Rafudoo Akarafa 36
36
1Mooseefa Isaraee maqannaasa qima nimidanoo qinau. Beesareerana faqa Ooqooriabana faqa miqanda dadaaqi marusa oosana oosana ainaina auqirana akoofasaikira irirana Yaaweefa nimiqoosa aiqama ainaina Yaaweefa naamua qundee kai masee naaquqara uiqaana maqa auqaaqa.
Faiqí anaasee moomoo ainaina maree aniqau.
2Miqi qimaseenoo Mooseefa Beesareerana faqa Ooqooriabana faqa Yaaweefa aiqama ainaina auqira irirana akoofasaikirana nimimaru fasiqausa faqa naarama quqaseenoo qimanniminau. Doo innee oosana arasee auqaaqa. 3Isaraee maqannaasa Yaaweena amideequu ainainausa mini soo fanoo Mooseefa mi ainainira fasiqausa nimufaqa auqimariqau. Faiqí anaasee eedoo qimasaida aiqama kananaana Anutuna amidee quu ainainausa kaqikai maraidaqa Mooseefunnai munu quqee mariqau. 4Naaquqara maqa usakee marusa moomoo ainaina qafamasee nariqa ainainirana minnisee Moosee finnai oonuree qimamiqa qiqau. 5Faiqí anaasee moomoo ainaina aabaa faqa maree anidammia. Yaaweefa maasara auqaaqee qimaqaina amana minisee aabaa faqa minisaafannoo kaqi fifau mariannoo.
6Mooseefa mina iriseenoo ufa quqasoofaqa aiqamausa qimannimiqa qiqau. Faiqí anaasee sia moo fannoo kafaa moo ainaina naaquqara uiqaana maqa usakaaqeera maree aniaqa. Miqi qimasee qimanimufaqa faiqí anaasee mina iriseeqa sia kafaa maree aniqau. 7Indaaru mini qoo ainainausa aiqama ainaina taikarana amana faqa fiqaramasee aabaa faqa maree aniqau.
Misa Anutuna uiqaana maqa usakaqau.
(Raf 26:1-37)
8Irirana kaaqa fiqararausa kai indaaruqaa qamunna uiqaana maqasaa akirana auqiqau. Sipsipa asausi dirindaasi akirana faqa pannoona akirana faqa faeena akirana faqa sufusee amiqira qamunna auqusee aqoosa faqaa aandau amana auqusee minasaa atooqasee akuniqau. Miqimmaseeqa minauqannai qisaukuqara taikasee 10 firaa qamunna auqusee moodaanaki akuniqau. 9Mi aiqama qamunnausa amana amana kai 12 metres kisaaqa mina qusa 2 metres mariani. 10Mi qamunnausa moodaannai qisauku 5 marasee ootupamasee akuniqau. Dinni qisauku taikasee 5 faqa miqikai iqau. 11Miqimmaseeqa mi qamunna qanda atiqara dirindaasi arira qamunnannai anaanu auqusee moodaanaki ootupaqau. 12Firaa qamunna ati mau anaanu 50 auqiqau. Moo qamunna faqa miqi kai iqa moo qamunna saa qaraa anaanu amummaqa kai auqiqau. 13Koora qumaree turimmandee qusa tafara foora saaeemma qumaree dinni dinni anaanuki upeekasoofanoo mi qamunna qanda moodaaraa maqi inoo marinau.
14Uiqaana maqasaa akira qamunna firaana mimmi asausinnai 11 auqiqau. 15Misa aiqama moodaa karirana kai auqiqau. Mina kisaaqa 13 metres amana marianoo mina qusa fannoo 2 metres amana marinau. 16Mi qamunnausa moodaannai qisauku taikasee 5 qamunna akunusoofanoo moodaa qamunnaika mafinau. Kafaa moodaannai qisauku taikasee dinni ani moodaa marasee 6 narisaa narisaa akunusoofanoo firaanaikinau. 17Qamunna atimau anaanu 50 akuniqau. Moo atimau faqa mina amummaqa kai akuniqau. 18Booroosannai tafara foora ati saaeemmasee 50 auqusee minannoo dinni dinni anaanuki aususee ootupamasoofanoo moodaa qamunnara foora marinau. 19Kafaa misa uiqaana maqa akuamaqara qamunna sipsipa akoona apata faeena akiranannai moo auqiqau. Inaaqianna amuaaqa akirana ooruku nammarikinaa aandau apatannai auqirafa marinau.
