Mateu 4
4
Ketsutsi kemɨtiuta'inɨatsie
(Mat 4:1-11 – Mar 1:12-13, Ruk 4:1-13)
1Hikɨ 'Iyari Ketsutsi kanewitɨni makumawetsie paitɨ, mana Kauyumarie mita'inɨatakɨ. 2Hikɨ huta tewiyari tukari, huta tewiyari tɨkari yuhakietɨ, kaneuhakamɨkɨkaitɨni. 3Hikɨ tiyu'irɨwiyame nuaka mɨpaɨ katinitahɨawe:
―Kamɨtsɨ, xɨka 'ekɨ Kakaɨyari penu'ayatɨni, mɨpaɨ ketineutahɨawi 'ikɨ tetexi paa makɨnekɨ.
4Ketsutsi mɨpaɨ katinita'eiya:
―'Utɨarika mɨpaɨ kanaineni: “Tewi paakɨ xeikɨa pɨka'ayeniereni, Kakaɨyari kemutayɨ, niukieya naitɨ peuyewetseta”.
5Hikɨta kauyumarie Kerutsareme kiekariyaritsie paitɨ kaneiwitɨni, tuki yekɨrita 'amanutitewatsie kanenutiwitɨni. 6Hikɨ mɨpaɨ katinitahɨawe:
―Xɨka 'ekɨ Kakaɨyari penu'ayatɨni, 'ena keneukatsuna. 'Utɨarika mɨpaɨ kanaineni:
»“Niuki tuayamete pɨtiwa'aitɨaka 'ahepaɨtsita,
yumamakɨ mepɨmatsituikani
kapa tetetsie pe'uti'ɨkamɨrekɨ”».
7Hikɨ Ketsutsi mɨpaɨ katinita'eiya:
―Mɨpaɨta kanaineni 'utɨarika: “Ti'aitame mɨ'akakaɨyari pepɨka'inɨataneni”.
8Hikɨ tawari Kauyumarie kaneiwitɨni hɨri 'amanutitewatsie, kwiepa memɨte'aita wakwie xexuime kanixeiyatsitɨani witsimɨ'anene. 9Mɨpaɨ tikuhɨawetɨ:
―'Ikɨ naime nepɨmatsiyetuirieni, xɨka pe'awaɨriyani pemɨnetsi'ayexeiyanikɨ.
10Hikɨ Ketsutsi mɨpaɨ katinitahɨawe:
―Kenemie Kauyumarie. 'Utɨarika mɨpaɨ kanaineni: “Ti'aitame mɨ'akakaɨyari xeikɨa kenayexeiyani”.
11Hikɨ Kauyumarie kanihayewa kaneyani, niuki tuayamete me'u'axɨaka mekaniparewiekaitɨni.
Ketsutsi kemɨtitsutɨa tikuxatatɨ
12Kepauka Ketsutsi mɨtiutamari kename Wani hanutahɨiyakai, Karereya paitɨ kaneyani. 13Natsaretitsie yeyaka, Kaperunaume kaneyani mana mekanikɨ harakuna tetsita mɨti'ane, Tsawuruni kwieyaritsie meta Nepɨtahari, 14mɨpaɨ katinaye'ani Kakaɨyari niukameya Kitsariyaxi kemutayɨ:
15«Tsawuruni kwieyari meta Nepɨtahari kwieyari,
harakuna mananiere Kurutani 'anutaɨye meta,
Karereya memɨkatateɨterima memakutei,
16teɨteri makuyɨwitsie memɨtitei
mɨkɨ hekɨariya kwimɨxawatɨ mekaniuxeiya,
mɨkɨ yɨwipa memɨkutei hake memɨkwiximekai,
mɨkɨ wahetsiemieme hekɨariya kaniuhekɨariwieni».
17Merikɨtsɨ 'ana Ketsutsi kanitsutɨani mɨpaɨ tikuxatatɨ: «Xeketeneuhayewa ke'axaxemɨteyurie, karikɨ kanehuraniri Kakaɨyari kemɨtita'aita».
Ketsutsi ketsɨweiyamete kemɨtiwaruta'ini yunaukame
(Mat 4:18-22 – Mar 1:16-20, Ruk 5:2-11, Wa 1:35-42)
18Kepauka harakuna tetsita muyemiekai Karereya kwieyaritsie, kaniwaruxeiya yuhutame yu'iwamakame: xewitɨ Tsimuni Pekuru mɨtitewakai, meta 'Atɨrexi. Mana wipikɨ mekateniwiwietɨwekaitɨni harakunatsie, mɨkɨ memɨketsɨweiyametetɨkaikɨ. 19Hikɨ Ketsutsi mɨpaɨ katiniwarutahɨawe: «Hikɨmɨ, nehetsie xeketeneuwiya, teɨteri waxexeɨriwamete nekanixe'ayeitɨamɨkɨ». 20'Ana yapauka wipi me'uku'eiriexɨaka, hetsiena mekateniuwiya.
21Manata kwitɨwa ya'amietɨ kaniwaruxeiyata yuhutame yu'iwamakame: Kakuwu meta Wani, Tsewereu niwemama, kanuwatsie mekaniyetekaitɨni yupaapa hamatɨa yuwipi memanetsikitɨatɨ. Hikɨ kaniwaruta'inieni. 22Hikɨ 'ana kwitɨwa kanuwa me'uku'eirieka meta yupaapa, mekaneiweiya.
Ketsutsi kemɨtiwa'ɨkitɨakai yumɨireme
23Merikɨtsɨ Ketsutsi naitsarie Karereya kwieyaritsie kanikuyeikakaitɨni, tukiteta tiku'ɨkitanetɨ, niuki 'aixɨa manuyɨne taheima mieme hepaɨtsita tikuxatatɨ, 'aixɨa meteheu'eriekame warayeitɨwatɨ naime kwiniya hepaɨtsita meta kememɨte'uka'eniwakai teɨteri. 24Naitsarie Tsiriya kwieyaritsie kaniutamariwa. Mekaniwa'atɨwakaitɨni kwiniya yukɨ 'anenemekɨ memɨtekukuyekai, kukuiniyakɨ waɨkawa memɨte'uka'eniwa, kakaɨyarixi 'axamemɨ'anene memɨwanɨ'ɨ, meta kierixiekate, meta huriekate, hikɨ mɨkɨ kaniwaranayexɨrɨwakaitɨni. 25Yumɨiretɨ teɨteri mekaneweiyakaitɨni Karereyatari, Tamamata Kiekaritsietari meta Kerutsaremetari, Kureyatari, meta Kurutani 'anutaɨyetari.
Currently Selected:
Mateu 4: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.