Eefeesusa 2
2
Ooqai kuqiranaki ubeekoofaqa maqee asumu mariranaki ubeekaqa maridaqa.
1-2Qinee Pauroosa sia Yuda maqannaara qidaqa innee aanaamuru mariasara qidaqa, ooqai inniqa ufa rukiarana faqa aaqarana faqa miqiunna akiaqara kuqiranaki mariusa mariqau, mi aukuanna maa maqa maaqana mandoosanamau kai fimariqau. Anutuna ufa rukiee mariasa maqee rakisi mari afaannafa Anutuna innaaruna meerai marifanoo mina ameemaanai marina, mina ufara eedoo kai qimarusa mariqau. 3Maasa faqa aiqamausa aanaamuru Anutuna ufa rukiee mariasa naanna ramasee maasa qeeqa faiqí faiqi mandiriranamau fidaqa qeeqa qifaaqa irirana afaariqa kaqi qeeqa manda didiramau kai fiqiafana. Maasa Yuda maqannaasa aanaamuru naanna ramasee qeeqa qifaaqa afaaramasee mina akiaqara Anutuna aranaqaranaki firaridaqa.
4-5Anutufa mina qafamaseenoo maasara amuqusirana faqa nifauarafa faqa firaatia marifanoo asauku mundirana saimbaqa maasa faqa kuqiranakinaana uqeera qiseenoo sia moo ainaina, Anutuna afaarirafa kai innaaruna asumu mariranaki quqanniseenoo. 6Anutufa maasa asauku mundirana Yisunasaa atooarana qafamaseenoo mina namufaqa kuqiranakinaana uqeeraqiseenoo Yisuna namufaqa Anutuna innaaruna mariasasaa rakisi nimaqaaqee qifaqa miqoo rakisirausaikiqa marianaura. 7Sia Anutufa fifau miqinau, narí firaa afaarirana faqa, maasa asauku mundirana Yisunaki keeqarana qafamaseenoo narí firaa aidirana amuqusirana faqa naaru kambiqainausa uqannifiqarara miqinau. 8Sia moo ainainannai Anutufa narí afaariranannai kai inni innaarunai asumu mariranaki quqannisaidanoo, innee Yisuna saqarikiranannai afaaramma nimaqaidanoo. Inni asumu nimirafa sia innee andeeqasee fimarianasaafau mundidanoofau, sia innee amiqira oosana marasaida kadaapiridee qimarianasaafau mundidanoofau, Anutuna kaqi nimiranasaa kai innaarunai asumu marirana maasa qimirana uqeereenoo.
9Sia maasa qeeqa kadaapiriranannai innaaruna asumu maraanaura minara sia fifau maasa qeeqa qimooqira ufa mariannoo. 10Anutufa maasa auqufa maridanoo sia fifau maasa auqinau, maasa asauku mundirana Yisunasaa atooqaranasaaqari andeeqasee nirana marirana mariaqee qimasee maasa auqinau. Doo ooqai mi andeeqara nirana marirana maasara deedaqammaqoofa maridanoo.
Yuda maqannaasa faqa aanaamuru faqa asauku mundiranaki moodaanaki maridaqa.
11Yuda maqannaasa ooqaindari naríara kai Yuda maqannaasa fainanduqirausa Anutunaindi maridee qimasaida inni aanaamuruara sia maasa fainanduqirausa marunnanara aqoosai mariasa maridee qimariqau. Misa fifau nári fainanduqiranara qidaqa miqi qimariqau. Innee aanaamuru mariasa innee ooqai mariunara iriaqa. 12Innee Eefeesusa maqusanaasa asauku mundiranasaaqari naaduma nianasaa mariusa mariafanoo, innee aanaamuru Anutufa maqasaaqaraasaki sia rusandeesamumandee nariara maroosa mariafanoo, aanaamuru nianasaa mariusa mariafanoo. Anutufa Yuda maqannaasa faqa moodaanakikira ufa oosana oosana qima afeekaikiranasaa mundiqa mariusa mariafaqa innee aanaamuru sia minaki marusa naaduma nianasaa marusa mariafanoo. Innee Eefeesusa maqusanaasa maa maqa maaqanaki maridaqa sia Anutunara faqa moo ainainara faqa irimariqau kaqi furufara kaimmiqaniqau, Anutuna siaisa mariqau.
