Idi Ufa 18
18
Rakirana Uriaaqarara idi Dafidifa ranau.
1Anee qini itita qimaqee marianafa mariannanara ani Yaaweenara firaaqoo dididanoo.
2Yaaweefa qini itita qimaqee marifa maridanoo.
Mifa qini afeeka faandaamurara foora maridanoo.
Qini Anutufa qini itita qimaqee marifa maridanoo.
Minaki marunnanara asumu maridaqa.
Mifa qini rakira saqariara foora maridanoo.
Mifa qinisaa ititaseenoo qini asumu mara quqaqisaidanoo.
3Qinee Yaaweenara innaaru qunanoo qini
namuqaauqa darirari mariana kinaana asumu mara quqaqiseenoo.
Minara Yaaweena amooqiaqa.
4Manda kuqirafa qini fiqu fiqu inoo marifanoo,
darirafa ooruku nammari amakauriara foora inoo qini rafaaqafidanoo.
5Manda kuqirafa qini fiqu fiqu inoo marifanoo, faiqí
madika fannoo ufaanara foora qini qimaara fufinoo maridanoo.
6Qeeqa ummaarakiqari Yaaweena aareeqa.
Qinee qeeqa Anutuna dadaaqianifeera aareeqa.
Narí amaana maqakiqari qini nammeera qirana irinoo.
Qinee dadaaqianifeera nammeera qiqa.
7Anutufa qini namuqaara aranaqainara maqa kasifanoo aaqanauqa doori doorifanoo firaa ooniuqa faqa kasi kasidanoo.
8Ida muna fannoo Yaaweena aikaamaraindari anifanoo aiqama ainaina qama taikara ida faqa ida qauni namufaqa mina ookiqari anidanoo.
9Yaaweefa innaaruna rakeemmafufanoo quminau.
Mina aiku ameemaanai asukuna arira oonnamu marinau.
10Yaaweefa aqoosa faqaa ainainasaara foora ooqu marifinoo qaqamaree ufaimau quminau.
11Mifa asukunannoo narí kukeeqasoofanoo, amatooki oonnamu aaku suqirafa mina fiqu fiqu inoo marinau.
12Pupusamu faqa idauru fasafasirafa faqa mina
oorinni aakuasaa iranakiqari qumureenoo asukuna arira oonnamu rakeeinau.
13Yaaweefa innaarunaindari innaarunai qiara foora qufaqa kaaqa uriqarara Anutuna ufa iriqau.
14Yaaweefa miqi qidanoo narí feefauqa qumaree aquseenoo namuqaa narufaqa daraaniqau.
Mina aakuasaa fannoo feefara foora aqusee narufaqa quqasee sandaqau.
15Anee aneenna namuqaauqa niqiseenana aranaqoofana rairai qimannimaqee marinau.
Miqunanoo ooruku nammari ameemaanaindaraa maqa koorooinau.
Maqa ameemaanaindaraa ooniuqa faqa koorooinau.
16Yaaweefa innaarunaindari qini nammari farumakinaanara foora qisauku qumaree uqeera quqanau.
17Mifa qini afeeka namuqaauqa nisaukukinaana mara kaqinni quqaqiseenoo, qiniara fidiaqaa imariasa
qini uridaaqarara afeeka faqaasa nisaukukinaana faqa mara kaqinni quqaqisanau.
18Qinee ummaaraki mariafanaqa qini namuqaauqa qini darirariqau.
Miqufanoo Yaaweefa qini ititaqimaqanau.
19Mifa qiniara asasi marunara qini manda ummaarakinaana dadaaqamma qisanau.
20Qinee andeeqee marunnana akiiqara amiqi amiqimma qimaqeenoo.
Qiniki sia aaqarafa marinara miqimma qimaqaidanoo.
21Qinee Yaaweena sandufamau fimarunausa maridaqa.
Sia qeeqa Anutuna qimeesa uqusee mandoosana maraidaqa.
22Qinee mina aiqama sandufamau fimarunausa maridaqa.
Qinee sia mina naamuaqira ufa rukiqaunausa maridaqa.
23Qinee aaqarana siaisa marunnanara mifa iridanoo.
Qinee kaqi runna fuanoora qeeqa mariranasaa rakisidaqa.
24Qinee miqunnana akiiqara faqa andeeqara oosana maraunnanara faqa mifa amiqimma qimaqaidanoo.
Qinee aaqarana siaisa marunnanara miqimma qimaqaidanoo.
25Oo Yaawee aniki mapukusee mariasa anee misa mapukunnimaqee mariananoo.
Kaaqa andeeqee mariasa anee amiqi amiqimma nimaqee mariananoo.
