1 Peetooroo 5
5
Yisuna ufara suqimariasasaa rakisirausa misa oosanara qimaqoo ufafa.
1Minara inni amaana maqasaa rakisimariasa qimannimidaqa. Qinee Peetooroosa amaana maqasaa rakisimarunausa maridaqa inni qimannimidaqa. Qinee asauku mundirana aupurarana qeeqa qifunnai qafaafanausa maridaqa, kasooqaqee innaarunaindaraa kaaqa qarafa akooroo inaqa qinee faqa akaqana marararee qidaqa inni qimannimidaqa. 2Innee amaana maqasaa rakisirausa faqa amiqira asumu aandau rakisidara foora mariaqa Anutufa innee faiqí aanaaseera asumu aandaura foora rakisiaqee qidanoo. Sia nikoo nikaamasee rakisinnimaqaaqa Anutuna iriranamau kai asasammasee rakisinnimaqaaqa. Sia feefauruara kai irisee mi rakisira saikana maraaqa naundurakinaana dadaaqianee qimasee maraaqa.
3Innee amaana maqasaa rakisimaria fasiqausa sia inneeqara uriqararausee qimasee fuki faaki qiaqa, innee fidaqa quandafi ireeda kai faiqí anaasee nifiqee andeeqaramau kai fuaqa. 4Innee miqimasee faiqí anaasee rakisifanoo aandaura foora rakisirafa firaafa Yisufa innaarunaindari akooroomafinoo kaaqa areenara qafee inni nikiqasaa quqasee nimiannoo sia areenarafa taikaaninafa naaru naaru kaqi marianinafa.
5Miqi kai iqa innee kumaaraauqa faqa inneeqa faiqí firaasa nimeemaanai miqi kai masee ureeaqa mariaqa. Innee aiqamausa oorudupi oorudupimafinaqa qamunnara foora afisusee mariaqa. Tamummaqarausa akara minara maaqi qidanoo.
Anutufa faiqí anaasee nári nuqu uqeeree mariasa rafaaqafidanoo fifimariasa adiafaairana faqa amiqirana faqa nimidanoo.
6Tamummaqara fasiqa ufa miqinoo marinara innee minara irisee Anutuna afeeka asauku ameemaanai ureeaqa marifanoo narí aukuana qumureenoo inni uqeera uriqararanaki quqannisaannoo. 7Mifa Anutufa inniara amuqusimarifanoo rakisidanoo. Minara inniqa aiqama ainainara naundurakinaa ummaara rufiarana nimukee marina naindiri ree mariana minauqa moodaanaki uqeereeqee Yisuna minasaa kai aqusaifanoo dadaaqiannoo.
8Innee inneeqa nimanara irisee aufarida mariaqa inni namuqaa Sadannafa kaasau fainiara foora fiqu faiqu idanoo yanee nambiqaanau yanee nambiqaanau qidanoo. 9Aiqama maqa maaqaki inni niqoonausa Yisuna ufa irimariasa moodaa karammida aupuree mariafanoo. Minara irisee innee inneeqa Yisuna saqarikamma mapukusee maridaqa Sadannafa aninaqa ititaidaqa mariaqa. 10Innee maaqoo maqasaa maridaqa kaqikaaqoo nidafirafa mariannoo. Marifanoo kaqi afaarirana akoofa Anutufa inni naaraidanoo narí naaru naaru kaaqa areenarana asauku mundirana namufaqa narí namufaqa inni nimiannoo. Innee maaqoo marifanoo mifa kai inni anoonaikama nimaqaannoo mifa kai naunduraki mapukirana nimiseenoo afeeka faqa afeeka maaqa atuna fooqaana nimiannoo. 11Aiqama afeeka rakisinnimaqarafa naaru naaru minaindi mariannoo. Kuqaa.
Atisaa nimandoo ufafa.
12Qini amiqira qikaqafasaa Sirafanusafa dadaaqifaqa maa kaqikaa akarana rumannimaqeeqa. Innee Yisuna ufaki mariafaqa qinee qimannimidaqa nifeeqaraidaqa, innee minaki maridaqa kuqaa Anutuna afaariranaki mariafanoo. Innee minaki mapukufi kikiqiaqa.
13Yisuna ufa irimariasa Babiroonia maqusa mariasa faqa maridaqa Anutufa misa faqa rusandeesamumasee maroosa maa papiqanaki inni nimandaidaqa. Qini qimaaku Marikoofa mifa faqa inni nimandaidanoo. 14Innee Yisuna ufa irimariasa imariandee narí amooqee narí amooqee iaqa.
Innee asauku mundirana araamuqmaaka faiqinamu inni naundurai asooarafa mariani.
Currently Selected:
1 Peetooroo 5: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.