Nahumi 1
1
1Kemɨtiyɨni niukiyari Niniwe hepaɨtsita mieme. 'Ikɨ xapa kanihɨkɨtɨni Nahumi 'Erikutsi kiekame kemɨtiunieritɨarie hepaɨtsita mɨtikuxata.
Yawé kemɨtiuyeha'a Niniwe hepaɨtsita
2Yawé Kakaɨyari mɨtiuyukakwerie kanihɨkɨtɨni meta mɨyɨkɨhɨpa.
Yawé mɨyɨkɨhɨpa, Ti'aitame mayu'eriya.
Yawé pɨtiwarakapitɨwa kemɨ'ane memeye'unie,
mɨwaraye'unie wahepaɨtsita pɨkayuhaxɨapitɨarinɨa.
3Yawé yapauka muyeha'ani pɨkayɨwe,
peru tɨrɨkariyaya pɨmariwe.
Yawé tiwakwinitɨatɨ xeime tɨma pɨkahayewa.
'Eka meta wiyeri mɨtɨrɨkawitsata kaniumieni,
hai tumuanari kanihɨkɨtɨni ketateya hetɨa mieme.
4Kepauka mɨkɨ mɨtita'aita haramara kaniukawaukeni,
meta haa muhapane kaniukawaukeni.
Watsani meta Kaximeru hɨriyaritsie 'ɨxa 'aixɨa mɨ'anene pɨtiwauke,
meta kɨyexi 'emɨpapa Riwanu mieme kanitiyɨnareni.
5Kakaɨyari hɨxie hɨrite kaniutiyɨyɨakani,
meta yemurite kanika'unikeni.
Metatsiere hɨxiena kwie kaniutayuaneni,
meta yunaitɨ hetsiena memɨte'u'uwa.
6¿Kemɨ'ane pɨyɨwe mɨtiunewieni haxɨaya hepaɨtsita?
¿Kemɨ'ane putawikweiwe haxɨaya mɨtiyukukuinetsie?
Haxɨaya tai hepaɨ katiniyukukuineni,
hɨxiena tetexi kanititarikeni.
Niniwe kiekatari memuka'unarie
7Yawé 'aixɨa katiniuka'iyarini,
'uximatɨarika muxuawenitsie mɨkɨ tiyu'awietame kanihɨkɨtɨni,
meta kemɨ'ane hetsiena memɨtewiya wahetsie nunuwame kanihɨkɨtɨni.
8Peru Niniwe kanika'unamɨkɨ
kaniwatihautsitɨamɨkɨ waɨkawa mekaneuyewekuni,
tsepa makuyɨwitsie mɨwaraye'unie kaniwaranukuweiyamɨkɨ.
9¿Kemetekuxata Yawé hepaɨtsita?
Mɨkɨ kememɨte'uxa katiniwamuririemɨkɨ.
Xeimieme xeikɨa pɨtiwakwinitɨani.
10Tupiriya mɨwawaki hepaɨ mekanitixɨtsitɨariekuni,
xuya mayuyewiya hepaɨ,
meta tarɨwekarixi winu 'iiyarikɨ memanutikɨ hepaɨ.
11'Ekɨ, Niniwe, 'ahetsie pɨyetɨa
Yawé hepaɨtsita 'axamɨtikuxata,
'axa'anemekɨ mɨ'ɨxatsita.
Kakaɨyari teɨterimama kememɨte'utaxatɨarie
12Yawé mɨpaɨ kanaineni:
«Tsepanetɨ 'atsiriyutsixi memɨmɨire metɨrɨkawitɨ,
mekanikwi'iwakuni meta mekanikumaweriyariekuni.
'Ekɨta, Kura tsepa nemɨmatsi'uhiweritɨa,
tawariri nepɨkamatsihiweritɨani.
13Yuku pemetɨkɨ nekanitamuramɨkɨ
kepemɨrakuwie nekamanixɨnamɨkɨ».
14Peru 'ekɨ Niniwe, 'ahepaɨtsita,
Yawé 'ipaɨ katiniu'aita:
«Tawari 'anuiwarima mepɨkatixuawere memɨmatsiha'eriwani kepemɨtitewa,
watukita paitɨ nekaniwatitaramɨkɨ
kakaɨyarixi memɨxixiyatɨka meta memɨkwaxiyarietɨka.
'Ateukiya nenikuha'aritɨamɨkɨ,
'axapemɨtiuka'iyari pemɨhɨkɨkɨ».
Niuki Niniwe kemɨtiuka'unarie
15Neuxei. 'Ari hɨritetsie kanakamieni,
niuki 'aixɨa manuyɨne matɨkɨ kememɨte'ayu'iwaxɨ titaxatake,
kemɨ'ane mɨtatitaxatɨani kayuwatɨ temexeiyanikɨ.
Kura, 'a'ixɨarari kenewewieneniri.
Kepemutayɨ ketinaye'atɨwani.
'Axamemɨte'u'iyari tawari 'akwiepa mepɨkaheutahaxɨani,
'ari mekaniukwi'iwa yunaitɨ yemekɨ.
Currently Selected:
Nahumi 1: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
