Idi Ufa 116
116
Kuqiranakinaana mara asumu quqasoofa Anutuna amooqinau.
1Yaaweefa qini innaaru qirana iri marinara qinee minara ridaqa.
2Mifa qini ufa aaqoo rammatinimmasee irimarinara qinee kaqi marunna kamu minara innaaru qianaura.
3Kuqirafa qini fiqu fiqumma datinoo marinau.
Kuqiranara rufiarafa qini qumara kuqiranaki quqararinau.
Qini rufiarafa faqa qinunurirafa faqa qumbiqanoo marinau.
4Qinee miqiqa maridaqa Yaaweena qeeqa qimuqusiranakiqari maaqi qimasee innaarukiqari qimamiqiafana.
Oo Yaawee anee qini asumu mara quqaannee qidaqa.
5Yaaweefa mifa nifauara oosana faqaafa faqa andeeqara oosana faqaafa faqa maridanoo.
Maasa Anutufa faiqí faiqiara amuqusirafa qumbiqanoo marifa maridanoo.
6Soodaa qirausa siaisa Yaaweefa ititannimaqaidanoo.
Qinee kuquaqaa ira ummaaraki marunanoo Yaaweefa qini mareeqee amiqiraqoo quqaqiseenoo.
7Yaaweefa qini amiqimma qimaqainara qini qimuqusa anee kafaa paasoosida afaaqa quqasee maria.
8Yaaweefa qini kuqiranakinaana kaqinni mara quqaqiseenoo qini daukunu aadanusu qimaqaseenoo qini rafaaqafu qimaqarariana ititaqimaqeenoo.
9Miqimmasainara qini aiqama marirafa maa maqanasaaqaraasaki mariasa faqa maridaqa Yaaweena afusaa kai maridaqa.
10Qinee qeeqara namuqaa kaaqa qini radamuseeaafoo qimasee kaqi kai Yaaweena saqarikidaqa.
11Qinee qeeqa rufiaranakiqari maridaqa maaqi qiqa.
Sia faiqí faiqi moo saqariki mariafa maridanoo.
12Yaaweefa qini amiqimma qimaqaina akiiqara nana ainainee amianauree.
13Yaaweefa qini asumu marainara dufi dufi qimamaqara wainna nammari tatufiranara foora amianaura.
14Mina faiqí anaasee suqirana qambaana qinee amiraree qimasee qima afeekai kammaqaafannana amianaura.
15Yaaweena ufamau fimariasa kuquafanoo Yaaweefa firaaqoo aiaaeeqidanoo.
16Oo Yaawee qinee ani ainainira faiqi maridaqa.
Qinee qini qinoofa undee kai iqa ani ainainira faiqi maridaqa.
Anee qini kuqiranaki quqaqoona mara qisoonafa mariananoo.
17Qinee dufi dufi qirana faqa qeeqa innaaru qirana faqa aandau tatufiranara foora amianaura.
18-19Ani faiqí anaasee nifusaa ani naaquqara maaqa maqusasaa Yeerusaree maqusa qambaanai Yaaweena amirara qima afeekaikiafanna ainaina amianaura.
Yaaweena amooqiaqa.
Currently Selected:
Idi Ufa 116: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
