimandaidaqa.
12Anaasee qaaraqanda asauku mundirana ainainiranaki maru aanaaseeqanda nuqu Tirifaee nammarifa faqa Tirifoosa nammarifa faqa miqanda faqa nimandaidaqa. Anaasee moo qini qifaqasaa qiqoondi Karaambaiqa saika firaaqoo uqanna maree marifa mina auqu Peerasisa nammarina faqa amandaidaqa.
13Karaambaiqa saikaki mariasakiqari amiqirafa mina auqu Rufusafa mina anoofa faqa qinee faqa mina amaakuara foora marunnanara miqanda qisanoosara nimandaidaqa.
14Maa fasiqa namusa nuqu raanaura. Asinakaritusafa faqa Fareekoonafa faqa Qeerameesafa faqa Pataroobasafa faqa Qeeramasafa faqa minamusa faqa aiqama Yisuna ufa irimariasa faqa misa nimandaidaqa.
15Firoorookusafa faqa Iuriafa faqa Neereeusafa narí asookisandiri faqa Oorimpasafa faqa aiqama Anutuna ufa irimariasa faqa misa faqa mariasa faqa nimandaidaqa.
16Innee suqidaqa nariara nariara nikaqafasaara foora narí sukukee narí sukukee iaqa. Aiqama maqusa maqusa asauku mundirana ufara suqufi qimariasa misa faqa inni Roomma maqannaa nimandaidaqa.
Akaqausa rainee mariasa mi ufanara eerairiaqa.
17Oo qini qikaqaafasaauqa qeeqa qimuqusa ookiqara afeekaikamandee inni qimannimidaqa. Akaqausa rainara ufa oosana areemarisara eerairiaqa. Misa Yisuna saqariki mariasa akaqausa kuridi nimaqaidaqa innee maroo andeeqara ufana ateekaidaqa, misara rufiasee nianai mariaqa. 18Miqi mariasa sia maasa karaambaiqa asauku mundirana ainainau idau, misa nári nidimari mandainainara kai randaida iridaqa. Misa nári nimanira ufannai faqa nári nifaurunnai kai susumma nimaqaranannai faqa amiqira fasiqa anaasee iriranara uneemaana qidaqa. 19Aiqama maqannaasa inni Roomma maqannaasara iridaqa innee Yisunasaa atooaqa marianara irimariafaqa qinee faqa iridaqa asasidaqa. Qinee inniara oosana oosana amiqira oosanara akoofasauqa mariaqee qidaqa, oosana oosana mandoosanara aaminaikiaqee qidaqa. 20Anutufa maasa asooarana oosana faqaafa qusasaa Sadannana inni niku ameemaanaira foora mareeqeenoo quqasee radamusaannoo. Karaambaiqa Yisuna afaarirafa inni faqa mariannoo.
21Maaqoo qini faqa mariasa nári nimandarana inni nimidaqa misa nuqu Timootifa qini moodaa ainainirana dadaaqi marifa inni nimandaidanoo Rukiusafa faqa Iasoonafa faqa Soosipateerafa faqa misa aiqamausa qini maqannaa Yuda maqannaa mariasa misa faqa inni nimandaidaqa.
22Qinee Teeratiusausa Pauroona ookinaana iridaqa maa pasana akara rimarunausa maridaqa, maqee qinee faqa Yisuna ufa irimarunausa maridaqa inni nimandaidaqa.
23Yisuna ufara suqufi qimariasa Kaiusana maaqaki maqee maqee suqidaqa, qinee Pauroosa faqa mina maaqaki marunanoo mi fasiqafa Kaiusafa inni Roomma maqannaasa nimandaidanoo. Qeeqa maqee marunna maqusanaasa munnimma kansoora munnimma rakisimarifa mina auqu Eerasatusafa faqa maasa qikaqaafasaa Kuaratusafa faqa inni nimandaidaqa. 24Maasa karaambaiqa asauku mundirafa Yisufa mina afaarinoo kaqi nimira oosana inni aiqamausa faqa mariani.
Ufati taikarufa
25Doo maasa Anutuna areenarana amia, Ooqai oosana aroonakiqari kukeeqara anoona ufa Isaraee maqannaasa faqa aanaamuru maqannaasa faqa Anutufa asumu mariranaki quqaaninna ufana kukeeqanoo mariufa maqee Yisunaki koorooinoo maridanoo. Mi kooroo ira ufafa inni Yisuna saqariki mariana minaki inni amana mapuku nimaqaannoo. Amiqira fasaasa ufa asauku mundirana Yisunara qinee qimannimiqa nunnana, inni Yisuna saqarikirana mi ufanasaa mundinoo maridanoo. Amana Anutufa inni Yisunaki saqarikirana mapukusee quqannisaanoo. 26Ooqai mi kukeeqara anoona ufafa maqee naaru naaru marira Anutufa ufa qufanoo mi kukeeqara ufafa aiqamausakina akoosaqa kooroomafifanoo marifaqa qafaidaqa iridaqa. Anutufa ufa qufanoo Yisufa sia kambiqooqoo tamummara fasiqauqa Yisuna aufakiana kooroo iqau. Maqee faqa aiqama maqannaa qimannimiafaqa mi ufanasaa irirafa rusififaqa iridaqa eedoo qimasee mi mau fuaqeera.
27Moodaa mari Anutufa naríara aiqama ainainara irimarifa, mina asauku mundirana Yisunannai naaru naaru areenarafa minaindi mariani. Kuqaa.
Currently Selected:
Roomma 16: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.