1 Zaan 4
4
A gbazlɩlɩ 'wugwia nɩkplaan
1'Na ‑wawacuonyɩ, a 'la zʋa ala pɔɔtɛtɛa 'wugwia ‑tɛtɛa 'kʋ. ‑Ma a gbazlɩlɩ nɩkplaan, ɩya a 'ka 'lɩ ɩ ‑ka kʋ lebhe ɩ ‑glɩ Laagɔ 'nɩ na. Sa yooyo Laagɔnekʋnyɩtɛnya* ‑bhutukpa ya ‑laagɔzɔan 'kʋ 'cɩlɩ. 2‑Anɩ ‑naa nɩkplaan a cɩ 'ka 'lɛ Laagɔ 'la 'Wugoa cibhlili. 'Wugoa ‑tɛtɛa, ʋ cibhlili 'lɛ lebhe Zozi Klisi ya ‑zaagbʋsa nclɔɔ 'plɩ na, ʋ ‑glɩ Laagɔ 'nʋ. 3‑Ma 'wugoa ‑tɛtɛa ‑ʋ cibhlili 'ta 'lɛ lebhe Zozii 'wlʋlʋ Laagɔ cɩ na, ʋ 'ta Laagɔ 'nʋ ‑glɩ, Klisi 'la ‑zɔbhɛlɩgbanyɔa 'la 'wugo ʋ ‑glɩ 'lɛ. A yaa 'nu lebhe ɔ cɩ 'kaa ci. Na, ɔ ‑kʋnɩ ‑pɔtɔnʋ ‑laagɔzɔan. 4‑Ma anyɩ 'na 'cicʋnyɩ, a ‑glɩ Laagɔ 'la 'cuo, 'nyɩ a ya yooyo Laagɔnekʋnyɩtɛnya ‑naa ‑sɩa, ‑ofi lebhe ɔmɔa ‑ɔ ‑kʋ 'lɛ anyɩ nɩkplaan na, ɔ ‑ka 'tɛtɩ 'nyɩ ɔ zi ɔmɔa ‑ɔ ‑kʋ 'lɛ ‑laagɔzɔan na 'kʋ. 5Maa ‑laagɔzɔn 'la ncɛlɩ ma ‑glɩ 'lɛ, dɛ ma nyɩtɛ 'lɛ ‑laagɔzɔan 'la saa, 'nyɩ ‑laagɔzɔan po 'lɛ maa 'nyukwliin. 6‑Ma ‑anyɩ, Laagɔ 'la ncɛlɩ ‑a ‑glɩ 'lɛ. Na, ɔmɔa ‑ɔ ‑ci 'lɛ Laagɔ na, ɔmɔ ‑ɔ po 'lɛ ‑anyɩ 'nyukwliin. ‑Ma ɔmɔa ‑ɔ 'ta 'lɛ Laagɔ 'nɔ ‑glɩ na, ɔ po 'ta ‑anyɩ 'nyukwliin. 'Lɩka ɩmɩa nɩkplaan -a cibhlili 'lɛ ‑nʋawlɛ 'la 'Wugoa ɩya yodi 'la 'wugoa na.
Laagɔ ‑glɩ ‑wawʋ
7'Na ‑wawacuonyɩ, ‑a wabhawabhalɩ, sa Laagɔ wlɩɩn ‑wawʋ 'wlʋlʋ 'lɛ na. Ncaatʋtʋʋntʋa ‑ɔ ‑wa 'lɛ ɔ 'yʋ na, ɔ ‑glɩ Laagɔ 'la 'cʋ, 'nyɩ ɔ ‑ci Laagɔ. 8‑Ma ɔmɔa, ‑ɔ 'ta 'lɛ ɔ 'yʋ ‑wa na, ɔ 'ta Laagɔ ‑ci, sa Laagɔ ‑glɩ ‑wawʋ na. 9'Nyɩ 'lɩka saa Laagɔ palapalalɩ 'lɛ ‑anyɩ ɔla ‑wawʋa na. Ɔ ya ɔla 'Cʋa bhlogbɩɩa ‑laagɔzɔan lobhu le ‑a ka jabhʋa 'lɩ ɔmɔ 'wluku. 10Na, ɩmɩa ‑ɩ ‑glɩ 'lɛ ‑wawʋa na, ɩmɩ ‑ɩ ‑glɩ lebhe ‑n 'ta ‑anyɩ ‑ɔ 'ta 'lɛ Laagɔ wabha, ‑ma ɔmɔ ‑ɔ wabha 'lɛ ‑anyɩ, 'nyɩ ɔ ya 'lɛ ɔla 'Cʋa lobhu, le ɔ 'plɩ ‑ala nyinyia 'la ‑aghlɛ.
