Idi Ufa 132
132
Anutuna amaana maqara amooqia.
1Oo Yaawee anee sia Dafidinara qaunua.
Mifa oosana oosana aupurarana maroonara faqa sia qaunua.
2Oo Yaawee Dafidifa qima afeekaikunara iria.
Mifa ani afeeka faqaa Anutuna Yakooboona Anutuna faqa qima afeekaikunara iria.
3Qinee sia qeeqa faiqara maaqai fuanaura.
4Qinee sia idooeeqa faiqeeqa ianauranoo.
5Qinee afeeka faqaa Anutuna Yakooboona Anutuna maqusa deedaqammaseeqa inaaqianna faiqaanaura.
6Maasa Beeteereeqeemma maqusaki maridaqa moodaanaki kira bookisara irisee Yeearimma afaasasaa paqurimmasee qafaqiafana.
7Maasa maaqi qiafana. Anifaqa maasa Yaaweena amaana maqai oonuree mina ufa irira qaari oorinni oonuree amooqiaqa.
8Oo Yaawee moodaanaki kira bookisa namu faqa mara maree aneenna naauqara uiqaana maaqaki ania.
Mi moodaanaki kira bookisafa ani afeekara kooroo imarina faqa maree aniree maaqoo naaruara maria.
9Ani aanaiqikirausa aiqama kari andeeqara ainaina kai auqaaqanani.
Ani faiqí anaasee faaqa fuisee qidaqa asasiaqanani.
10Oo Yaawee aneenna ainainira faiqi Dafidinara qima afeekaikinau.
Sia aneenna utaaqamaqaanna karaambaiqana minni aisaa.
11Anee oori kandamasee Dafidinara qima afeekaikinau.
Sia kaifaa mi qima afeekaikirana rukaanauranoo fee qimasee qima afeekaikamasee maaqi qinau.
Qinee ani faiqi namukinaana moo karaambaiqaika masaananoo anee kuqu finanoo mifa Isaraee maqannaasasaa rakisiannoo.
12Ani faiqi namu qini moodaanaki kira ufamau andeeqasee fiqa qini naamuaqira ufa nimunnana mau andeeqasee fifanoo misa faiqi namu faqa anee kuqinaqa ani amaaqa maqasee karaambaiqa marifaranoo.
13Yaaweefa narí faiqara maaqaikianifeera Sioona maqusa utaaqanau.
14Maaqoo qinee naaruara maridaqa rakisinnimaqaanaura.
15Qinee Sioona maqusanaasa nidi mari ainainausa aiqama nimianaura.
Mi maqusanakinaasa kudi mariasa naranannoo amiqimma nimaqaanaura.
16Qinee mi maqusanakina aanaiqikirausa mariasa auqainna aiqama ainainna amiqi amiqimma nisaanaqa minakinaa fasiqa anaasee asasira idi raidaqa faaqa fuisee qifaranoo.
17Mi maqusanaki qinee Dafidina akeeku akaakukinaana afeeka karaambaiqaika masaanaura.
Mi maqusanaki qinee qeeqa utaaqamaqaunna karaambaiqana rakisinnimaqarana afeedamma aisaanaura.
18Qinee mi karaambaiqana namuqaauqa nisauriranannoo rafaaqafu nisaanauranoo.
Mina rakisinnimaqaranaki mariasa amiqiranaki marifanoo aiqama ainaina irairaa iannoo.
Currently Selected:
Idi Ufa 132: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