20Misa akasia saqarinnai kai naaquqara uiqaana maqa atuna auqusee kuradaqau. 21Maaqi mandee maaqa atuna auqiqau. Saqari dinni dinni kuradarafa 4 metres marinau. Mina ausana qusa 66 centimetres amana kai auniriqau. 22Aiqama atuna maqaki rakiqaranara irisee ati ooqiqaramasee ateekaqau. Aiqama maaqa atuna miqi kaimasee ateekaqau. 23Misa suani afu ataaqeenni south kisaaqandanai maaqa atuna 20 narisaa narisaa apamandee kuradaqau. 24Maaqa atuna oosana sia maqaki kaqi rakiaqau. Siruaannai amaaqa auqusee minaki kuradaqau. 25Misa uiqaana maqa suani dinni ataaqeenni north kisaaqandanai maaqa atuna 20 narisaa narisaa apamandee kuradaqau. 26Maaqa atuna sia maqaki kaqi rakiaqau. Siruaannai 40 amaaqa auqusee minaki maaqa atuna kuradaqau. 27Suani keeqeemari qaannai west uiqaana maqa uruanatinai maaqa atuna dinni qisauku taikasee dinni ani moodaa marasee 6 narisaa narisaa apamandee auqiqau. 28Maaqa dinni dinni munu raqaranaki kafaa qaaraqanda auqusee kuradaaqa. 29Raudaranaki maaqa atuna oosanaki apammasee kuradama soofanoo amiqimasee narisaa narisaa apinoo marinau. Maaqa atuna rakiqarana oosanaki rumba atukarasee miqi kai mamaree mirinni murufi saqau. Dinni dinni munu raqaranaki miqi kaimmiqau. 30Miqimmaseeqa maaqa atuna 8 oosanaki siruaannai qaaraqanda qaaraqanda amaaqa auqusoofanoo 16 marinau.
31-32Misa aunirifandinnana akasia saqari 15 maraqau. Uiqaana maqa dinni dinni ataaqee faqa uruanai faqa faifa faifannoo aunirumasoofanoo maaqa atukarama qumaranau. 33Mi maaqa atunna aunirira saqari fannoo maaqa amana kai dinni dinni ati marinau. 34Maaqa atuna aiqama koorannai kai rafaaqa fiqau. Maaqa atunamau aiqama koorannai kai anaanu mamaree fiqau. Aunirifandinna saqarisa faqa koorannoo mi anaanusaki rafaaqa fiqau.
35Misa sipsipa asausi dirindaasi akirana faqa pannoona akirana faqa faeena akirana faqa sufusee minannai amiqira qamunna auqiqau. Miqimmasee mi qamunnanasaa angiroo niqoosa faqaasa nimana auqiqau. 36Mi qamunnana dirianee qimasee qaara faqa qaara faqa 4 atuna akasia saqari ateekasee koorannai rafaaqafusee kuradaqau. Mina atimau koorannai qamunna dirifandinna anaanusa auqiqau. Mi saqarisa oosanaki siruannai amaaqa auqusee minakiaqa kuradaqau. 37Uiqaana maqa kooqiki ititeefandinna qamunnana sipsipa asausi dirindaasi akirana faqa pannoona akirana faqa faeena akiranannai faqa marasee kooqiki dirifandinna amiqira qamunna auqiqau. Oosana oosana sandannai mooka maakira ainainauqa mi qamunnanasaa auqiqau. 38Mi qamunnana dirifandinnana moodaannai qisauku 5 akasia saqari marasee koorannai mina atimau rafaaqafusee qamunna dirifandinnana anaanu auqusee quqaqau. Mi atunnana qumaraanifeera koorannai saqari kukuqamasee atimau auniriqau. Miqimmasee booroosannai moodaannai qisauku 5 atuna oosana amaaqa auqusee minaki kuradaqau.
Currently Selected:
Rafudoo Akarafa 36: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