11'Na ‑wawacuonyɩ, Laagɔ ya 'lɛ ‑anyɩ ‑sa wabha na, ‑anyɩ ‑masɛɛ, ‑a wabhawabhalɩ. 12Nclɔɔ bhlogbɩɩ 'ta ka ‑azla Laagɔ 'ciin 'lɩ, ‑ma ‑a ‑ka ‑wawalɩ na, Laagɔ ‑kʋ ‑anyɩ nɩkplaan, 'nyɩ ɔla ‑wawʋa glalɩlɩ 'lɛ ‑anyɩ nɩkplaan 'kʋ. 13Na, ɩmɩa nɩkplaan ‑a cibhlilili 'lɛ lebhe ‑a ‑kʋɔ nɩkplaan 'nyɩ ɔmɔ ‑masɛɛ ɔ ‑kʋ ‑anyɩ nɩkplaan na, ɩmɩ ‑ɩ ‑glɩ lebhe ɔ ya ‑anyɩ ɔla 'Wugoa 'nyɩ.
14'Nyɩ ‑anyɩ ‑ala 'ci yɔɔ 'lɛ 'lɩ na, dɛ ‑a li 'lɛ ‑danʋfʋɛ lebhe Toa ya ɔla 'Cʋa lobhu le 'plɩ ‑laagɔzɔan 'la gbʋʋnsanyɔ. 15Na, ncaatʋtʋʋntʋa ‑ɔ cla 'lɛ lebhe Zozii ‑glɩ Laagɔ 'la 'Cʋ na, 'dɛ 'la nclɔɔa Laagɔ ‑kʋɔ nɩkplaan, 'nyɩ ɔmɔ ‑ma, ɔ ‑kʋ 'lɛ Laagɔ nɩkplaan. 16'Nyɩ ‑anyɩ, ‑a ‑ci ‑wawʋa Laagɔ ‑wa 'lɛ ‑anyɩ na, 'nyɩ ‑a ‑ka ʋla pɔɔtɛtɛ. Laagɔ ‑glɩ ‑wawʋ. Na, ɔmɔa ‑ɔ ‑ka 'lɛ ‑wawʋ na, ɔ ‑kʋ Laagɔ nɩkplaan, 'nyɩ Laagɔ ‑kʋɔ 'lɛ nɩkplaan. 17'Nyɩ ‑walʋa ‑ʋ ‑kʋ 'lɛ ‑anyɩ nɩkplaan na, ʋ ‑ka 'kʋglalɩɔ na, ‑delikʋtɛlɔ ‑yelio ‑anyɩ 'nyɩ ‑a ‑bɛ 'lɛ 'tɩtɩplaclɩɩa, ‑ofi lebhe saa ɔ ‑kʋ 'lɛ na, sɛɛ ‑anyɩ ‑ma sɛɛ ‑a ‑kʋ 'lɛ ‑laagɔzɔan. 18Nclɔɔa ‑ɔ ‑ka 'lɛ ‑wawʋ na, pɔɔvʋ 'bhla 'tɔɔ. ‑Walʋa ‑ʋ ‑glalɩɔ 'lɛ 'kʋ na, ʋya pɔɔvʋ 'ta wɔlɩ ‑kalɩ. ‑Masa pɔɔvʋ ‑ka nclɔɔ 'bhla na, ɩ pala lebhe gbaylɩsalɩɛ ‑bɛɔ. Na, ɔmɔa pɔɔvʋ bhla 'lɛ na, ‑walʋ 'ta ka kɔɔ nɩkplaan 'kʋglalɩ. 19‑Ma ‑anyɩ, ‑a ‑ka ‑wawʋ, ‑ofi lebhe, ɔmɔ ‑ɔ wabhalɩ 'lɛ ‑anyɩ ‑bɛɛ. 20'Nyɩ gbazɩ nclɔɔ ‑ka 'cla lebhe: «N ‑wa Laagɔ,» 'nyɩ ɔ ka ɔ bholi ‑zɔ na, ɔ ‑glɩ yodizʋnyɔ. ‑Masa, ɔmɔa ‑ɔ 'ta 'lɛ ɔ bholia ɔ ‑jlɛ 'lɛ na ‑wa na, ɔ cɩ 'ta Laagɔ, ɔ 'ta 'lɛ ‑jlɛ na, wabha. 21Na, 'lɩka ‑jlɩmaa ɔ 'nyɩ 'lɛ ‑anyɩ na, ama ‑a ‑glɩ lebhe ɔmɔa ‑ɔ ‑wa 'lɛ Laagɔ na, 'naa ɔ wabhamʋ ɔ bholi.
