Xuti 1
1
Nuhemi meta Xuti
1Merikɨtsɨ, meripaitɨ 'itsɨkate mete'aitakaku mɨkɨ kwieyaritsie, haakaxa kaniutaweni. Xewitɨ tewi Wereni kiekame Kura kwieyaritsie heyeyaka Muhawi kwieyaritsie peta'a, yɨ'ɨya meta yuniwema yuhutame warawitɨtɨ.#1:1 Keneuxeiya 'Its 2:16. 2Mɨkɨ 'uki 'Erimereki pɨtitewakai, 'ɨyayata Nuhemi pɨtitewakai, niwemamata Makiruni meta Kirihuni. Mɨkɨ yunaitɨ 'Epɨrata kiekatari mepɨhɨkɨtɨkai, Wereni kiekatari Kura kwieyaritsie. Kepauka Muhawi kwieyaritsie memeta'axɨa, mana mepɨyuhayewaxɨ.
3Matsi 'Erimereki kaniumɨni Nuhemi kɨnaya. Hikɨ mɨkɨ yuxaɨta kaniuyuhayewa yuniwema yuhutame wahamatɨa. 4Mɨkɨ yuhutatɨ mekaniutineneɨke 'ukarawetsixi muhawitsixi mekaniwarutiwitɨni. Xewitɨ 'Uripa pɨtitewakai, xewitɨta Xuti. Tamamata wiyari mana metitetɨ, 5hikɨ mɨkɨta mekaniukwini Makiruni meta Kirihuni. Nuhemi wiuratɨtɨ yuxaɨta puyuhayewaxɨ niwemama me'ukwiku.
6Hikɨ Yawé yuteɨterima hekwamekɨ kaniwaparewiekaitɨni tixuaweriyatɨ 'ikwaite. Hikɨ Nuhemi mɨpaɨ retimaika kaniyukuha'aritɨani yumu'e'ema waranuwitɨnike Muhawi yeyanike. 7Hikɨ kaneyani yumu'e'ema yuhutame warawitɨtɨ hakewa meripaitɨ mekienatɨkai. Yunaitɨ mekanekɨne huyeta, Kura kwieyaritsie haneme 'utɨa.
8Hikɨ Nuhemi mɨpaɨ katiniwarutahɨawe yumu'e'ema:
―Neuxei, yuxexuitɨ yukie xekeneutayeixɨa yumaamama wahetsɨa. Yawé 'aixɨa ketixexeiyani kexemɨtewanaki'eriekai memukwi, wahetsie kexemɨtewiyakai, yaxeikɨata kexemɨnetenaki'eriekai ne. 9Yawé waɨkawa kexeheparewieka hekwamekɨ 'aixɨa 'anemekɨ xemɨtiwikienikɨ.
Hikɨ kaniwaruti'itseni. Perutsɨ mu'e'emama kwinimieme meyuhiwerietɨ meputitsuanakai 10mɨpaɨ me'utiyuatɨ:
―Hawaikɨ. Tame tepɨyehu 'ahamatɨa 'akiekaritsie.
11Nuhemi mɨpaɨ katiniwaruta'eiya:
―Neuxei neniwema, yukie xekenehu. ¿Titayarikuta nehamatɨa xetekɨniku? Tawariri nepɨkatiniweni memɨxetiwitɨnikɨ. 12Xekenehu yukie, neniwema. Xekeneuhuni. Neri nepɨ'ukaratsi nepɨtseɨye, tawariri nepɨkayɨwe nemɨtiwikienikɨ. Xɨka neyɨwenike, 'ikɨ tɨkaritsie nepɨtiwikienikeyu nemɨtiniwenikɨ, 13¿xemeta xeteyɨwawe xemɨwakwewienikɨ mewawerekaku? ¿Xeteyuwaɨriya xekawikietɨ xemɨyuhayewanikɨ wakɨmana? Hawaikɨ, neniwema. Waɨkawa matsi ne nepɨtiuka'eniwa kexeme. Yawé waɨkawa pɨnetsi'anayewaya.
14Tawarita matsi karima mekaniutihiwakaitɨni, kwi meyuheiwerietɨ. Hikɨ 'Uripa yumu'e kaniutateutɨani 'i'itseka. Peru Xuti hamatɨana puyuhayewaxɨ.
15Nuhemi mɨpaɨ kaniutayɨni:
―Neuxei, nemu'e. 'Awixi yukie petɨa, yukakaɨyarixi wahetsɨa. 'Ekɨta hepaɨna kenemie.
16Xuti mɨpaɨ katinita'eiya:
―Pepɨkanetsinɨ'aka nemɨyemiekɨ, 'axaɨta nemɨmatsiku'eirienikɨ.
»Ne 'ahamatɨa nepɨyemie, hakewa pemetɨa.
Hakewa pemekani, neta mana nepekani.