13Doo maqee innee asauku mundirana Yisunasaa atooqaana akiaqara inni ooqaindari nianai mariusa maqee Anutufa inni rarisameeqeenoo adeedi quqeenoo, asauku mundirafa aunirira saqarisaa kuqunannai kai miqinoo. 14Anaamuru faqa Yuda maqannaasa faqa namuqaara foora niana niana rakee iqa mariaasa asauku mundirafa narí kai mareeqee moodaanaki quqaseenoo asooarana maasa qiminau. Yuda maqannaasa faqa aanaamuru faqa namuqaakiqa marufanoo qambaana faandamura ititanoo maruna asauku mundirafa narí afaaqannai faandaamura rakee mandoofaqa moodaanaki kiqau. 15Mooseena sandufakina oosanoosana ainainara nimaarusirana mifa faandaamurara foora Yuda maqannaasa faqa aanaamuru faqa aiqamaqara rakeemaqoofaqa mariqau. Asauku mundirafa doo mina ruka taikasoofaqa mi atiqanda oonu maree ani maree asauku mundirana faqa moodaanaki kiqa asooaranaki maridaqa.
16Asauku mundirafa narí aunirira saqarisaa kuqunannai Yuda maqannaa faqa aanaamuru faqa nariara nariara fidiaqaa imaruna aru taikanau, narí aunirira saqarisaa kuqunannai Yuda maqannaa faqa aanaamuru faqa rakimaruna taikaseenoo Yisufa mareeqeenoo mafi moodaanaki quqaseenoo mareeqeenoo Anutuna aanooqirana taikaseenoo narí akoona Anutunaki asooaranaki quqanau. 17Miqi marunara asauku mundirafa narí amiqira asooara fasaasa ufa maree qumureenoo innee Anutunasaaqari nianai maria anaamurusa faqa Yuda maqannaa Anutuna aaqa mariasa faqa qimanniminau. 18Maasa aiqamaqara Yuda maqannaa faqa aanaamuru faqa asauku mundiranannai kai amana maasa moodaa maraqunaki anireeqa maasa qikoona Anutuna afusaa kikiqianaura.
19Ooqai innee moo maqannaara foora aanaamuruara foora mariasa mariafanoo doo maqee sia miqiqa mariafanoo innee doo maqee Anutuna aiku asauku mariasa Yuda maqannaasaki moodaa maqannaa kammambi innee mariafanoo. 20Doo maqee sia Yuda maqannaa kai, innee faqa maaqara foora usakafifanoo asauku mundirafa Yisufa narí uqanna faakana miqirafa marinanoo Yisufa niqiqoo fasiqausa faqa Anutuna tamummaqara fasiqauqa faqa maaqa atunara foora marifanoo innee faqa maaqa asaanara foora misasaa faqa Yisunasaa faqa atukaramambiqa mariafanoo. 21Yisufa uqanna faakanara foora maridanoo aiqama maaqa asaana afapita qumarasaifaqa afeekaikiqa mariafanoo karaambaiqa naaquqara amaana maqara foora usakaidanoo fimaree aimaree innooqaidanoo. 22Innee aanaamuru asauku mundirana saqariki mariasa faqa aiqamausa Yisunaki mariasa faqa Anutufa inni qumareeqeenoo maaqara foora usakaseenoo narí maraqunannai mi maqanaki inniki mari maqafa maridanoo.
Currently Selected:
Eefeesusa 2: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.