26Anee kaaqa anukarausa andeeqa nimaqee mariananoo.
Mandoosana maree mariasa mandaikamma nimaqee mariananoo.
27Nári mara maree qumi mariasa anee asumu maree mariananoo.
Nári nuqu uqeeree mariasa anee mara maree qumimariananoo.
28Oo Yaawee anee kaaqa qarana qimiananoo asukuna rakeemma qisaidanoo.
29Anee qini afeeka qimianaqa qeeqa namuqaauqa naru nindaqaaqa idaqa.
Miqimmaseeqa misa afeeka faandaamura aafeeqaramaki aqufiqa naru nindaqaaqa idaqa.
30Mi Anutuna oosana fannoo andeeqanoo maridanoo.
Mina ufasaa faiqí mundimaria ufafa maridanoo.
Mifa narí mandaaqee mariasa rakira saqariara foora maridanoo, ititannimaqaidanoo.
31Yaaweefa kai Anutufa maridanoo.
Anutufa kai maasa faandaamura maridanoo.
32Mi Anutufa kai qini afeeka qimiseenoo, rakisiqimaqee marifaqa qifaaqa quqasee aana nidaqa.
33Mifa qini qiku afaidama saifaqa kaasau aandaura foora sandaidaqa.
Qinee aaqanauqakiaqa nimarunanoo mifa qini rakisi qimaqaidanoo.
34Mifa qini rakira oosana uqaqifiqasaifaqa qinee afeeka duru uqanna rakisidaqa.
35Oo Yaawee anee qini itita qimaqaseenana asumu mara quqaqisaananoo.
Ani rakisi qimaqarafa qini duqu uqeereenoo.
Ani afeeka fannoo qini ititaqimaqaseenoo asumu marirana qiminoo.
36Anee qini aana amiqimmasaanaqa sandaidaqa sia
qiku qamaki saamurunaqa namuqaa qini qumareea.
37Qinee qeeqa namuqaa sia minniseeqa nifaqaqa
fifiifaqa oonu qumarasee naruseeqa kai seeqa.
38Qinee oonu misa naru quqasaunaqa qini qikuki aqufiqa sia findifirana amanaikidaqa.
39Oo Anutu anee rakira afeeka qini qimiseenana qeeqa namuqaa rakiranaki urinaaqarara afeeka qimianaqa misa urinnaaqareeqa.
40Anee qini namuqaara qianaqa misa qini daaqu rufiasee sandeea.
Sandaafaqa akaqausa qiniara fidiaqaa imariasa naru taikeeqa.
41Misa akaqausara dadaaqiaqeera faaqaruafaqa sia dadaaqirausa maridaqa sia dadaaqia.
Misa Yaaweenara faqa dadaaqianifeera aaraafanoo sia misa innaaru qirana irinoo.
42Qinee misa radamusaunaqa misa kookoommaika mafuafanoo ufai fannoo misa fuaqa aqinoo.
Misa aatataqaraa doonara foora mariafaqa qinee misasaa qiku reeqa.
43Anee qini aanoo qimaqimaqee mariasa nisaukukinaana
asumu mara quqaqiseenana moomoo maqannaasa rakisirausaikamma qisaananoo.
Miqimma saanaqa qinee sia irunna fasiqa aanaaseesa qini qimeemaanai maridaqa.
44Anaamuru qini qikuki niqoori saunu araidaqa
Misa qini ufa irisee qini ufamau fidaqa.
45Misa afeeka taikafifaqa nariqa afeeka faandaamura minniseeqa naindiri raifaqa qinee unannai anidaqa.
46Yaaweefa kaqi marifa maridanoo.
Qini ititaqimaqee marina amooqiaqa.
Qini namuqaa nisaukukinaana asumu mara quqee mari Anutuna uriqararanara kooroo iaqa.
47Mifa qini namuqaauqa urinnaaqarara afeeka qiminoo.
Mifa moomoo maqannaasa qini qimeemaanai mara quqeenoo.
48Miqimmaseenoo qini namuqaa nisaukukinaana asumu mara quqaqiseenoo.
Oo Yaawee, anee qini namuqaa urinnaaqarara afeeka qimiseenana faiqí kuqa narimariasasaa ititaqisaananoo.
49Miqiannanara qinee moomoo maqannaasa qambaanaindari ani amooqidaqa.
Qinee ani amooqira idi raidaqa.
50Anee qini Dafidisa utaaqama qaanausa aneenna sia taikaaninna amuqusirana qinisaa faqa naaru
naaru qinisaa ani aruakinausasaa faqa quqaananoo.
Minara Anutufa rakira afeeka qini Dafidisasaa quqeenoo.
Currently Selected:
Idi Ufa 18: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
