Filp 1
1
‑Ayopalɩɛ
1‑Amʋ Pɔlʋ ɩya Timoti, ‑a ‑glɩ Zozi Klisi 'la lobhocuo. ‑Anyɩ ‑ɔ zie 'lɛ anyɩa ‑tɛtɛa, Zozi Klisi nɩkplaan, ‑ɔ 'plɩ 'lɛ ‑kplɔkplɔnya 'nyɩ ‑ɔ ‑kʋ 'lɛ Filipʋdua 'kʋ na, aya ala 'kʋklʋʋnpʋnyaa ɩya mala klalɩnyaa. 2'Naa ‑a To Laagɔ ɩya ‑ala ‑Kwlenyɔ Zozi Klisi 'la ‑wawʋa ɩya mala pupue kʋ anyɩ 'kʋ.
Pɔlʋ bhɔlʋ Laagɔ
3N ‑ka ‑azla ala wɔlɩ gugu na, n bhɔlʋ 'na Laagɔ: 4Clɩɩa 'fɩan, n ‑ka ‑azla anyɩa ‑tɛtɛa 'la da bhibhieda ‑kʋ na, pɔlɛmɛnɔ nɩkplaan n bhibhieli 'lɛ, 5‑ofi lebhe ‑bɛka clɩɩa 'kʋ tooto, a ‑kʋ ‑anyɩ Dɩnanɩa* 'la ‑salɩɛ klalɩda ‑aan ‑yaka. 6Na, n ‑ka pɔɔtɛtɛ lebhe ɔmɔa ‑ɔ bhɔ 'lɛ lobholi 'nanɩ ‑naa anyɩ sidiin na, ɔ cɩ 'kɩɩ 'kʋ gɩ ‑aan ɩla 'wlukodaa, Zozi Klisi 'la ciclɩɩa 'kʋ. 7Ɩ ‑gɩlɩɔ 'ciin lebhe n kalɩ ‑sa 'la wɔɔgugwie anyɩa 'fɩan 'la gbazɔ, sa 'na pɔlɛa ‑kʋ anyɩ cɩ, anyɩa ‑tɛtɛa, daa ma 'paan 'lɛ ‑palʋʋn, ‑aana daa n 'tɩtɔlʋa 'lɛ Dɩnanɩa 'kʋ, le ɩ 'ka ncɛlɩ nɩkplaan ‑sikplii 'palɩ na, ‑ɔ klalɩɩn 'lɛ 'nanɩ ‑naa Laagɔ nʋʋn 'lɛ na nɩkplaan na. 8‑Ghɛɛ, Laagɔ 'titi ‑lio 'na ‑danʋfʋɛ lebhe n ‑wa anyɩa 'fɩan ‑wawʋa Zozi Klisi ‑wa 'lɛ anyɩ na.
9'Nyɩ n bhibhie lebhe ala ‑walʋa zʋlʋzʋlʋlʋ 'kʋ, wɔɔcibhlilie ɩya dɩgalɩ nɩkplaan. 10‑Sa a cɩ 'ka 'lɛ ɩmɩa ‑ɩ nanɩ 'lɛ lebhe ma nʋ na cibhili ɩya a 'ka ‑kplɔ ɩya Klisi 'la ciclɩɩa 'kʋ, ma 'la ka anyɩ 'ge ‑salɩ, 11sa 'kʋnylugolulɩɛa 'la 'caa Zozi Klisi golo 'lɛ anyɩ nɩkplaan, Laagɔ 'la 'klʋagba ɩya ɔla ‑evliwolɩɛa 'la gbʋ na, yanɩ tlʋ na.
Jabhʋa ʋmʋ ‑ʋ ‑glɩ 'lɛ Klisi
12Bholiecɩnyɩ, n ‑wa lebhe a cibhlili lebhe: Ɩmɩa ‑ɩ ŋeniin 'lɛ na, ɩ ya gba 'nyɩ Dɩnanɩa* ya dlolu. 13Sa goonvlaslea ɩya daa ‑tɛtɛa 'la ncɛlɩa ‑cinɩ sɛɛ lebhe Klisi 'la gbʋ ma 'paan 'lɛ ‑palʋʋn. 14'Nyɩ 'na ‑palʋʋnpalɩɛa ya bholiecɩ ‑gbɔɔn 'tɛtɩɩn zʋ ‑Kwlenyɔ nɩkplaan. Ŋanɔ 'bhla 'tanɩ maa ‑ma ma vinɩ ‑nwɔ 'nyɩ ma dlolu Laagɔ 'la Wɔɔnyɩtʋa. 15Ɩ ‑glɩ ‑nʋawlɛ lebhe ‑anʋa salɩ Dɩnanɩa woze ɩya 'tɩtʋɛ nɩkplaan, ‑ma ‑anʋa ‑ma plicili Klisi wɔɔgugwie 'nanɛ nɩkplaan. 16Maa ‑naa, ‑walʋ nɩkplaan ma nʋnʋnʋ 'lɛ sɛɛ, sa ma ‑ci lebhe Dɩnanɩa 'la 'kʋtɩtɔlʋlɩɛ 'la gbʋ ma ‑zʋɔɔn 'lɛ ‑wɔlʋ. 17‑Ma ‑da -naanʋaa, 'tɩtʋɛ nɩkplaan ma plicili 'lɛ Klisi. Mala wɔɔgugwiea 'ta ‑kplɔ. Ma gugu lebhe sɛɛ ma cɩ nʋ 'nyɩ ma cɩ 'kwlɩa ‑ɩ bhɩalɩɩn 'lɛ ‑palʋʋnpapalʋa ‑zɔn na 'kʋ zʋlʋ.
