Marikuxi 2
2
Ketsutsi kemɨrenayehɨa huriekame
(Mar 2:3-12 – Mat 9:2-8, Ruk 5:18-26)
1Merikɨtsɨ yapaɨmexɨa tukari 'anukayaku, hutarieka kaninuani Kaperunaumetsie. Kaniutamariwa kename kiita hayekatei. 2Yumɨiretɨ kwitɨwa mekaniyukuxeɨrieni, memɨyumɨirekaikɨ, nikitenie hɨxie mepɨkatenakekai, hikɨ mɨkɨ niuki kaniwakɨxaxatɨwakaitɨni. 3Hikɨ hipatɨ huriekame mekani'atɨirieni, yunaukatɨ mehekwetɨ. 4'Ahurawa me'ekwenike mekaniyutatexieni teɨteri memɨyumɨirekaikɨ. 'Ayumieme Ketsutsi manuwekaitsie kii heima mekaneuka'ine, 'ixumeri mewati'ineka muwa huriekame mekaneukatuani, 'itaritsie 'akaikame. 5Ketsutsi waruxeiyaka yuri kememɨte'eriekai, mɨpaɨ huriekame katiniutahɨawe:
—Neniwe, pepɨreuyehɨwiyarie 'axapemɨtiuyurikɨ.
6Hikɨ hipatɨ 'inɨarikɨ memɨte'ɨkitametetɨkai muwa mekanayetekaitɨni, yu'iyaritsie mɨpaɨ mekateniyɨkɨhɨawekaitɨni: 7«¿Titayarikuta mɨya tikɨhɨawe 'ikɨ? Kakaɨyari hepaɨtsita 'axaputaine. ¿Kepainetɨ pɨyɨwe mɨreiyehɨwirieni tewi 'axatiuyurieyu, xewitɨ xeikɨa kaniyɨweni Kakaɨyaritɨtɨ?»
8Ketsutsi yu'iyaritsie timaitɨ mɨya memɨteyɨkɨhɨawekaikɨ, mɨpaɨ katiniwarutahɨawe:
—¿Titayari mɨya xeteyɨkɨhɨawe yu'iyaritsie? 9¿Tita matsi katikwaniwe, mɨpaɨ mɨtitahɨawe muhurie: “Pepɨreuyehɨwiyarie 'axapemɨtiuyurikɨ”, nutsutɨ: “Kenanukukexi, 'a'itari kenanukukwe'i, kenekuyeikani, xɨka 'utayɨni”? 10Hikɨtsɨ ya'aneme xekanetimaikuni kename heitserie nehexeiya kwiepa nemɨtiwareuyehɨwirienikɨ 'axamemɨte'uyuri, Yuri Tewi nehɨkɨtɨtɨ.
Hikɨ huriekame mɨpaɨ katiniutahɨawe:
11―'Ekɨ nepɨmarahɨawe, kenanukukexi, 'a'itari kenakwetɨ, meta 'akie kenemie.
12Hikɨ mɨkɨ kananukukeni, yu'itari kananukukweni kaneyani yunaime wahɨxie. 'Ayumieme yunaitɨ mekaniuhɨxiyani, hikɨ 'aixɨa mekaniutiyuanekaitɨni Kakaɨyari hepaɨtsita, mɨpaɨ me'utiyuatɨ:
—Hatsuaku tepɨkanenieriwawekai 'ipaɨ tiyɨanekaku.
Kemɨtita'ini Rewi hetsiena mɨtiwiyanikɨ
(Mar 2:14-17 – Mat 9:9-13, Ruk 5:27-32)
13Merikɨtsɨ tawarita harakuna tetsita Ketsutsi kaneyani. Teɨteri yunaitɨ hetsɨana mekani'axekaitɨni, mɨkɨta katiniwa'ɨkitɨakaitɨni. 14Hikɨ mana 'uyemietɨ Rewi 'Aripeu nu'aya kaniuxeiya teɨteri memɨte'ayutituayatsie 'akaime.
Ketsutsi mɨpaɨ katinitahɨawe:
—Nehetsie ketinewiyani.
Hikɨ Rewi 'anukukeka hetsiena katiniuwiya.
15Merikɨtsɨ tikwakaku Ketsutsi Rewi kiita, yumɨiretɨ kuwiyexinu hetsiemieme tewawamete, meta 'axateyuruwamete mekatenikwakaitɨni Ketsutsi hamatɨa meta teyɨ'ɨkitɨwametemama wahamatɨa, 'ari mekaniyumɨirekaitɨni memeweiyakai. 16Hikɨ kepauka 'inɨarikɨ memɨte'ɨkitametetɨkai meta paritseutsixi memɨhɨkɨtɨkai me'ixeiyaka tikwakame 'axateyuruwamete wahamatɨa meta tewawamete wahamatɨa, mɨpaɨ mekateniwarutahɨawe teyɨ'ɨkitɨwametemama:
—¿Neuxei, 'ikɨ tewawamete meta 'axateyuruwamete wahamatɨa tikwa'a?
