Matsiɨkɨtɨ kemɨratɨa 20

Xeimiriyari wiyari

1Merikɨtsɨ manata niuki tuayame nekaniuxeiya muyuawitsie 'akamiekame yawi 'akwekame para mɨrewatiyepienikɨ meukatewatsie, meta karena kaunariyari 'amɨpa 'ahurietɨ. 2Hikɨ mɨkɨ kuu kaniuwiya meripaitɨ mieme Kauyumarie meta Tsatanaxi mɨhɨkɨ, kanekuwieni xeimiriyari wiyari. 3Meukatewatsie kaneikahɨani kanenunani, kiteniena kanitseyumani, mɨkatiwa'irɨwiyanikɨ nuiwarite mexi'akuxi ka'aye'awekai xeimiriyari wiyari. 'Anake kaniyɨwemɨkɨ mɨxɨnarienikɨ yapaɨmexɨa.

4Hikɨ te'aitamete wa'uwenite nekaniuxeiya mana 'a'ukame. Hetsiena mekanayaxe mɨkɨ heitserie memupitɨarie. Mekani'itsɨkatetɨkaitɨni kememɨte'upitɨarie. Hikɨ hipameta nekaniwaruxeiya, mɨkɨ wamu'u manutiwitekiexɨa memɨyuhekɨatakaikɨ Ketsutsi hetsɨa memiemetetɨtɨ, meta Kakaɨyari niukieya memɨkuxatakaikɨ. Nenewieri yeutanaka memɨkapitɨakai meta 'ɨkiyari, tseyuya memɨka'utanaki'eri yukanata meta yumamatsie, mɨkɨ wa'iyarite nekaniuxeiya. Mɨkɨ me'anutaneniereka, meta Kɨritsitu hamatɨa te'aitamete mekanakɨne xeimiriyari wiyari. 5'Ikɨ matɨarie miemete memanuku'uitɨarie mekanihɨkɨtɨni, 'ana 'akuxi hipatɨ mɨkite mepɨka'anutanenierixɨ, xeimiriyari wiyari 'aye'akuke mekananutaneniere 'imatɨremete. 6'Aixɨa mekani'itɨarieka, meta mekanipatsieka kemɨ'ane matɨari miemetsie memanuku'uitɨarie. Hutarieka mɨɨya tɨrɨkariya pɨkahexeiya wahepaɨtsita, mɨkɨ matsi mawari wewiwamete mepɨhɨkɨtɨni Kakaɨyari hetsiemiemete meta Kɨritsitu hetsiemiemete, hamatɨana te'aitamete mepɨhɨkɨtɨni xeimiriyari wiyari.

7Merikɨtsɨ kepauka haye'ayu xeimiriyari wiyari, Kauyumarie kanixɨnariemɨkɨ manutahɨiyatsie, 8meta kaniwatiyeimɨkɨ nuiwarite mɨtiwa'irɨwiyanikɨ tatserieta ta'utata tahixɨata tatsutɨapai memetitei kwiepa ―kukitari meta makukitari―, yunaime kaniwakuxeɨrimɨkɨ memɨyutakwinikɨ, haramara tetsita xiekari mɨtika hepaɨ meyupaɨmetɨ. 9Hikɨ kwie manuye'atɨkatsie paitɨ mekaneutayeixɨani, meta Kakaɨyari teɨterimama memakuteitsie warita mekanikutekaitɨni, kiekari mɨnaki'eriwa. Peru tai muyuawitsie kanakanemɨkɨ mɨkɨ kaniwatixɨtsitɨamɨkɨ yunaime. 10Kauyumarie mɨtiwa'irɨwiyakai mana kaneukahɨiyamɨkɨ harakuna 'atsupɨrekɨ mɨta'atsie, manata yeutanaka meta tixaxatame mɨti'itawa hamatɨa mekaneukaxɨriyakuni. Mana tukarikɨ meta tɨkarikɨ mekateniuka'eniwakuni yuheyemekɨ tsepanetɨ xeitsienituyari wiyari manuyekɨka.

Mɨkite memata'iwawiyarienitsie

11Hikɨ 'uweni mɨtuxa mɨmariwe nekaniuxeiya, xewitɨ mɨkɨtsie makatei. Hɨxiena kwie meta muyuawi naitɨ kaniyupataxɨani mana memɨkatitenikɨ, huyeri pukumawerixɨa. 12Hikɨta mɨkite nekaniwaruxeiya 'ukirawetsixi meta tɨɨri yunaime, 'uweni manuwe hɨxie meti'ukame. Xapate kananutayepiyaxɨani, meta xewitɨ, tukari memexeiyanikɨ xapayari, hikɨ mɨkite mekaniuta'iwawiyarieni kememɨte'uyuri hepaɨtsita, kemɨre'utɨariekai xapatetsie. 13Mana haramara yɨmɨkite kaniwayetuani, mɨɨya meta tai mɨta'a mɨkɨta mekaniwayetuani, Yuxexuitɨ mekaniuta'iwawiyarieni kememɨte'uyuriexɨa hepaɨtsita. 14Mɨɨya meta tai mɨta'a harakuna mɨta'a hetsie mekaneukaxɨriyani. 'Ikɨ harakuna mɨta'a, hutarieka mieme mɨɨya kanihɨkɨtɨni. 15Kemɨ'ane tukari mexeiyani xapayaritsie mɨka'aka'utsieni, mɨkɨ harakuna mɨta'atsie kaneukahɨiyamɨkɨ.

Currently Selected:

Matsiɨkɨtɨ kemɨratɨa 20: hch

Highlight

Copy

Compare