'Ateɨterima, neteɨterima mepɨhɨkɨtɨni.
'Akakaɨyari pɨnekakaɨyaritɨni.
17Hakewa pememɨni, manata ne nepemɨni,
Mana nepekateukieni.
Yawé kenetsihe'uximatɨani xɨka nemetsiheku'eirieni
xɨka tixaɨtɨ kataretaxɨriexɨani,
kamɨyatɨtɨ».
18Nuhemi 'uyɨ'ɨwiyaka yuheyemekɨ mɨyuwaɨriyakaikɨ Xuti 'enuweiyake, tawariri pɨka'ita'imaiyaxɨ.
19Hikɨ, yuhutatɨ 'ukarawetsixi mekanekɨne huyeta meheta'axɨanike Wereni paitɨ. Me'u'axɨaku, waɨkawa niuki kaniutixuawere wahepaɨtsita, naitsarie kiekaritsie.
'Ukarawetsixi mɨpaɨ mekateniyuku'iwawiyakaitɨni:
―¿'Ikɨ Nuhemi katihɨkɨ?
20Nuhemi mɨpaɨ katiniwarutahɨawe:
―Nuhemi#1:20 Nuhemi hepɨrayukɨ witsimɨ'ane makaka panuyɨne. xepɨkanete'uterɨwani. Marara#1:20 Marara hepɨrayukɨ matsiwi panuyɨne. pɨtari xekeneteneuterɨwani. Naimekɨmɨtɨrɨkaɨye nehatsiwime pɨnetsi'ayeitɨa.
21»Kepauka nemetɨa yemekɨ nepɨhɨnekai nepɨyɨwekai,
matsi Yawé pɨnetsihakunuitɨa nexaɨtame, naime netiunawairieka.
Titayari Nuhemi xenete'uterɨwani
Yawé 'uximatɨarika netsi'upitɨaka,#1:21 Yawé 'uximatɨarika netsi'upitɨaka. Ya Xɨka Yawé ya'utaineni nehepaɨtsita kenemɨtiuyuri.
temawierika pɨnetsi'unawairi Naimekɨmɨtɨrɨkaɨye».
22Mɨpaɨ Nuhemi katininuani yukiekaritsie, Muhawi kwieyaritsie heyeyaka, yumu'e hawitɨtɨ Xuti Muhawi tewiyari. Kepauka memu'axɨa Wereni, tsewara 'itsanariyari putsutɨariekai.
Currently Selected:
Xuti 1: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
Xuti 1
1
Nuhemi meta Xuti
1Merikɨtsɨ, meripaitɨ 'itsɨkate mete'aitakaku mɨkɨ kwieyaritsie, haakaxa kaniutaweni. Xewitɨ tewi Wereni kiekame Kura kwieyaritsie heyeyaka Muhawi kwieyaritsie peta'a, yɨ'ɨya meta yuniwema yuhutame warawitɨtɨ.#1:1 Keneuxeiya 'Its 2:16. 2Mɨkɨ 'uki 'Erimereki pɨtitewakai, 'ɨyayata Nuhemi pɨtitewakai, niwemamata Makiruni meta Kirihuni. Mɨkɨ yunaitɨ 'Epɨrata kiekatari mepɨhɨkɨtɨkai, Wereni kiekatari Kura kwieyaritsie. Kepauka Muhawi kwieyaritsie memeta'axɨa, mana mepɨyuhayewaxɨ.
3Matsi 'Erimereki kaniumɨni Nuhemi kɨnaya. Hikɨ mɨkɨ yuxaɨta kaniuyuhayewa yuniwema yuhutame wahamatɨa. 4Mɨkɨ yuhutatɨ mekaniutineneɨke 'ukarawetsixi muhawitsixi mekaniwarutiwitɨni. Xewitɨ 'Uripa pɨtitewakai, xewitɨta Xuti. Tamamata wiyari mana metitetɨ, 5hikɨ mɨkɨta mekaniukwini Makiruni meta Kirihuni. Nuhemi wiuratɨtɨ yuxaɨta puyuhayewaxɨ niwemama me'ukwiku.
6Hikɨ Yawé yuteɨterima hekwamekɨ kaniwaparewiekaitɨni tixuaweriyatɨ 'ikwaite. Hikɨ Nuhemi mɨpaɨ retimaika kaniyukuha'aritɨani yumu'e'ema waranuwitɨnike Muhawi yeyanike. 7Hikɨ kaneyani yumu'e'ema yuhutame warawitɨtɨ hakewa meripaitɨ mekienatɨkai. Yunaitɨ mekanekɨne huyeta, Kura kwieyaritsie haneme 'utɨa.