17Waru'enieka, Ketsutsi mɨpaɨ katiniwarutahɨawe:
—'Aixɨa memɨteheu'erie mepɨkaheiyehɨwa tiyu'uayemawame, mɨkɨ memɨtekukuye pɨta mekaneiyehɨaka. Ne nepɨkanua newata'inienike mɨkɨ heitseriemekɨ yamemɨtekahu, mɨkɨ 'axamemɨteyurie pɨta newata'inienike nekaninuani.#2:17 RV60 meta hipatɨ mepenanɨitɨa memɨtehayewakɨ ke'axamemɨteyuriekai.
Kememɨte'ita'iwawiyaxɨ hakiya hepaɨtsita
(Mar 2:18-22 – Mat 9:14-17, Ruk 5:33-38)
18Merikɨtsɨ Wani hetsɨa miemete teyɨ'ɨkitɨwamete meta paritseutsixi mewaxeiyatɨ memuyuhakiximekaikɨ, hipatɨ me'u'axɨaka, Ketsutsi mɨpaɨ mekateniuta'iwawiya:
—¿Titayari Wani hetsɨa miemete teyɨ'ɨkitɨwamete meta paritseutsixi wahetsɨa miemete meteyuhakiwa, 'ahetsɨa miemeteta teyɨ'ɨkitɨwamete mekateyutihakiwa?
19Ketsutsi mɨpaɨ katiniwaruta'eiya:
—¿Kemeteyɨwawe memɨyuhakieka neneɨkeme 'inierimama, mexi neneɨkeme wahamatɨa 'uyeika? Mexi neneɨkeme watsata 'uyeika mepɨkayɨwawe memɨyuhakieka. 20Peru tukari kanaye'amɨkɨ kepauka neneɨkeme mɨtihanieni watsata, hikɨ 'anake mekaniyuhakikuni. 21Nixewitɨ tewi 'ixuriki mɨye'i pɨkamanetsikitɨwa 'ixuriki mɨhekwakɨ. Xɨka mɨpaɨ tiuyurieni, 'ixuriki mɨhekwa xɨka yutatuni mɨye'i pɨtatsana, tsanimeyari matsi waɨkawa 'axa'anetɨ payeika. 22Meta nixewitɨ tsixai mɨyeye'itsie pɨka'ikatu'a kaxie winuyari mɨhekwa mɨkwanakɨ. Mexɨka mɨpaɨ tiuyurieni, winu tsixai kanititsanamɨkɨ, winu kaneuyewemɨkɨ meta tsixai. Matsi kaxie winuyari mɨhekwa tsixai mɨhehekwatsie kanikatuariwani.
Teyɨ'ɨkitɨwamete kememɨte'iwatihunaxɨa tɨriku 'uxipiya tukaritsie
(Mar 2:23-28, 3:1-6 – Mat 12:1-14, Ruk 6:1-11)
23Merikɨtsɨ 'uxipiya tukaritsie, Ketsutsi 'etsipa kaniuyeyani, teyɨ'ɨkitɨwametemama, mana me'uyehutɨ, mekanitsutɨani mewatihunatɨ tɨriku mɨayeyari.
24Hikɨ paritseutsixi mɨpaɨ mekatenitahɨawe:
—Neuxei, ¿titayarikuta mɨkɨ kemɨkareuyewetse meteyurie 'uxipiya tukaritsie?
25Ketsutsi mɨpaɨ katiniwarutahɨawe:
—¿Hatsuaku xekate'ititerɨwawawe kemɨtiuyuri Rawiri kepauka memuhakakwi mɨkɨ meta hamatɨana memu'uwakai meta kepauka meteheuyehɨatɨ memakɨ? 26'Iya Kakaɨyari kiyata kaneutahani kepauka 'Awiyataxi mawari wewiwamete tiwa'aitɨwame mɨhɨkɨtɨkai, paa Kakaɨyari hɨxie mamanekai kaniutikwani, mawari wewiwamete xeikɨa heitserie mepexeiyakai memitikwanikɨ mɨkɨ paa. Metatsiere hamatɨana memu'uwakai kaniwarumini.
27Mɨpaɨta Ketsutsi katiniwarutahɨawe:
—'Uxipiya tukari kaniuti'utsieni teɨteri wahetsiemieme. Teɨteri kememɨte'uwewiya, 'uxipiya tukaritsie mieme xeikɨa mepɨka'utiwewiya. 28'Ayumieme Yuri Tewi nehɨkɨtɨtɨ, 'uxipiya tukari hepaɨtsita tsiere nekatini'aitani.
Currently Selected:
Marikuxi 2: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.