Currently Selected:
1 Zaan 4: NTLD13
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
1 Zaan 4
4
A gbazlɩlɩ 'wugwia nɩkplaan
1'Na ‑wawacuonyɩ, a 'la zʋa ala pɔɔtɛtɛa 'wugwia ‑tɛtɛa 'kʋ. ‑Ma a gbazlɩlɩ nɩkplaan, ɩya a 'ka 'lɩ ɩ ‑ka kʋ lebhe ɩ ‑glɩ Laagɔ 'nɩ na. Sa yooyo Laagɔnekʋnyɩtɛnya* ‑bhutukpa ya ‑laagɔzɔan 'kʋ 'cɩlɩ. 2‑Anɩ ‑naa nɩkplaan a cɩ 'ka 'lɛ Laagɔ 'la 'Wugoa cibhlili. 'Wugoa ‑tɛtɛa, ʋ cibhlili 'lɛ lebhe Zozi Klisi ya ‑zaagbʋsa nclɔɔ 'plɩ na, ʋ ‑glɩ Laagɔ 'nʋ. 3‑Ma 'wugoa ‑tɛtɛa ‑ʋ cibhlili 'ta 'lɛ lebhe Zozii 'wlʋlʋ Laagɔ cɩ na, ʋ 'ta Laagɔ 'nʋ ‑glɩ, Klisi 'la ‑zɔbhɛlɩgbanyɔa 'la 'wugo ʋ ‑glɩ 'lɛ. A yaa 'nu lebhe ɔ cɩ 'kaa ci. Na, ɔ ‑kʋnɩ ‑pɔtɔnʋ ‑laagɔzɔan. 4‑Ma anyɩ 'na 'cicʋnyɩ, a ‑glɩ Laagɔ 'la 'cuo, 'nyɩ a ya yooyo Laagɔnekʋnyɩtɛnya ‑naa ‑sɩa, ‑ofi lebhe ɔmɔa ‑ɔ ‑kʋ 'lɛ anyɩ nɩkplaan na, ɔ ‑ka 'tɛtɩ 'nyɩ ɔ zi ɔmɔa ‑ɔ ‑kʋ 'lɛ ‑laagɔzɔan na 'kʋ. 5Maa ‑laagɔzɔn 'la ncɛlɩ ma ‑glɩ 'lɛ, dɛ ma nyɩtɛ 'lɛ ‑laagɔzɔan 'la saa, 'nyɩ ‑laagɔzɔan po 'lɛ maa 'nyukwliin. 6‑Ma ‑anyɩ, Laagɔ 'la ncɛlɩ ‑a ‑glɩ 'lɛ. Na, ɔmɔa ‑ɔ ‑ci 'lɛ Laagɔ na, ɔmɔ ‑ɔ po 'lɛ ‑anyɩ 'nyukwliin. ‑Ma ɔmɔa ‑ɔ 'ta 'lɛ Laagɔ 'nɔ ‑glɩ na, ɔ po 'ta ‑anyɩ 'nyukwliin. 'Lɩka ɩmɩa nɩkplaan -a cibhlili 'lɛ ‑nʋawlɛ 'la 'Wugoa ɩya yodi 'la 'wugoa na.
Laagɔ ‑glɩ ‑wawʋ
7'Na ‑wawacuonyɩ, ‑a wabhawabhalɩ, sa Laagɔ wlɩɩn ‑wawʋ 'wlʋlʋ 'lɛ na. Ncaatʋtʋʋntʋa ‑ɔ ‑wa 'lɛ ɔ 'yʋ na, ɔ ‑glɩ Laagɔ 'la 'cʋ, 'nyɩ ɔ ‑ci Laagɔ. 8‑Ma ɔmɔa, ‑ɔ 'ta 'lɛ ɔ 'yʋ ‑wa na, ɔ 'ta Laagɔ ‑ci, sa Laagɔ ‑glɩ ‑wawʋ na. 9'Nyɩ 'lɩka saa Laagɔ palapalalɩ 'lɛ ‑anyɩ ɔla ‑wawʋa na. Ɔ ya ɔla 'Cʋa bhlogbɩɩa ‑laagɔzɔan lobhu le ‑a ka jabhʋa 'lɩ ɔmɔ 'wluku. 10Na, ɩmɩa ‑ɩ ‑glɩ 'lɛ ‑wawʋa na, ɩmɩ ‑ɩ ‑glɩ lebhe ‑n 'ta ‑anyɩ ‑ɔ 'ta 'lɛ Laagɔ wabha, ‑ma ɔmɔ ‑ɔ wabha 'lɛ ‑anyɩ, 'nyɩ ɔ ya 'lɛ ɔla 'Cʋa lobhu, le ɔ 'plɩ ‑ala nyinyia 'la ‑aghlɛ.