8Hikɨ Nuhemi mɨpaɨ katiniwarutahɨawe yumu'e'ema:
―Neuxei, yuxexuitɨ yukie xekeneutayeixɨa yumaamama wahetsɨa. Yawé 'aixɨa ketixexeiyani kexemɨtewanaki'eriekai memukwi, wahetsie kexemɨtewiyakai, yaxeikɨata kexemɨnetenaki'eriekai ne. 9Yawé waɨkawa kexeheparewieka hekwamekɨ 'aixɨa 'anemekɨ xemɨtiwikienikɨ.
Hikɨ kaniwaruti'itseni. Perutsɨ mu'e'emama kwinimieme meyuhiwerietɨ meputitsuanakai 10mɨpaɨ me'utiyuatɨ:
―Hawaikɨ. Tame tepɨyehu 'ahamatɨa 'akiekaritsie.
11Nuhemi mɨpaɨ katiniwaruta'eiya:
―Neuxei neniwema, yukie xekenehu. ¿Titayarikuta nehamatɨa xetekɨniku? Tawariri nepɨkatiniweni memɨxetiwitɨnikɨ. 12Xekenehu yukie, neniwema. Xekeneuhuni. Neri nepɨ'ukaratsi nepɨtseɨye, tawariri nepɨkayɨwe nemɨtiwikienikɨ. Xɨka neyɨwenike, 'ikɨ tɨkaritsie nepɨtiwikienikeyu nemɨtiniwenikɨ, 13¿xemeta xeteyɨwawe xemɨwakwewienikɨ mewawerekaku? ¿Xeteyuwaɨriya xekawikietɨ xemɨyuhayewanikɨ wakɨmana? Hawaikɨ, neniwema. Waɨkawa matsi ne nepɨtiuka'eniwa kexeme. Yawé waɨkawa pɨnetsi'anayewaya.
14Tawarita matsi karima mekaniutihiwakaitɨni, kwi meyuheiwerietɨ. Hikɨ 'Uripa yumu'e kaniutateutɨani 'i'itseka. Peru Xuti hamatɨana puyuhayewaxɨ.
15Nuhemi mɨpaɨ kaniutayɨni:
―Neuxei, nemu'e. 'Awixi yukie petɨa, yukakaɨyarixi wahetsɨa. 'Ekɨta hepaɨna kenemie.
16Xuti mɨpaɨ katinita'eiya:
―Pepɨkanetsinɨ'aka nemɨyemiekɨ, 'axaɨta nemɨmatsiku'eirienikɨ.
»Ne 'ahamatɨa nepɨyemie, hakewa pemetɨa.
Hakewa pemekani, neta mana nepekani.
'Ateɨterima, neteɨterima mepɨhɨkɨtɨni.
'Akakaɨyari pɨnekakaɨyaritɨni.
17Hakewa pememɨni, manata ne nepemɨni,
Mana nepekateukieni.
Yawé kenetsihe'uximatɨani xɨka nemetsiheku'eirieni
xɨka tixaɨtɨ kataretaxɨriexɨani,
kamɨyatɨtɨ».
18Nuhemi 'uyɨ'ɨwiyaka yuheyemekɨ mɨyuwaɨriyakaikɨ Xuti 'enuweiyake, tawariri pɨka'ita'imaiyaxɨ.
19Hikɨ, yuhutatɨ 'ukarawetsixi mekanekɨne huyeta meheta'axɨanike Wereni paitɨ. Me'u'axɨaku, waɨkawa niuki kaniutixuawere wahepaɨtsita, naitsarie kiekaritsie.
'Ukarawetsixi mɨpaɨ mekateniyuku'iwawiyakaitɨni:
―¿'Ikɨ Nuhemi katihɨkɨ?
20Nuhemi mɨpaɨ katiniwarutahɨawe:
―Nuhemi#1:20 Nuhemi hepɨrayukɨ witsimɨ'ane makaka panuyɨne. xepɨkanete'uterɨwani. Marara#1:20 Marara hepɨrayukɨ matsiwi panuyɨne. pɨtari xekeneteneuterɨwani. Naimekɨmɨtɨrɨkaɨye nehatsiwime pɨnetsi'ayeitɨa.
21»Kepauka nemetɨa yemekɨ nepɨhɨnekai nepɨyɨwekai,
matsi Yawé pɨnetsihakunuitɨa nexaɨtame, naime netiunawairieka.
Titayari Nuhemi xenete'uterɨwani
Yawé 'uximatɨarika netsi'upitɨaka,#1:21 Yawé 'uximatɨarika netsi'upitɨaka. Ya Xɨka Yawé ya'utaineni nehepaɨtsita kenemɨtiuyuri.
temawierika pɨnetsi'unawairi Naimekɨmɨtɨrɨkaɨye».
22Mɨpaɨ Nuhemi katininuani yukiekaritsie, Muhawi kwieyaritsie heyeyaka, yumu'e hawitɨtɨ Xuti Muhawi tewiyari. Kepauka memu'axɨa Wereni, tsewara 'itsanariyari putsutɨariekai.
© 2020, Wycliffe Bible Translators, Inc.