Aaquqira Ufa 9
9
1Irirafa narí maaqa atuna qisauku dinni taikasee dinni ani qaara marasee 7 pausasaa usakaseenoo.
2Irirafa narí aandau arusee suqeenoo. Narana faqa uainna nammari faqa deedaqamma narana neemaria qaindanasaa oomaqa saka quqanau.
3Mifa narí ainainira maanaaqauqa niqiqoofaqa maqusasaa aaqanaikiraqoo ooruree nammeera qiaqeera niqiqoofaqa fiqau.
4Innee ooruree maaqi qimasee nammeera qiaqa. Innee irirana siaisa mai aniree qoomaqa naaqee qiaqa. Furufarirausara maaqi qimasee nammeera qiaqa.
5Mai aniree qini narana nammari naaqee qiaqa.
6Inneeqa furufarirana minnisee kisaaqusaa mari faranoo. Amiqira iriranamau fuaqa.
7Anee náriara maasa amiqirausee qimaria fasiqausa qaoo qinaqa misa ani namuqaaka mifaranoo. Nariara andeeqarausee qimariasa aaqaranara qaoo qinaqa misa ani arifaranoo.
8Anee ufa rukiee maria fasiqausara qaoo qinaqa misa aniara fidiaqaa mifaranoo. Anee irirana faqaa fasiqa andeeqa amaqainanoo ani ufara eedoo qimasee ani ameemaanai keeqaannoo.
9Nana ainainaree irirana faqaana qimaminanoo mifa misa kaaqa firaaqoo irirana faqaasaikamma nimaqaannoo. Andeeqara fasiqauqa qimanniminaqa misa moo faqa moo faqa irirana mareefaranoo.
10Yaaweenara rufieenana irirana faqaafa mariannaranoo. Anutuna naaquqara ainainara irinanoo mifa ufa irirana oosana amiannoo.
11Amiqira irirafa faiqí marirana maa maqanasaa kisaaqa kamu rarisama nimaqaidanoo.
12Anee irirana faqaafa marinanoo mi irirafa ani moomoo amiqirana amiannoo. Anee mi irirana minnisainanoo aupurarafa aniki mariannoo.
13Furufarirafa asaurirana siai anaaseefara foora maridanoo. Firaaqoo faaqa quqasee ufa qimari anaaseefara foora maridanoo.
14Miqira anaasee fannoo narí maaqa kooqi afaisaa ooqumarifinoo aiqama maqusa mirinni urinnaaqaramafa maridanoo.
15Akaqausa nári qimaqaannai nári ainainai aiqaree fimariasa misa naarama narí maaqaki quqaidanoo.
16Mi aanaaseefa maaqi qimasee furufarirausa qimannimidanoo. Irirana siaisa doo mai aniaqee qidanoo. Furufarirausara maaqi qidanoo.
17Ummuarira nammari adiafaa irafa maridanoo. Ummuarira feemu narafa adiafaa midanoo.
18Mi anaaseefinnai fimariasa kuqimarianara furufarira fasiqa fannoo sia iridanoo. Mi anaaseena maaqaki keeqoosa maqee kuqira maqa maaqaki maridaqa.
Currently Selected:
Aaquqira Ufa 9: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