18‑Ma, 'lɩsaa ɩ nʋa 'lɛ bha? Ka ma ‑ka ‑buun -wɔɔgugwie ‑ka, ‑aana ka ma 'kɩɩ ‑nʋawlɛɛn nʋnʋo na, saa 'fɩan ɩ cɩ 'lɛ kʋkʋlʋ na, Klisi ma plici 'lɛ, 'nyɩ ɩ mɛnɩɩn pɔlɛ 'kʋ. Ɩ cɩ 'ka ka ‑azlaan pɔlɛ 'kʋ mɛma, 19sa n ‑ci lebhe ɩmɩ ‑naa cɩ 'ka 'na gbʋʋnsalɩɛ 'plɩ, ala bhibhiea ɩya Zozi Klisi 'la 'Wugoa 'la klalɩlɩɛa 'la gbʋ. 20Ɩmɩa n ‑bɛ 'lɛ 'nyɩ n 'tɛlɩ 'lɛ pɔlɛ 'kʋ na, ɩmɩ ‑ɩ ‑glɩ 'lɛ lebhe n cɩ 'ta ‑sʋkpɔɔ, 'nyɩ 'na ‑delikʋtɛlɔa cɩ 'ta 'kʋsalɩ. ‑Ma, ‑pɔtɔnʋ ɩya clɩɩa 'fɩan, ma cɩ 'ka 'na 'nyɛkɛa nɩkplaan Klisi 'la 'klʋagbaa 'lɩlɩ, 'na ‑jaajʋ ‑aana 'na 'kwɩ nɩkplaan. 21Sa, ‑amʋ 'na da, jabhʋa, ʋmʋ ‑ʋ ‑glɩ 'lɛ Klisi, 'nyɩ 'kwɩ ‑glɩ 'lɛ ‑nvʋsʋɛ. 22‑Ma, ɩ ‑ka ‑kʋ le n kʋ ka ‑laagɔzɔn ɩya n nʋ lobholia ‑ɩ tlʋ 'lɛ 'ca na, 'dɛndlana n 'tanɩ ɩmɩa n cɩ 'ka 'lɛ desla na ‑ci. 23N ‑kʋ wɔɔci ‑mɔsɔ ‑gbaaglɩɩn: N ‑wa le n cɩ mʋ 'nyɩ n ‑ya Klisi cɩ sakʋ. 'Nyɩ ‑ɩ nanɩ 'na da ‑gbɔɔn. 24‑Ma ɩ ‑fata ‑gbɔɔn le n kʋ ka ka ‑laagɔzɔan, ala gbʋ. 25Ɩla gbʋ na, n ‑ka pɔɔtɛtɛ le n cɩ ka ka ‑laagɔzɔan kʋ, n cɩ 'ka ka anyɩa 'fɩan cɩ kʋ, ala pɔɔtɛtɛa 'la 'kʋklʋʋnmʋlɩɛ ɩya ala pɔlɛkʋmɛnɔ 'la gbʋ, 26ɩya daa n cɩ 'ka 'lɛ anyɩ 'bhlɩ cɔlɔ, ɩya a 'kaan 'lɛ 'lɩ na, a 'ka Zozi Klisi nɩkplaan kplolili.
A namʋ saa Dɩnanɩa clalɩ 'lɛ na
27‑Ma ka 'nyɩ, a namʋ saa Klisi 'la Dɩnanɩa* 'clalɩ 'lɛ na. Ka n ‑ka anyɩ kopekan ci ‑aana ka n 'ta anyɩ sidiin ‑kʋo 'nyɩ ma ‑ka ala wɔlɩ nyɩtɛda ‑kʋ na, 'naa n 'nu lebhe a 'nylugo kpaan, 'wugoa bhlogbɩɩ nɩkplaan 'nyɩ a 'wlalɩ pɔlɛ 'kʋ a 'tɩtɔlʋ nebhlogbɩɩ, ala pɔɔtɛtɛa a ‑zʋɔ 'lɛ Dɩnanɩa 'kʋ na 'la gbʋ. 28A 'la 'talɩa acɩ 'cin ɩya ala gbatlɩmʋnʋnyaa 'la ŋwlaŋwlanɩa anyɩ ‑ylɛylɛ, ɩ ‑glɩ mala mlɔlɩɛa ɩya anyɩ ‑ala gbʋʋnsalɩɛa 'la ghleda. 'Nyɩ ɩmɩ ‑naa 'wlʋlʋ Laagɔ wlɩɩn, 29ɔmɔ ‑ɔ 'plɩlɩ 'lɛ Klisi 'kʋ 'nyɩ ɔ ya 'lɛ anyɩ 'nanɩ ‑naa nʋ, ‑n 'ta lebhe a 'ka ɔla pɔɔtɛtɛ ‑tɛɛ kalɩ, ‑ma a 'ka ‑awlɛ ɔla gbʋ sɛmʋ. 30Na, a cibhlili lebhe tʋa a 'lɩɩn 'lɛ vʋda 'nyɩ a nu 'lɛ le n vʋ ka ‑azla na, ʋmʋ ‑tɛɛ anyɩ ‑ma a vʋ 'lɛ.
Currently Selected:
Filp 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.