11'Na ‑wawacuonyɩ, Laagɔ ya 'lɛ ‑anyɩ ‑sa wabha na, ‑anyɩ ‑masɛɛ, ‑a wabhawabhalɩ. 12Nclɔɔ bhlogbɩɩ 'ta ka ‑azla Laagɔ 'ciin 'lɩ, ‑ma ‑a ‑ka ‑wawalɩ na, Laagɔ ‑kʋ ‑anyɩ nɩkplaan, 'nyɩ ɔla ‑wawʋa glalɩlɩ 'lɛ ‑anyɩ nɩkplaan 'kʋ. 13Na, ɩmɩa nɩkplaan ‑a cibhlilili 'lɛ lebhe ‑a ‑kʋɔ nɩkplaan 'nyɩ ɔmɔ ‑masɛɛ ɔ ‑kʋ ‑anyɩ nɩkplaan na, ɩmɩ ‑ɩ ‑glɩ lebhe ɔ ya ‑anyɩ ɔla 'Wugoa 'nyɩ.
14'Nyɩ ‑anyɩ ‑ala 'ci yɔɔ 'lɛ 'lɩ na, dɛ ‑a li 'lɛ ‑danʋfʋɛ lebhe Toa ya ɔla 'Cʋa lobhu le 'plɩ ‑laagɔzɔan 'la gbʋʋnsanyɔ. 15Na, ncaatʋtʋʋntʋa ‑ɔ cla 'lɛ lebhe Zozii ‑glɩ Laagɔ 'la 'Cʋ na, 'dɛ 'la nclɔɔa Laagɔ ‑kʋɔ nɩkplaan, 'nyɩ ɔmɔ ‑ma, ɔ ‑kʋ 'lɛ Laagɔ nɩkplaan. 16'Nyɩ ‑anyɩ, ‑a ‑ci ‑wawʋa Laagɔ ‑wa 'lɛ ‑anyɩ na, 'nyɩ ‑a ‑ka ʋla pɔɔtɛtɛ. Laagɔ ‑glɩ ‑wawʋ. Na, ɔmɔa ‑ɔ ‑ka 'lɛ ‑wawʋ na, ɔ ‑kʋ Laagɔ nɩkplaan, 'nyɩ Laagɔ ‑kʋɔ 'lɛ nɩkplaan. 17'Nyɩ ‑walʋa ‑ʋ ‑kʋ 'lɛ ‑anyɩ nɩkplaan na, ʋ ‑ka 'kʋglalɩɔ na, ‑delikʋtɛlɔ ‑yelio ‑anyɩ 'nyɩ ‑a ‑bɛ 'lɛ 'tɩtɩplaclɩɩa, ‑ofi lebhe saa ɔ ‑kʋ 'lɛ na, sɛɛ ‑anyɩ ‑ma sɛɛ ‑a ‑kʋ 'lɛ ‑laagɔzɔan. 18Nclɔɔa ‑ɔ ‑ka 'lɛ ‑wawʋ na, pɔɔvʋ 'bhla 'tɔɔ. ‑Walʋa ‑ʋ ‑glalɩɔ 'lɛ 'kʋ na, ʋya pɔɔvʋ 'ta wɔlɩ ‑kalɩ. ‑Masa pɔɔvʋ ‑ka nclɔɔ 'bhla na, ɩ pala lebhe gbaylɩsalɩɛ ‑bɛɔ. Na, ɔmɔa pɔɔvʋ bhla 'lɛ na, ‑walʋ 'ta ka kɔɔ nɩkplaan 'kʋglalɩ. 19‑Ma ‑anyɩ, ‑a ‑ka ‑wawʋ, ‑ofi lebhe, ɔmɔ ‑ɔ wabhalɩ 'lɛ ‑anyɩ ‑bɛɛ. 20'Nyɩ gbazɩ nclɔɔ ‑ka 'cla lebhe: «N ‑wa Laagɔ,» 'nyɩ ɔ ka ɔ bholi ‑zɔ na, ɔ ‑glɩ yodizʋnyɔ. ‑Masa, ɔmɔa ‑ɔ 'ta 'lɛ ɔ bholia ɔ ‑jlɛ 'lɛ na ‑wa na, ɔ cɩ 'ta Laagɔ, ɔ 'ta 'lɛ ‑jlɛ na, wabha. 21Na, 'lɩka ‑jlɩmaa ɔ 'nyɩ 'lɛ ‑anyɩ na, ama ‑a ‑glɩ lebhe ɔmɔa ‑ɔ ‑wa 'lɛ Laagɔ na, 'naa ɔ wabhamʋ ɔ bholi.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.