Oosana 34
34
Seekeemmafa Dinnaa nammarina mandaikamma amaqanau.
1Moo kari Dinnaa nammarifa Yakooboosa Reeaa nammarisa niraamuna fannoo Dinnaa nammarifa Kannaa maqannaa aanaaseeuqa nindafaanee qimaseenoo finau. 2Seekeemmafa Amoorana amaaku Qifina aiku asaukukinaafa mi maqa maaqanakinaasa uriqararafa Dinnaa nammarina aanai paqurimaseenoo rarisanau. 3Mifa qafoofanoo Dinnaa nammarifa kaaqa amiqirafa marufanoo amuqusa mandaikufanoo amiqira ufannoo mi manaaqana amuqusa reendeenianee qimasee amiqira ufauqa qinau. 4Seekeemmafa narí akoona Qamoorana qimaminau. Anee maa manaaqana feefaurumma qiminaqa qinaaqara maraa.
5Yakooboofa narí araamuna Dinnaa nammarina rarisoonara iriseenoo kasoo inoo marinau. Narí faiqi namu narí aandausaa rakisi marusa nianai marufanoo nifeesi marinau.
6Seekeemmana akoofa Ammoorafa Yakooboona faqa ufa qirara finau. 7Oonuroofaqa kai Yakooboona faiqi namu aandausaa rakisiusa aniraqau. Misa Dinnaa nammarina rarisoonara irufanoo sia faiqí auqaaqaa ira ainaina marufaqa kaaqa niranaqeenoo nifai sandurinau. Seekeemmafa Yakooboona araamuna rarisoonannoo Isaraee maqannaasa nuqu mara maree quminau.
8Qamoorafa maaqi qimasee Yakooboona qimaminau. Qini qimaaku Seekeemmana irirafa ani araamunara firaaqoo aqufifaqa ani qimamidaqa. Amanee mina maraannoo fee. 9Sainaqa maasa moodaanaki kira ufa qimasaanaqa kaqi ani maqannaa faqa qini maqannaa faqa kaqi narí maree narí maree iaqa. 10Miqi mandaanaqa innee maa maqanasaa maridaqa kaqi dapi maa maqa maaqanaki oonuree aniree idaqa maqa akausa mariaqa. 11Seekeemmafa Dinnaa nammarina akoona faqa asooqmaaka faqa qimanniminoo qinau. Innee qini didi marindee masaifaqa inni nidi mari ainaina nimianaura. 12Inni nidi mari ainainnara qimaqimifaqa nimianaura. Firaa feefauruara qifaqa nimianaura. Innee qiniara mina maraannee qimasee innee iraifandinna ainainna kai nimianaura.
13Miqi qimasoofaqa Yakooboona faiqi namu nári nisookina rarisoonara iriseeqa akaru qira ufa Seekeemmana faqa mina akoona Amoorana faqa qimannimiqau. 14Maaqi qimasee qimamiqau. Maasa sia amana qeeqa dauna nifaaqa ati sia aukirausa nimianaura. Miqiqa maasa firaaqoo qisauruanoora. 15Innee maasa daanna reeqa inneeqa faiqi namu nifaaqa ati aukusaifaqa minara kai maasa eedoo qianauranoo. 16Miqimmasaifaqa maasa inniara eedoo qimasee inni faqa narí maree narí maree ifaranoo. Maasa inni qambaana maridaqa inni faqa moodaa maqannaa marianauranoo. 17Innee sia mi ufanara eedoo qimasee nifaaqa ati ateekaifaqa maasa qeeqa dauna afiqamaree doo fuanaura.
18Mi ufausara Qamoorafa faqa mina amaaku Seekeemmafa faqa iriseeqa amanee qiqau. 19Seekeemmafa kai kaqi uqanna inoo misa qimamundee inau. Mifa Yakooboona araamunara aidi marunara miqinau. Seekeemmafa narí aiku asaukukiqari kaaqa uriqararafa marinau. 20Amoorafa narí amaaku Seekeemmasandiri ufa suqimaru maqusanasaa faandaaura kooqiki oonuree nári maqusanaki marusa maaqi qimasee qimanniminau. 21Maa fasiqausa aqoondiuqa maridaqa. Saifaqa maa maqanasaa maridaqa mana mana iqa nuaqa. Maa maqafa firaafa maridanoo. Misa faqa amana marifaranoo. Maasa misa niraamuqmaaka maraanaqa misa faqa maasaindi mareefaranoo. 22Maa fasiqausa maasa qambaana marirara eedoo qidaqa moodaa mariranaki mariranara eedoo qidaqa. Maasa misa naanna reeqa qeeqa faiqi namu akoonaiqiuqa nifaaqa ati ateekaaqeera qidaqa. 23Maasa miqianaqa misaki sipsipa burimakau aina marifa maasaindi kammiannoo. Anifaqa eedoo qianaqa maasa qambaana mariaqa.
24Aiqama mi maqusanakinaasa Qamoorana faqa Seekeemmana faqa ufa iriseeqa eedoo qimasee aiqama akoonaiqi qisakoosa nifaaqa ati auku aqiqau.
25Qaarammoo faasaana aiqaroofaqa nifaaqa ati aukuqoosa firaaqoo nammuana nidafi marufaqa Yakooboona amaaku qara Simeeoonafa faqa Reefifa faqa miqanda Dinnaa nammarina asooki qanda nári faaqaana qara mara maree umee kai Seekeemma maqusai ooru reeqara aiqama faiqí kumaaraa naru taikaqau. 26Qamoorana faqa Seekeemmana faqa narusee Dinnaa nammarina Seekeemmana maaqakinaana afiqamaree doo quqasee fiqau. 27Narusoofaqa Yakooboona faiqi namu akaqausa inaaqianna oonu reeqa nári nisookina rarisoona akiiqara mi maqusanakina aiqama ainaina maraqau. 28Misa sipsipauqa faqa burimmakauqa faqa doonkiuqa faqa aiqama ainaina mi maqusanaki maruna faqa mi maqusana atiqara maru ainainausa aiqama maraqau. 29Misa aiqama amiqira ainaina kai maraqau. Aiqama faiqi anaasee faqa maraqau. Aiqama maaqakinaa ainainauqa faqa maree fiqau.
30Yakooboofa miqunara irinoo Simeeoonna faqa Reefina faqa maaqi qimasee qimanniminau. Inneeqara qini ummaaraki quqaqisaafanoo. Kannaa maqannaasa faqa Peerisaa maqannaasa faqa aiqama maa maqa maaqanaki mariasa qiniara fidiaqaammifaranoo. Qini faiqí sia moomoo mariafaqa, misa aiqama moodaanaki aniree qini dariqa aiqama maasa faiqi anaasee kuridi nimaqeefaranoo. 31Yakooboofa miqi qufaqa miqanda narí qimamiqa qiqau. Maasa sia qeeqa qisookina quqaqaanaqa aanasaa aanaaseera foora kaqi maraqa nifaranoo.
Currently Selected:
Oosana 34: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.